8
Alla sinme Nuuha yi,
a do gundufoonu do kaadufoonu beenu su gaa doome fuuren ŋa.
Alla da fanken kara ɲiiɲen kanma,
jin jope yanqana.
2 Ɲiiɲen jinyaaxa xooron raqun texe,
kanmun raqun texe,
kanmen kuti.
3 Jin toxo kaawana bakka ɲiiɲen ŋa fonne-fonne.
Kamen do tankaragen biton dangi falle,
jiinun roxo.
4 Xasu ɲerundin bita tanmun do ɲerun koota,
fuuren sigi Hararaati¤ gidintonbon kanma.
5 Jin toxo roxoono ma xasu tanmundi,
ken xaso bita fana,
gidintonben jope bangeene.
6 Tannaxate bito dangi falle,
Nuuha ga da fuuren folonbote be dabari,
a da a wuɲi.
7 A da xaaxen wara bakka sellan ŋa.
Xaaxen kanpi dagana,
nan saage riini karama,
na daganansaagayi dantanto ɲa,
ma jin gaa fiirene bakka ɲiiɲen kanma.
8 Ken falle,
Nuuha da booren wara dagana ɲiiɲen kanma faayi selli a ga kaawa.
9 Xa booren taanun ma sabatira kita,
baawo jin wa saqa ɲiiɲen danman su kanma.
A saage riini,
Nuuha da i kitten beeri a yi,
na a rondi fuuren ŋa.
10 Bito ɲeri dangi falle,
a da boore ke wara dagana sellan duuxura xadi.
11 Lellen biren ŋa,
a saage riini,
jayituunan deren wa a soomon ŋa,
a xayi-xaye.
Nuuha da a tu nan ti jin roxo ɲiiɲen kanma.
12 Bito ɲeri tana dangi falle,
a da boore ke wara dagana duxurandi xadi.
Ken ta,
booren maxa saage riini.
13 Nuuha wuyin kama tunmundin do a siina baanandin xasu fanan koota fana,
jin kaawa bakka ɲiiɲen ŋa.
Nuuha da fuuren bipen wutu bakka a yi,
na sellan faayi.
A ti :
« Ee,
ɲiiɲen kaawa ! »
14 Xasu fillandin tanpillen do ɲerun koota,
ɲiiɲen kaawa pewu-pewu.
15 Alla daali Nuuha da :
16 « An do an yaqen do an renyugun do an kalluyaxaru,
xa bogu fuuren ŋa.
17 Fo yonkinto be xa gaa no,
i su bagandi :
yeliŋu,
daabanu,
do ɲiiɲedufoonu,
i nan bogu,
nan saare,
nan jiidi,
nan gabo ɲiiɲen kanma. »
18 Nuuha do i yaqen do i renmun do i kalluyaxarun bogu.
19 Fo yonkinte ke su bogu :
ɲiiɲedufoonu,
yeliŋu,
tagefo su gaa dillene ɲiiɲen kanma,
i su bogu xabiila-xabiila.
20 Nuuha da sadaxindinoqun taga Tunka Duumanten da.
A da fo raga daaba halaale ke su yi,
na fo raga yelin halaale ke su yi,
na i ɲa sadaxa xuruminte yi sadaxindinoqun ŋa.
21 Timi liŋen sege bakka sadaxa ke yi,
nan kiɲe Tunka Duumanten ŋa.
A ti du da :
« Tonŋun ya ni haadamarenmen sondomen buren ni gelli a tugunne.
Xa,
n ntaxa ɲiiɲen langana do a yi abada.
N ntaxa fo yonkinten su xa halakini keeta,
xoyi in ga da a ɲa moxo be.
22 « Na ɲiiɲen kanma toxo ke moxo yi :
tipe do fateye,
mulle do jabare,
xaaxo do kiinaye,
wuro do kiye,
ku nta yillene abada. »