17
Dꞌnda Babantugun maka Sattuwa
1 Manjari itu aniyaꞌ pasekot ni aku dangan min saga pituꞌ malaꞌikat ya magbowa pinggan inān. Yukna ni aku, “Daiꞌ ka. Paꞌndaꞌanta ka bang buwattingga hukuman ya pinatꞌkka ni daꞌira aheya, ya ma atag kasowang-sowangan. Ya dalilna dꞌnda alaꞌat toꞌongan hinangna, dꞌnda asal babantugun. 2 Saga kanakuraꞌan tag-lahat min sakalingkal dunya bay makapagbeyaꞌ maka dꞌnda babantugun itu maghinang kahinaꞌan. Jari saga aꞌa kamemon tabowa-bowa isab ginila eꞌ hinangna, saliꞌ sapantun aꞌa nilango binu, mbal aiyaꞌ maghinang kasabulan.”
3 Sakali kapagbayaꞌan aku eꞌ Rū Tuhan ati binowa aku eꞌ malaꞌikat tudju ni lahat paslangan. Mainaꞌan paꞌin, aniyaꞌ taꞌndaꞌku dakayuꞌ dꞌnda anguraꞌ ma sattuwa talun, walnaꞌ keyat. Sattuwa inān pituꞌ kōkna maka sangpūꞌ tandukna. Alapat baranna eꞌ ōn makapangkal ni Tuhan. 4 Dꞌnda inān magbinadjuꞌ taluk maka keyat, apꞌnnoꞌ eꞌ pamulawan, palmata ahalgaꞌ maka saga mussaꞌ tipay. Aniyaꞌ bowana ma tanganna sawan bulawan apꞌnnoꞌ eꞌ kalumuꞌan maka kasabulan, luwas bay min usahana. 5 Aniyaꞌ isab ōn tasulat ma tuktukna, ōn alalom hatina. Ya na itu sulatanna:
BABILON DAꞌIRA BABANTUGUN
POꞌONAN KAPUTAHAN
POꞌONAN KALUMUꞌAN MAKA KASAMMALAN.
6 Maka taꞌndaꞌku isab in dꞌnda inān nilango eꞌ lahaꞌ bay tainumna, lahaꞌ min saga aꞌa sukuꞌ Tuhan, ya bay pinapatay ma sabab si Isa ya pamalutan sigām.
Pagꞌndaꞌku dꞌnda inān, landuꞌ takꞌbbal atayku. 7 Na, tinilaw aku eꞌ malaꞌikat, yukna, “Ai kainu-inuhannu? Pahatita na ka ma pasalan dꞌnda inān maka bang ai hatina sattuwa panguraꞌanna inān, ya pituꞌ kōkna maka sangpūꞌ tandukna. 8 Ya sattuwa talun taꞌndaꞌnu inān, bay allum tagnaꞌ, boꞌ bay amatay, maka maraiꞌ na paluwas min lowang tegob-tegoban boꞌ yampa pinapehēꞌ ni katobtobanna, pinakaꞌat. Aheya kainu-inuhan saga aꞌa maglahat ma deyom dunya, sasuku halam bay tasulat ōn sigām ma deyom kitab panulatan ōn aꞌa taga-kallum kakkal, ya bay asal tasulat ma halam giꞌ bay pinapanjari dunya. Landuꞌ sigām ainu-inu, pagꞌndaꞌ sigām ma sattuwa talun eꞌ. Bay allum, ati amatay, boꞌ palahil du pabalik.”
9 Yuk malaꞌikat giꞌ, “Ya pamahatiku buwattinaꞌan tahati du eꞌ aꞌa alalom panahuꞌanna maka pangitaꞌuna. Ya pituꞌ kōk ma sattuwa talun inān, hatina pituꞌ būd paningkōꞌan eꞌ dꞌnda alaꞌat eꞌ. Maka hatina isab pituꞌ sultan. 10 Lima sultan inān palabay na kapagsultan sigām. Dakayuꞌ inān masi magsultan ma buwattinaꞌan, maka ya kapituꞌna halam giꞌ magsultan. Bang gantaꞌ magsultan na kapituꞌna inān, daiꞌ-daiꞌ du kapagsultanna. 11 Ya sattuwa talun, bay allum boꞌ amatay, ya na inaꞌan sultan kawaluꞌna. Dambeyaꞌan asal iya maka pituꞌ sultan eꞌ, ati pinapehēꞌ iya ni katobtobanna, pinakaꞌat.
12 In sangpūꞌ tanduk taꞌndaꞌnu inān, ya na sangpūꞌ sultan saddī, halam giꞌ makapagsultan. Sigām kasangpūꞌ kabuwanan kawasa magsultan magsambeyaꞌ maka sattuwa talun, saguwāꞌ daiꞌ-daiꞌ du ya kapagsultan sigām. 13 Dakagaraꞌan kasangpūꞌ inān, ati pamuwan eꞌ sigām gaꞌosan maka kapatut sigām ma sattuwa heꞌ. 14 Manjari paꞌatubang sigām magbonoꞌ maka Bili-bili. Sagōꞌ taraꞌug sigām eꞌ Bili-bili maka saga aꞌa kapangandolanna, aꞌa bay tapeneꞌna ameyaꞌ ma iya. Mbal iya angaku daꞌug sabab in iya Panghūꞌ sin kapanghūꞌan kamemon, maka Sultan sin kasultanan kamemon.”
15 Ahꞌlling giꞌ malaꞌikat ni aku, yukna, “Bang pahatiku pasal kasowang-sowangan ya paningkōꞌan dꞌnda bay taꞌndaꞌnu inān, ya na ginisan panubuꞌ, palbangsahan, pangkatan maka pihak, sampay ginisan bahasa. 16 Sangpūꞌ tanduk isab ya taꞌndaꞌnu inān, hatina sangpūꞌ sultan. Ma sinosōng, sigām maka sattuwa talun eꞌ abꞌnsi du ma dꞌnda alaꞌat inān. Niāꞌan iya eꞌ sigām pangaltaꞌna kamemon, tinantangan ai-ai kamemon bay ma baranna. Pinagkakan eꞌ sigām isina boꞌ yampa iya tinunuꞌ. 17 Buwattēꞌ hinang sigām sabab pinapikil sigām eꞌ Tuhan angahinang kabayaꞌanna. Min kahandakna, ya angkan atayudtud kagaraꞌan sangpūꞌ sultan inān anukbalan kapatut sigām ni sattuwa talun, sampay taꞌabut atuman kamemon bay pangallam Tuhan. 18 Ya dꞌnda bay taꞌndaꞌnu,” yuk malaꞌikat, “ya na daꞌira babantugun ya magkumaꞌagi ma kasultanan ma deyom dunya.”