[Haadamarenmen tunboguntaaxu]
6
Bire be haadamarenmun ga xenu gaboyen ŋa ɲiiɲen kanma,
na renyaxarun saara,
2 kanmun taaxaanon¤ jaarabi renyaxaru ku yi.
I wa i wuttu yaqu yi.
3 Ken bire Tunka Duumanten daali :
« N ra ntaxa haadamarenmun muɲini,
i gaa bireene ti in yonkin ŋa,
baawo i nta in killen kanma.
N wa i wuyin xenpendini kame do tanpille siine. »
4 Ken waxati kuŋa,
seri dinka gillun ya n ɲi ɲiiɲen kanma,
i gaa xiriini Nefelinu.
Bire be xa kanmun taaxaanon do haadamarenmun renyaxarun ga saage kafiini,
i da renmun saara.
Kun ya n ɲa ken bire yugu saaka toxo bogunton ŋa.
5 Tunka Duumanten da a wari nan ti,
haadamarenmun fo buren gabo ɲiiɲen kanma,
i sondomun bono,
koota su,
i sinmeyen ni fo buren duuron ya yi.
6 A nimisi i ga da haadamarenmen taga ɲiiɲen kanma,
a sondomen suno.
7 A daali kuŋa :
« N wa haadamarenmen buruxana bakka ɲiiɲen kanma,
kafiini daaban do ɲiiɲedufo,
a do kanmun yeliŋu,
baawo in nimisi i taganden ŋa. »
8 Xa Nuuha da Tunka Duumanten neeman kita.
[Nuuha do i renmu]
9 Nuuha do i kaadunkon taarexun faayi :
Nuuha ni seri teleŋonte do seri tinmante a waxatin seron naxa.
A do Alla wa doome.
10 A da renyugu sikki saara :
Saami,
Haami,
a do Yaafesi.
11 Ken waxati,
Alla da a wari nan ti haadamarenmen bono,
sondonburaaxun gabo ɲiiɲen kanma.
12 Alla da jaaten raga nan ti duna bono,
haadamarenme su ntaxa killi sire kanma.
13 Ken bire Alla daali Nuuha da :
« N fanqe a kanma na tagefo ke su buruxa,
na a sababun ɲa haadamarenmen ŋa.
Sondonburaaxun wa ɲiiɲen banŋe wo banŋe su yi.
N wa i halakini,
na ɲiiɲen xa halaki.
14 Xa,
anken na sollinfuura xoore dabari,
na a noxon ɲa konponlenmun ŋa,
na a noxon do a sellan betexe ti godoron ŋa.
15 A dabari moxon faayi :
an na a giiloyen ɲa kamo sikki sogone,
na a noxon ɲa tankarage sogone,
na a taaxunten ɲa tanjikke sogone,
16 na xureyen toxo bipen do fuuren kanben naxa,
sogone haqe,
na fuure ke noxon ɲa sankancoonu sikki yi,
konpo wuredunke,
a do naxadunken do kanmudunke,
na fonlaqen bagandi kaaran ŋa.
17 Ken bire,
nke Alla,
n wa tuufaana ŋaamen riitini ɲiiɲen kanma,
na tagefo yonkinten su halaki kanmun wure.
Fo wo fo gaa ɲiiɲen kanma,
n wa a halakini.
18 Xa,
n wa tafunden roono in do anken naxa.
Nuuha,
anken do an kaadunko,
an renmun do an yaqe,
a do an kalluyaxaru,
axa wa roono fuure ke noxon ŋa.
19 An na fillo-fillo,
yugo do yaxare wutu daaba yonkinte su yi do du yi fuuren ŋa,
kun na toxo bireene.
20 Yeliŋen do daaba,
a do ɲiiɲedufon noonen su,
fillo-fillo wa riini katta an ŋa nan bire do an ŋa.
21 An na fo wutu biraadon noone su yi,
na silifandan wutu an du da,
a do ku beenu gaa kafiini an ŋa fuure ke noxo. »
22 Nuuha da Alla ɲaamariyen su dabari i moxon ŋa.