20
Dangibu Tahun
1 Manjari aniyaꞌ na isab taꞌndaꞌku malaꞌikat pareyoꞌ min sulgaꞌ, amowa kunsiꞌ tambol lowang tegob-tegoban, maka kilikili aꞌaslag. 2 Sinaggaw eꞌna naga, ya Sowa Masa Awal, hatina nakuraꞌ saitan atawa hibilis. Tasaggaw paꞌin, niengkotan iya maka kilikili ati ginantaꞌan dangibu tahun. 3 Puwas eꞌ, nilarukan iya eꞌ malaꞌikat ni deyom lowang tegob-tegoban, boꞌ kinandaruhan pahogot sampay pinikitan gindan boꞌ mbal taukab. Tinambolan nakuraꞌ saitan inān boꞌ supaya mbal na paꞌin makapangakkal ma palbangsa-bangsahan, satꞌggol mbal giꞌ paꞌabut ni dangibu tahun eꞌ. Bang taꞌabut na dangibu tahun, pinalꞌppa du iya, sagōꞌ daiꞌ-daiꞌ du.
4 Manjari itu aniyaꞌ taꞌndaꞌku saga paningkōꞌan babangsahun maka saga aꞌa magtingkōꞌan mainaꞌan. Kabuwanan sigām kapatut amalꞌngngan hukuman. Taꞌndaꞌku baꞌanan saga umagad min aꞌa bay pinapatay ma sabab pagnasihat sigām panduꞌ bꞌnnal ya bay pamataꞌu eꞌ si Isa, maka ma sabab palman Tuhan. Saga aꞌa itu halam bay makasumba ni sattuwa talun atawa ni taꞌu-taꞌu hinangan pangluwahanna. Halam isab bay makataimaꞌ umbul sattuwa panāp tuktuk sigām atawa tangan sigām. Allum na sigām pabalik min kamatay ati ameyaꞌ sigām ma Al-Masi magsultan ma deyom dangibu tahun.
5 Ya inaꞌan tagnaꞌan pagpakallum pabalik ma saga aꞌa bay magpatayan. (Aꞌa magpatayan kaseheꞌ mbal giꞌ pinakallum pabīng. Subay na apuwas dangibu tahun eꞌ.) 6 Aheya kalasigan maka kahāpan sasuku makasambeyaꞌ pinakallum min kamatay ma pagpakallum dahū itu. Mbal sigām talapay ma kabinasahan paddas, ya pinagbahasa kamatay kaminduwana. Pinaꞌntanan sigām hinang kaimaman angarap ni Tuhan maka ni Al-Masi. Ati ameyaꞌ sigām ma Al-Masi angꞌntan pagparinta ma deyom dangibu tahun.
Pasal Nakuraꞌ Saitan Taraꞌug na
7 Na, bang atobtob na dangibu tahun inān, pinalꞌppa du nakuraꞌ saitan min deyom lowang bay pangalabusuhan iya. 8 Pagluwasna minnēꞌ, angakkal na isab iya ma kabangsa-bangsahan ma mpat pidjū alam, ya bangsa pinagōnan Gōg maka Magog. Pinapagsakaum saga aꞌa inān kamemon eꞌ nakuraꞌ saitan, pinasakap magbonoꞌ. Ya heka sigām inān saliꞌ sapantun heka solagan gusung ma bihing tampe. 9 Manjari maglanjalan baꞌanan aꞌa inān boꞌ angulatapan kaluhaꞌan dunya, sampay alikus eꞌ sigām paghantiꞌan aꞌa sukuꞌ Tuhan maka daꞌira kalasahanna. Sagōꞌ aniyaꞌ api pareyoꞌ min langit anunuꞌ sigām kamemon. 10 Puwas eꞌ in nakuraꞌ saitan, ya bay angakkalan saga aꞌa palbangsa-bangsahan inān, waꞌi nilarukan ni deyom api mailang ya magdanaw-danaw suleyabna. Ya na heꞌ api bay pangalarukan sattuwa talun maka nabi putingan. Na, inaꞌan sigām pinapꞌddiꞌan llaw-sangom sampay ni kasaumulan.
Hukuman Kahinapusan
11 Manjari itu aniyaꞌ taꞌndaꞌku paningkōꞌan apoteꞌ maka aheya, maka taꞌndaꞌku isab ya magtingkōꞌ mainaꞌan. Dunya maka langit waꞌi na alaꞌan min haddaratna, mbal na taꞌndaꞌ pabīng. 12 Sakali taꞌndaꞌku aꞌa magpatayan kamemon aheya-arikiꞌ, inaꞌan magpanꞌngge ma dahuan paningkōꞌan inān. Jari niukab kakitaban, maka aniyaꞌ giꞌ kitab dakayuꞌ niukab, ya kitab pagsusulatan ōn saga aꞌa, sasuku kabuwanan kallum kakkal. Saga aꞌa magpatayan inān nihukum min bay kahinangan sigām ahāp-alaꞌat, ya tasulat asal ma deyom saga kitab inān. 13 Sai-sai bay magpatayan ma deyom tahik bay paluwas paharap ni Tuhan. Damikiyan isab sigām bay ma deyom gumi maka nalkaꞌ paluwas isab sigām kamemon boꞌ paharap ni Tuhan. Ati nihukum sigām kamemon kaniya-kaniya min bay kahinangan sigām ahāp-alaꞌat. 14-15 Puwas eꞌ, sasuku halam bay tasulat ōnna ma deyom kitab pagsusulatan ōn saga aꞌa taga-kallum kakkal, nilarukan ni deyom kasaplagan api ya magdanaw-danaw suleyabna. Manjari in kamatay maka nalkaꞌ bay tinimanan ni deyom api mailang ya magdanaw-danaw, ya pinagōnan kamatay karuwana.