[Tuufaana ŋaame]
7
Ken falle,
Tunka Duumanten daali Nuuha da :
« Anken do an koren su,
xa ro fuuren ŋa,
baawo an baane ya na killi teleŋonten kanma ke sere su noxo.
2 An na daaba yugu ɲeri,
a do daaba yaxaru ɲeri wutu daaba halaale su yi,
an na yugu baane do yaxarin baane wutu daaba haraamunte su yi,
3 na yugu ɲeri do yaxaru ɲeri wutu yeliŋen noone su yi,
kuudo i soxoodin nan sanqi do ɲiiɲen danman su yi.
4 Baawo bito ɲeri lenki falle,
n wa kanmen riitini tannaxate bito,
kiyen do wuro.
N ga da fo wo fo taga ɲiiɲen kanma,
n wa a su buruxana. »
5 Nuuha da Tunka Duumanten ɲaamariyen su ɲa ti i moxon ŋa.
6 Tuufaana ŋaamen gaa riini bire be,
ken da a ɲi Nuuha wuyin wa komo tunmi siine.
7 A ro fuuren ŋa,
a do i ren yugun do i yaqe,
a do i kalluyaxaru,
kuudo i nan kisi tuufaana ŋaamen ŋa.
8 Daaba halaalen do daaba haraamunte,
yeliŋun do ɲiiɲedufoonu,
9 i su ri katta Nuuha yi,
yugo do yaxare,
ma i na ro fuuren ŋa,
xoyi Alla ga da a ko Nuuha da moxo be.
10 Bito ɲeri dangi falle,
tuufaana ŋaamen jope ɲiiɲen kanma.
11 Nuuha kama tunmundin siinen xasu fillandin bita tanmun do ɲerun koota,
kanmun do ɲiiɲen jin mangesinun su raqun wuɲi.
12 Kanmen xenu riyen ŋa,
tannaxate bito,
a wa texeene kiyen do wuro.
13 Ken koota baane yi,
Nuuha ro fuuren ŋa,
a do i yaqen do i ren yugu :
Saami do Haami a do Yaafasi,
do a kalluyaxarun sikki,
14 ikun do gundufoonu,
kaadufoonu,
ɲiiɲedufoonu,
yeliŋen noonen su,
kafiini kanpagumen su yi.
15 Tagefo yonkinten noone su ri kafiini Nuuha yi fuuren ŋa.
16 Ke tagefo su ri fillo-fillo,
yugo do yaxare,
xoyi Alla ga da ɲaamariyen kini moxo be.
Ken falle Tunka Duumanten da fuuren raqen texe Nuuha yi.
17 Tuufaana ŋaamen toxo roono ɲiiɲen kanma,
tannaxate bito.
Jin gabo ɲiiɲen kanma ma a gaa fuuren tenbana bakka ɲiiɲen ŋa.
18 Ŋaamen xooro,
nan kasafo,
fuuren toxo lingiri-langarana jin kanma.
19 Ŋaamen kesefo na ɲiiɲen kanma gidi gillun su toni,
20 a wurugi gidintonbo ku kanma ti sogone tanmu do karago.
21 Feriganke su ga ɲi dillene ɲiiɲen kanma,
a kara :
yeliŋu,
kaadunfoonun do gundufoonu,
a do ɲiiɲedufoonun do haadamarenmu,
a su kara.
22 Fo wo fo ga ɲi neegunu ɲiiɲen kanma,
a kara.
23 Ke moxo ya ni,
Tunka Duumanten ga da tagefo yonkinten su buruxa bakka ɲiiɲen kanma :
haadamarenmu,
daabanu,
ɲiiɲedufoonu,
a do kanmun yeliŋu,
i su buruxe,
nan toxo Nuuha do ku beenu ga ɲi do a batte fuuren ŋa.
24 Jin kasafoyen da kame do tankerege koota ya ɲa ɲiiɲen kanma.