16
Saga Pinggan Isihan Mulkaꞌ Tuhan
1 Manjari itu, aniyaꞌ takaleku suwala atanog ahꞌlling min deyom langgal tudju ni pituꞌ malaꞌikat ya amowa pinggan inān. Yuk suwala itu, “Pehēꞌ na kam. Buꞌusinbi na ni dunya isi pituꞌ pinggan, ya apꞌnnoꞌ eꞌ mulkaꞌ Tuhan ilu.” 2 Sakali, pehēꞌ dakayuꞌ malaꞌikat amuꞌusan balaꞌ min pingganna tudju ni kareya-reyahan. Pagbuꞌus paꞌin, magtūy paluwasan saga dugsul abau maka apꞌddiꞌ saga aꞌa inān, ya bay makataimaꞌ sāp sattuwa maka anumba taꞌu-taꞌu bay hinangan pangluwahanna.
3 Puwas eꞌ ya malaꞌikat karuwana amuꞌusan balaꞌ min pingganna tudju ni dilaut. Pagbuꞌus paꞌin, magtūy tahik inān tahinang sagu, ati ai-ai bay allum ma deyom tahik amatay kamemon.
4 Manjari malaꞌikat katꞌlluna amuꞌusan na isab balaꞌ min pingganna tudju ni kasapaꞌ-sapaꞌan maka ni saga tuburan boheꞌ. Pagbuꞌus paꞌin, saga boheꞌ inān tahinang lahaꞌ. 5 Sakali takaleku bissala malaꞌikat, ya tag-ntanan ma kaboheꞌ-boheꞌan. Yukna,
“O Tuhan Mahasussi, ya mbal magkapinda min awal tagnaꞌ
sampay ni kabuwattinaꞌanan, abontol sadja hukumannu.
6 Sabab in saga aꞌa sukuꞌnu maka saga nabi
ya bay magpalatun palmannu, waꞌi bay pinapatay.
Bay pinabuꞌus lahaꞌ sigām eꞌ saga aꞌa ma deyom dunya,
angkan patut sigām pinainum lahaꞌ.
Magtongod du paꞌin hinang sigām maka tungbasna.”
7 Puwas eꞌ aniyaꞌ takaleku suwala min atag lamisahan pagkulbanan. Yuk suwala heꞌ,
“O Panghūꞌ, Tuhan Sangat Kawasa,
abontol sadja hukumannu, mbal tasoway.”
8 Puwas paꞌin eꞌ-i, ya malaꞌikat kaꞌmpatna amuꞌusan balaꞌ min pingganna tudju ni mata llaw, manjari pinakalap silak llaw min bay dahū pamahanglus saga manusiyaꞌ. 9 Na, pagka ahanglus saga aꞌa eꞌ llaw sabab kumarukan pasuꞌna, magtūy sigām magpanuknaꞌ ma ōn Tuhan ya magkabayaꞌan ma balaꞌ. Mbal sigām pataikut min dusa sigām atawa amuwan sanglit ma Tuhan.
10 Manjari binuꞌusan pingganna eꞌ malaꞌikat kalimana, pinatꞌkka balaꞌna ni paningkōꞌan sattuwa talun, ni poꞌonan pamarintahanna. Magtūy taluwaꞌ lendom katilibut lahat ya pamarintahan sattuwa heꞌ. Pinagkꞌttop eꞌ saga aꞌa dꞌllaꞌ sigām ma sabab kabisa pꞌddiꞌ. 11 Magpanuknaꞌ isab sigām ma Tuhan ya tag-sulgaꞌ, ma sabab pꞌddiꞌ maka dugsul sigām. Sagōꞌ mbal na paꞌin sigām pataikut min kahinangan alaꞌat.
12 Sakali binuꞌusan pinggan eꞌ malaꞌikat kannomna, pinatꞌkka balaꞌna ni sapaꞌ aheya ya niōnan Alpurati. Pagbuꞌus paꞌin, magtūy atigang boheꞌ sapaꞌ inān, tahinang lān palabayan saga sultan luwas min sobangan. 13 Puwas eꞌ aniyaꞌ saga saitan taꞌndaꞌku magbagala pinaka luwa ambak, tꞌllu hekana. Inaꞌan paluwas min bowaꞌ naga, min bowaꞌ sattuwa, maka min bowaꞌ nabi ya bay magpamissala puting. 14 Ya magbagala inān saga hibilis ataꞌu maghinang saga hinang makainu-inu. Manjari saga hibilis itu waꞌi pehēꞌ ni saga kasultanan ma kaluhaꞌan dunya, amowa sigām magsakaum boꞌ supaya magbonoꞌ bang taꞌabut llaw bay ginantaꞌ eꞌ Tuhan Sangat Kawasa, ya llawna makatāw-tāw.
15 Sakali angabtang Al-Masi, yukna, “Pakale kam. Patangkaw aku piꞌilu ma waktu halam tapikilbi. Kinōgan toꞌongan sasuku taꞌabutku ajaga na paꞌin maka asakap isab panꞌmmekna. Mbal iya taꞌabut ma sasangna anantang, ati halam aniyaꞌ kaiyaꞌanna minsan iya paluwas ni kahekaꞌan aꞌa.”
16 Na, tatipun eꞌ tꞌllu hibilis inān saga sultan ma kaluhaꞌan dunya, ni lahat ya niōnan Armageddon ma bahasa Hibrani.
17 Manjari itu binuꞌusan na isab pingganna eꞌ malaꞌikat kapituꞌna, pinatꞌkka ni tongaꞌan ayan. Pagbuꞌus paꞌin, magtūy aniyaꞌ suwala akosog ahꞌlling min paningkōꞌan ma deyom langgal. Yuk suwala inān, “Na! Atangbus na!” 18 Magtūy aniyaꞌ lāt maka lꞌtteꞌ maka lꞌggon maglagublub, maka aniyaꞌ linug akosog makalanduꞌ. Sangay min kaniyaꞌ manusiyaꞌ halam aniyaꞌ linug paliyu minnēꞌ kosogna. Ya na heꞌ kapuspusanna! 19 Magtūy magbꞌkkaꞌ tanaꞌ ma daꞌira abantug, aboklang tꞌllu. Magkaꞌat saga kadaꞌirahan ma sabarang lahat. Manjari nientom Babilon Babantugun eꞌ Tuhan, ati pinainum iya mulkaꞌ landuꞌ abisa, luwas min sawanna. 20 Alanyap kapūꞌ-pūꞌan kamemon. Sampay kabūd-būran, alaꞌan lullun min bay patꞌnnaꞌanna, mbal na taꞌndaꞌ. 21 Saga manusiyaꞌ inān bay katumbukan tigtigan aes min diyataꞌ langit. Ya buhat dansolag aes itu aniyaꞌ saga limampūꞌ kilu. Angkan saga aꞌa inān bay anuknaꞌan Tuhan ma sabab kabisa balaꞌ inān.