22
Sapaꞌ Poꞌonan Kallum
1 Sakali itu pinaꞌndaꞌan aku sapaꞌ eꞌ malaꞌikat, sapaꞌ makabuwan kallum kakkal. Asawa sidda boheꞌna, anasahan min paningkōꞌan Tuhan maka Bili-bili, 2 labay min tꞌngngaꞌ lān ya ma deyom daꞌira heꞌ. Ma karuwambilaꞌ sapaꞌ inān aniyaꞌ kayu, ya kayu makabuwan kallum. Kayu inān magbuwaꞌ min sangpūꞌ maka duwa ma deyom dantahun, min tꞌdda ma deyom dambulan. Boꞌ dahunna inān tapanguliꞌ saki ma kabangsa-bangsahan. 3 Halam aniyaꞌ mulkaꞌ tabāk ma deyom daꞌira inān.
Ya tingkōꞌan Tuhan maka Bili-bili inaꞌan ma deyom daꞌira ati pinudji du iya eꞌ saga sosohoꞌanna. 4 Taꞌndaꞌ eꞌ sigām pamaihuꞌanna maka sinulatan ōnna tuktuk sigām. 5 Halam aniyaꞌ sangomna mahēꞌ maka mbal sigām magkagunahan palitaꞌan atawa mata llaw sabab Panghūꞌ Tuhan ya amarantaꞌ sigām. Maka sigām ya angꞌntan pagparinta sampay ni kasaumulan. 6 Manjari amissala malaꞌikat inān ni aku, yukna, “Ya lapal kabtangan bay tasulatnu ilu bꞌnnal sadja, kapangandolan asal. Sabab in Panghūꞌtam Tuhan, ya amasangon Rū-na ma kanabi-nabihan, bay amapiꞌitu malaꞌikatna amataꞌuwan saga sosohoꞌanna pasal pakaradjaꞌan maraiꞌ na pinatꞌkka.”
Kapiꞌitu si Isa Pabalik
7 “Pakale kam,” yuk si Isa, “asekot na kapiꞌiluku. Aheya du kakōgan sasuku magkahagad ma kabtangan bay takallam ma deyom sulat ilu.”
8 Na, aku itu si Yahiya. Bay takaleku maka taꞌndaꞌku saga pakaradjaꞌan tasulat itu kamemon. Akatis paꞌin eꞌku akale maka angꞌndaꞌ, magtūy aku bay pasujud ma alopan malaꞌikat, ya bay amaꞌndaꞌan aku ai-ai heꞌ. Arak aku amudji iya, 9 sagōꞌ yuk malaꞌikat eꞌ ni aku, “Daꞌa ka amudji aku sabab pagkahinu aku sosohoꞌan Tuhan. Pagkahiku isab saga kanabi-nabihan ya dauranakannu, maka sasuku magkahagad ma lapal sulat itu. Luwal Tuhan dakayuꞌ-kayuꞌ ya pudjita.”
10 Yukna isab ni aku, “Daꞌa limbungin lapal bay pamalman ma deyom sulat itu sabab asekot na waktu pamatꞌkka pakaradjaꞌanna kamemon. 11 Sai-sai angahinang kalaꞌatan maka kasabulan, paruhun gom paꞌin kalaꞌatanna maka kasabulanna ma sinosōng. Damikiyanna isab sai-sai bay angahinang ahāp subay pasangdan na maghinang ahāp. Maka sai-sai isab asussi pangatayanna subay pasangdan magmasussi.”
12 “Pakale kam,” yuk si Isa. “Asekot na kapiꞌiluku. Bowaku du tungbas panungbasku aꞌa kamemon kaniya-kaniya, ai-ai katongoran hinangna. 13 Aku in Alip maka Yaꞌ, in Awal maka Ahil, in Tagnaꞌan maka Kahinapusan.
14 “Aheya kakōganna sasuku anussi pamakayna min tamak kamemon, hatina anussi pangatayanna, sabab kabuwanan sigām kapatut amangan buwaꞌ min kayu makabuwan kallum eꞌ, maka kapatut isab palabay min saga lawang pasōran ni deyom daꞌira heꞌ. 15 Sagōꞌ inaꞌan ma luwasan daꞌira saga maghihinang kalumuꞌan na paꞌin, saga magpapantak, saga aꞌa maghinang kasabulan dꞌnda maka lꞌlla, saga aꞌa magpapatay pagkahina manusiyaꞌ, saga aꞌa magpanumba ni saddī min Tuhan maka saga aꞌa magpangakkal maka magputing.
16 “Aku itu si Isa. Bay sohoꞌku malaꞌikatku piꞌilu ni kaꞌam saga palhimpunan jamaꞌaku boꞌ kam pinataꞌu eꞌna pasal saga pakaradjaꞌan itu. Aku itu tubuꞌ sultan Daꞌud. Aku itu niōnan Maga, bituꞌun asahaya.”
17 Sakali ahꞌlling Rū Tuhan maka saga aꞌa ya pinagbahasa pangantin dꞌnda. Yuk sigām, “Piꞌitu ka.” Sasuku makakale bissala itu subay ameyaꞌ-meyaꞌ ahꞌlling, “Piꞌitu ka.” Piꞌitu kam, sasuku kam patay boheꞌ. Anginum kam boheꞌ makabuwan kallum itu. Pangahilas koꞌ itu ni sai-sai bilahi, minsan halam aniyaꞌ tongodna.
Bissala Katangbusan
18 Aku itu si Yahiya. Bandaꞌanta kam, sasuku kam makakale lapal bay takallam ma deyom sulat itu: bang aniyaꞌ gantaꞌ amakꞌnnop ai-ai halam bay takallam ma deyom sulat itu, pinakꞌnnopan du iya eꞌ Tuhan saga balaꞌ bay tasabbut ma deyomna itu. 19 Damikiyanna, sai-sai angulangan kabtangan min deyom sulat itu, kinulangan isab eꞌ Tuhan palsukuꞌanna ya tasabbut ma deyom sulat itu. Mbal iya kaniyaꞌan buwaꞌ min kayu ya makabuwan kallum. Mbal iya pinasōd ni deyom Daꞌira Sussi.
20 Na, ya na itu pamissala eꞌ dangan ya anaksiꞌ ma saga pakaradjaꞌan bay pinabukis ma sulat itu, yukna, “Tantu. Asekot na kapiꞌiluku.”
Na, bang paꞌin ka piꞌitu, Panghūꞌ Isa.
21 Mura-murahan, bang paꞌin kaꞌam kamemon pinaniyaꞌan tatabangan eꞌ Panghūꞌ Isa. Amin.