19
1 Na aubus paꞌin eꞌ-i, aniyaꞌ takaleku saliꞌ suwala min manusiyaꞌ kumarukan hekana sikapūn-pūnan mainaꞌan ma sulgaꞌ. Yuk sigām,
“Pudjitam Tuhan! Ma iya asal sahaya maka kawasa.
Tunggal du iya makalappasan kitam min dusa.
2 Abontol maka bꞌnnal hukumanna kamemon.
Patꞌnnaꞌna hukuman ma dꞌnda babantugun, dꞌnda alaꞌat hinangna
ya bay amowa-mowa aꞌa kamemon anunud ma iya maghinang kalumuꞌan.
Bininasa iya eꞌ Tuhan ma sabab aꞌa sukuꞌ Tuhan ya papatayna.”
3 Sakali in baꞌanan aꞌa inān magsuwala pabīng, suwala atanog, yuk-i,
“Sanglitantam Tuhan! Atunuꞌ daꞌira babantugun.
Patꞌbbud na paꞌin humbuna sampay ni kasaumulan.”
4 Manjari in duwampūꞌ maka mpat pagmattoꞌahan maka mpat binatang eꞌ magsujuran na, maka eꞌ sigām amudji Tuhan ya aningkōꞌ ma paningkōꞌan bangsahan. Yuk sigām,
“Amin! Sanglitantam Tuhan!”
5 Sakali aniyaꞌ takaleku suwala paluwas min tongod paningkōꞌan Tuhan, yuk-i,
“Sanglitinbi Tuhan, kaꞌam kamemon sosohoꞌanna,
sasuku kam magmatāw ma iya,
ai na ka alanga, ai na ka areyoꞌ.”
6 Puwas eꞌ aniyaꞌ takaleku saliꞌ suwala min manusiyaꞌ kumarukan hekana. Akosog toꞌongan llingna, saliꞌ lagublub boheꞌ anasahan min diyataꞌ maka saliꞌ lꞌggon landuꞌ akosog. Takaleku ya bissala sigām, yuk-i,
“Sanglitanta na Tuhan! Sanglitanta na Panghūꞌtam Tuhan
Sangat Kawasa, sabab patꞌnnaꞌna na pagparintana!
7 Subay kitam magkōg-koyag, magkalasigan toꞌongan.
Sanglitantam Tuhan
sabab taꞌabut na waktu pagkawin Bili-bili maka saga aꞌa sukuꞌna,
sapantun pangantin dꞌnda ya angari-ngarihan di-na.
8 Kabuwanan iya sꞌmmek angillap, sꞌmmek apoteꞌ toꞌongan.”
(In sꞌmmek poteꞌ itu, bang nihati, ya na kaꞌadilan bay tahinang eꞌ saga aꞌa sukuꞌ Tuhan.)
9 Sakali ahꞌlling ni aku dakayuꞌ malaꞌikat eꞌ, yukna, “Sulatun itu: aheya kahāpan sasuku sinōꞌ paluruk ni pagkawinan Bili-bili.” Sinugpatan lagiꞌ bissala malaꞌikat inān, yukna, “Kallam Tuhan koꞌ itu, kallam bꞌnnal.”
10 Magtūy aku pasujud ma atag tapeꞌ malaꞌikat inān amudji iya, sagōꞌ yukna, “Daꞌa ka pasujud ni aku. Aku itu dakayuꞌ sosohoꞌan Tuhan buwat du kaꞌa maka saga dauranakannu ya amogbogan lapal bꞌnnal bay pamataꞌu eꞌ si Isa. Tuhan sadja pudjihun. Lapal si Isa itu, ya na lapal bay pamatulun eꞌ Tuhan ni saga nabi.”
Aꞌa Anguraꞌan Kuraꞌ Poteꞌ
11 Manjari itu taꞌndaꞌku aukab sulgaꞌ, maka aniyaꞌ kuraꞌ poteꞌ. Ya anguraꞌ ma kuraꞌ inān pinagōnan si Kapangandolan maka Kasabꞌnnalan. Abontol pangahukumna maka pamonoꞌna ma palbantahanna. 12 Matana inān saliꞌ api parallet, maka aheka korona paporong ma kōkna. Aniyaꞌ ōn sinulat ma puhuꞌna sagōꞌ halam aniyaꞌ makataꞌu bang ai hatina, luwal baranna ya makataꞌu. 13 Ya juba pasꞌmmekna inān apꞌnnoꞌ eꞌ lahaꞌ, maka ya ōn pangōn iya, “Palman Tuhan”. 14 Tinurul iya eꞌ baꞌanan sundalu min sulgaꞌ. Magpanguraꞌ sigām ma saga kuraꞌ poteꞌ maka magnijuba poteꞌ isab, juba halam aniyaꞌ tamakna. 15 Ya niōnan Palman Tuhan itu, aniyaꞌ takos atalom paluwas min bowaꞌna, pangandaꞌugna ma palbangsa-bangsahan. Magbayaꞌ iya ma sigām kamemon, maka akosog kapagbayaꞌna, saliꞌ hantang tungkud basiꞌ mbal tasaggaꞌ. Sasuku angatu ma iya saliꞌ sapantun buwaꞌ anggul ya giniꞌikan ma pagpꞌggaꞌan Tuhan Sangat Kawasa, jari mulkaꞌ mbal tasipat bisana ya paluwas minnēꞌ. 16 Aniyaꞌ ōn sinulat ma jubana maka ma paꞌana, buwattitu:
SULTAN SIN KASULTANAN,
PANGHŪꞌ SIN KAPANGHŪꞌAN.
17 Manjari taꞌndaꞌku na isab dakayuꞌ malaꞌikat ma diyataꞌ langit, anꞌngge ma sinag llaw. Angalingan iya pakosog ni kamanuk-manukan kamemon ya magleyangan ma tongaꞌan ayan inān. Yuk-i, “Piꞌitu kam magsakaum ni pagjamuhan Tuhan, pagjamuhanna aheya. 18 Piꞌitu kam amangan isi patay saga kasultanan, saga jiniral maka saga kasundaluhan, sambil isi kuraꞌ maka isi aꞌa ya bay magpanguraꞌ. Amangan kam isi patay indaginis kamemon, ata maka nggaꞌi ka ata, aꞌa alanga maka aꞌa areyoꞌ.”
19 Puwas eꞌ taꞌndaꞌku sattuwa talun inān magtipun maka kasultanan min kaluhaꞌan dunya sampay kasundaluhan sigām. Inaꞌan sigām magdakayuꞌ amonoꞌ ma dangan ya anguraꞌ ma kuraꞌ poteꞌ inān, beyaꞌ isab saga sundaluna. 20 Manjari sinaggaw sattuwa talun maka nabi putingan ya kawakilan eꞌ sattuwa talun, angkan iya bay makahinang saga hinang kainu-inuhan aꞌa. Hinangna inān bay pangakkalna saga aꞌa, sasuku kasāpan maka umbul sattuwa, maka sasuku bay anumba ni taꞌu-taꞌu ya nihinang pangluwahan sattuwa dakayuꞌ. Na, in sattuwa talun maka nabi putingan inān, bay nilarukan maka kallum-llum sigām ni deyom api mailang ya magdanaw-danaw suleyabna. 21 Ati saga kasundaluhan sigām bay pinapatay maka takos ya paluwas min bowaꞌ aꞌa ya anguraꞌ inān. Pinagkakan isi patay sigām eꞌ kamanuk-manukan, sampay magꞌssohan na.