18
Magkaꞌat Daꞌira Babilon
1 Pagubus paꞌin inān, aniyaꞌ isab taꞌndaꞌku malaꞌikat saddī pareyoꞌ min sulgaꞌ. Aheya kawasana, maka sahayana inān makabuwan kasawahan ma katilibut dunya. 2 Magsuwala iya pakosog, yukna,
“Katūyan na! Magkaꞌat na Babilon, daꞌira babantugun!
Tahinang na paglahatan saga hibilis,
pagsakauman saga saitan,
pagtꞌppakan saga manuk-manuk haram, ya makasammal.
3 Babilon itu sapantun dꞌnda alaꞌat,
amidjakan bangsa aꞌa kamemon maginum binuna makalango,
tabowa-bowa sigām maghinang kahinaꞌan maka iya.
Saga pagsultanan isab, ya tag-lahat ma deyom dunya,
bay magkahinaꞌan maka iya.
Maka saga aꞌa maglilitu ma sabarang lahat,
bay magkarayahan ma sabab napsu karalaman dꞌnda itu.”
4 Sakali aniyaꞌ takaleku suwala saddī ahꞌlling min sulgaꞌ, yuk-i,
“Paluwas kam minnilu, kaꞌam sukuꞌku.
Alaꞌan kam min dꞌnda ilu.
Daꞌa kam palamud ma iya maghinang kalaꞌatan,
boꞌ kam mbal talapay ma kabinasahan ya pinatꞌnnaꞌan iya.
5 Kalnaꞌ paldusahanna magtimbun-tambak na, pabūd ni diyataꞌ langit.
Halam takalipat eꞌ Tuhan kahinanganna alaꞌat.
6 Hinangunbi ma iya buwat bay hinangna ma kaseheꞌan.
Ya panungbas ma iya subay nilipat duwa ma ai-ai bay hinangna.
Pagka tabowana saga aꞌa anginam kasabulanna,
subay isab iya pinananaman mulkaꞌ Tuhan nilipat duwa kosogna.
7 Patꞌkkahunbi ma iya kabinasahan maka karukkaꞌan.
Papagtongorunbi maka bay pagmalangkahina
maka pagdūl-bayaꞌna ma kanapsuhanna indaginis.
Hal iya magabbu ma deyom pikilanna, yuk-i,
‘Aku itu sultan makapagbayaꞌ, mbal du aku magkabalu.
Mbal du aku makananam kasusahan.’
8 Sabab min pagabbuna angkan dꞌnda itu
katumbukan balaꞌ indalupa ginis ma deyom dangꞌllaw.
Taluwaꞌ iya bonglay, kaudjulan maka gotom.
Tinunuꞌ isab iya ma deyom api,
sabab akawasa asal Panghūꞌtam Tuhan,
ya amatꞌnnaꞌan iya hukuman.”
9 Manjari saga nakuraꞌ tag-lahat ma deyom dunya, ya bay magbeyaꞌ maka dꞌnda inān maghinang kasabulan maka magdūl-bayaꞌan kanapsuhan sigām, magtangis du maka magdukka, pagꞌndaꞌ sigām humbu ya paluwas min tunuꞌ daꞌira heꞌ. 10 Inaꞌan sigām anꞌngge angꞌndaꞌ-ngꞌndaꞌ min katāhan sabab atāw talapay ma kabinasahanna. Ya pagdohon sigām, “Allā, mbal manjari! Kaliman daꞌira Babilon, kabantugna maka kakosogna. Dasasaꞌat du, kabinasahan magtūy ya pakadalanna.”
11 Ya du saga aꞌa maglilitu ma deyom dunya, magtangis isab maka magdohon pasal halam na aniyaꞌ magpamꞌlli dagangan sigām. 12 Halam aniyaꞌ amꞌlli ni sigām saga bulawan, pilak, palmata maka mussaꞌ. Halam na aniyaꞌ amꞌlli kakanaꞌ sigām ahalgaꞌ, buwat kakanaꞌ taluk, keyat, maka sutlaꞌ. Halam na aniyaꞌ amꞌlli ginisan kayu ya alahang taꞌndaꞌ eꞌ aꞌa, maka ai-ai hinangan garing maka kayu ahalgaꞌ, maka ai-ai hinangan tumbaga, basiꞌ maka batu marbol. 13 Halam isab aniyaꞌ amꞌlli saga pamapā ya dagangan sigām, saga kamanyan, laksiꞌ, maka nsꞌllan pahamut. Halam na aniyaꞌ amꞌlli saga binu, nsꞌllan jaitun,a tirigu maka buwasna. Halam na aniyaꞌ amꞌlli ni sigām saga sapiꞌ, bili-bili, kuraꞌ maka saga pameyaꞌan ya ginuyud eꞌ kuraꞌ, sampay isab saga aꞌa ya niragangan eꞌ sigām nihinang ata.
14 Yuk saga aꞌa maglilitu itu ni daꞌira Babilon, “Na, pahalam na min kaꞌa kamemon bay kanapsuhannu. Alungay na min kaꞌa pangaltaꞌnu kamemon maka kapanyapannu ahalgaꞌ. Mbal na tabaliknu saumul-umul.” 15 Saga aꞌa magdaragang, ya bay magkarayahan min pagdagang sigām ma deyom daꞌira inān, angꞌndaꞌ-ngꞌndaꞌ ma tunuꞌna min katahan sabab atāw sigām talapay ma kabinasahanna. Magtangis sigām maka magdohon, 16 yuk-i,
“Allā, mbal manjari daꞌira babantugun eꞌ.
Sapantun dꞌnda magpamakay kakanaꞌ ahalgaꞌ,
walnaꞌ taluk maka keyat, alapat isab eꞌ pamulawan,
palmata ahalgaꞌ maka mussaꞌ.
17 Dasasaꞌat du, magtūy alungay pangaltaꞌna kamemon.”
Damikiyanna isab saga nakuraꞌ ma kappal maka saga pasahero, maka saga aꞌa maghinang isab ma kappal sampay sasuku magusaha ma dilaut, angꞌndaꞌ-ngꞌndaꞌ isab ma daꞌira inān min katāhan. 18 Pagꞌndaꞌ sigām ma humbu min tunuꞌna heꞌ, magtūy sigām angolang, yuk-i, “Halam aniyaꞌ daꞌira saddī makaliyu bantugna min daꞌira Babilon inān.” 19 Magtūy sigām amusugan bagunbun ni diyataꞌ kōk sigām, tandaꞌ saksiꞌ in sigām magkarukkaꞌan na. Magtangis sigām maka magdohon, yuk-i,
“Allā, mbal manjari daꞌira babantugun eꞌ! Kaugun toꞌongan.
Ya na daꞌira pangāꞌan karaya eꞌ sasuku magkakappal
sabab aheka altaꞌ bay mahēꞌ.
Sagōꞌ dasasaꞌat du, magtūy alungay ai-aina kamemon!”
20 Kaꞌam ma deyom sulgaꞌ, magkōg-koyag kam
pagka magkaꞌat na daꞌira heꞌ.
Kaꞌam saga aꞌa sukuꞌ Tuhan, maka kaꞌam saga aꞌa kawakilan,
maka kaꞌam isāb kanabi-nabihan,
magkōg-koyag kam sabab katungbasan in daꞌira Babilon,
taluwaꞌ hukuman Tuhan ma sabab bay hinangna ma kaꞌam.
21 Na puwas eꞌ, aniyaꞌ malaꞌikat akosog amuhat batu aheya toꞌongan, saliꞌ heya batu gilingan bay awal, ati nihantakan eꞌna ni tahik. Yukna,
“Buwattinaꞌan ya kaheya paglubu ma Babilon, daꞌira babantugun,
mbal na taꞌndaꞌ pabīng sampay ni kasaumulan.
22 Kaꞌa, daꞌira Babilon, mbal na takale ma deyomannu
saga aꞌa magbiyula maka aꞌa magkalangan,
aꞌa magsoleng maka aꞌa magtiyup-tiyup.
Mbal na taꞌndaꞌ mailu aꞌa maghinang ai-ai kapandayan sigām.
Mbal na takale llub paggilingan.
23 Minsan sūꞌ palitaꞌan mbal na taꞌndaꞌ mailu.
Sampay paglami-lami pagkawin, mbal na takale.
Saga aꞌabi magdaragang bay tamakagaꞌos ma kaluhaꞌan dunya.
Kaꞌakkalan saga palbangsahan kamemon ma sabab pantaknu maka hikmatnu.
24 Katōngan dusa daꞌira Babilon itu ma sabab kapamonoꞌna
ma saga kanabi-nabihan maka saga aꞌa sukuꞌ Tuhan.
Inaꞌan ma Babilon baꞌanan bangkay sigām,
sampay saga aꞌa kamemon ya patay bonoꞌ ma deyom dunya.”