21
Langit Bahaꞌu maka Dunya Bahaꞌu
1 Manjari itu aniyaꞌ taꞌndaꞌku langit maka dunya hinangan bahaꞌu, halam aniyaꞌ tahikna. Langit tagnaꞌ maka dunya tagnaꞌ bay na nilanyapan. 2 Taꞌndaꞌku isab daꞌira Sussi, Awrusalam Bahaꞌu, deyoꞌ bay min sulgaꞌ min haddarat Tuhan. Ya daꞌira inān bay niari-arihan saliꞌ sapantun pangantin dꞌnda bang song binatalan ni pangantin lꞌlla. 3 Sakali aniyaꞌ takaleku suwala akosog luwas min paningkōꞌan Tuhan, yuk-i, “Buwattinaꞌan magdalahat na Tuhan maka manusiyaꞌ. Patꞌnnaꞌ iya ma sigām, jari in sigām palsukuꞌanna na. Magbaran na Tuhan pataptap ma manusiyaꞌ ati iya ya pagtuhanan sigām. 4 Sinapuhan eꞌna kamemon boheꞌ mata sigām. Halam na aniyaꞌ magkamatay, halam na aniyaꞌ magdohon atawa magtangis, maka halam na aniyaꞌ pꞌddiꞌ tananam eꞌ sigām. Sabab kamemon kahālan ma dunya tagnaꞌ pahalam na.”
5 Sakali angabtang Dangan ya aningkōꞌ ma tingkōꞌan bangsahan, yukna, “Na, pabahaꞌuku na ai-ai kamemon.” Yukna lagiꞌ, “Sulatun itu, sabab bꞌnnal sadja kabtangan itu maka kapangandolan.”
6 Angallam isab iya ni aku, yukna, “Aubus na kahinanganku kamemon. Aku in Alip maka Yaꞌ, Tagnaꞌan maka Kahinapusan. Sai-sai patay boheꞌ painumku min tuburan boheꞌ ya amuwan kallum kakkal. Painumku iya minsan halam aniyaꞌ tongodna. 7 Pasukuꞌanku kahāpan itu ma sasuku mbal tagaꞌos eꞌ sasat-manasat. Aku ya pagtuhananna, maka iya ya anakku. 8 Saguwāꞌ sasuku patāw maka sasuku mbal kapangandolan, nilarukan ni deyom api. Damikiyanna isab sasuku maghinang kasammalan, saga amonoꞌ ma pagkahina manusiyaꞌ, maghinang kalumuꞌan dꞌnda maka lꞌlla, saga magpantak, saga aꞌa anumba ni saddī min Tuhan, sampay kamemon saga aꞌa magputing, ya palsukuꞌan sigām kamemon pinehēꞌ ni deyom api mailang, ya magdanaw-danaw suleyabna. Ya na heꞌ pinagōnan Kamatay Karuwana.”
Awrusalam Bahaꞌu
9 Sakali itu aniyaꞌ pasekot ni aku dakayuꞌ malaꞌikat min malaꞌikat pituꞌ inān, ya amowa pituꞌ pinggan bulawan apꞌnnoꞌ eꞌ pituꞌ ginis balaꞌ. Yukna ni aku, “Piꞌitu ka. Paꞌndaꞌanta ka pangantin dꞌnda, ya pinahꞌnda eꞌ Bili-bili.” 10 Manjari kapagbayaꞌan aku eꞌ Rū Tuhan ati binowa aku eꞌ malaꞌikat eꞌ tudju ni diyataꞌ būd alanga toꞌongan. Pinaꞌndaꞌan aku Awrusalam, Daꞌira Sussi, hinabuna pareyoꞌ min sulgaꞌ, min haddarat Tuhan. 11 Daꞌira inān angillap eꞌ sahaya Tuhan. Ya illapna saliꞌ illap palmata intan gaddung, atilag saliꞌ sawa samin. 12 Daꞌira inān bay nilikusan maka ād batu aluha maka alangkaw. Sangpūꞌ maka duwa lawangna, tinungguꞌan pakaniya-pakaniya eꞌ malaꞌikat sangpūꞌ maka duwa. Ya lawang inān bay sinulatan maka ōn bangsa Israꞌil kasangpūꞌ maka duwa. 13 Ād inān aniyaꞌ tꞌllu lawangna tampal ni sobangan, tꞌllu ni satan, tꞌllu ni uttalaꞌ, maka tꞌllu isab tampal ni sꞌddopan. 14 Ya papagan ād pangalikus daꞌira inān sangpūꞌ maka duwa batu aheya, sinulatan pakaniya-pakaniya maka ōn aꞌa kasangpūꞌ maka duwa ya bay kawakilan eꞌ Bili-bili.
15 Na, ya malaꞌikat bay amissalahan aku inān, aniyaꞌ bowana sukuran bulawan panukudna ma daꞌira sampay ma lawangna maka ādna. 16 Magpasagiꞌ daꞌira inān, saliꞌ du tahaꞌna maka luhana. Pagsukud itu duwangibu maka mpat hatus kilometro tahaꞌna, maka langana maka luhana. 17 Sinukud isab eꞌna kapal ād inān ati sukuranna mpatpūꞌ dꞌppa bang ma sukurantam. 18 Palmata intan gaddung ya pangahinang ād inān ati baran daꞌira inān bay nihinang maka dī bulawan, sagōꞌ atilag saliꞌ sawa samin. 19 Saga batu pamapagan ād pangalikus daꞌira inān bay niari-arihan maka palmata ginis-ginisan. Ya pangari-ngari batu dakayuꞌ inān palmata intan gaddung, ya karuwana palmata bilu alutuꞌ, katꞌlluna palmata jaliꞌ-jaliꞌ, kaꞌmpatna palmata gaddung alutuꞌ, 20 kalimana palmata sakulati magjaliꞌ-jaliꞌ, kannomna palmata keyat alutuꞌ, kapituꞌna palmata biyaning, kawaluꞌna palmata ogos gaddung, kasiyamna palmata kuning, kasangpūꞌna palmata gaddung ugbus-ugbus saging, kasangpūꞌ ka ssana palmata bilu magbꞌttik-bꞌttik, ati ya kasangpūꞌ karuwana palmata taluk. 21 Ya pangahinang sangpūꞌ maka duwa lawang daꞌira inān sangpūꞌ maka duwa isab mussaꞌ tipay. Dakayuꞌ du mussaꞌ atibuꞌuk ya pangahinang dakayuꞌ lawang. Maka saga lān ma deyom daꞌira inān dī bulawan, atilag saliꞌ sawa samin.
22 Halam aniyaꞌ langgal taꞌndaꞌku ma deyom daꞌira inān pangarapan Tuhan sabab inaꞌan asal Tuhan ya Panghūꞌ Sangat Kawasa, maka inaꞌan isab Bili-bili. Angkan mbal kagunahan langgal mainaꞌan. 23 Mbal isab magkagunahan sawa llaw atawa sawa bulan ma daꞌira inān sabab inaꞌan asal sahaya Tuhan amuwan kasawahan, maka inaꞌan Bili-bili pamalitaꞌan. 24 Pasaplag sawana inān pamasawa palꞌngnganan palbangsa-bangsahan. Maka saga kasultanan min kaluhaꞌan dunya amowa du pangaltaꞌ sigām ni deyom daꞌira inān. 25 Saga lawangna mbal tinambol, aukab sadja kahabaꞌ llaw sabab halam na aniyaꞌ sangom mainaꞌan. 26 Ai-ai makabuwan kabantugan ma palbangsa-bangsahan maka ai-ai pangaltaꞌ sigām, binowa du pinaꞌan ni deyom daꞌira, 27 sagōꞌ halam aniyaꞌ lumuꞌ pinasōd pinaꞌan atawa aꞌa maghinang kamaruhan atawa aꞌa magputing. Ya sadja makasōd ni deyom daꞌira inān bang aꞌa bay tasulat ōn sigām ma kitab sukuꞌ Bili-bili, ya kitab panunulatan ōn aꞌa bay kabuwanan kallum kakkal.