15
Pituꞌ Malaꞌikat Amowa Balaꞌ Kahinapusan
1 Manjari itu aniyaꞌ na isab taꞌndaꞌku paltandaꞌan dakayuꞌ ma diyataꞌ langit, landuꞌ makainu-inu maka makahailan. Ya taꞌndaꞌku inān pituꞌ malaꞌikat amowa pituꞌ ginis balaꞌ. Ya na heꞌ-i kahinapusan balaꞌ pamatobtob mulkaꞌ Tuhan. 2 Sakali aniyaꞌ taꞌndaꞌku mainaꞌan saliꞌ kahantang sꞌllang, landuꞌ asawa saliꞌ sawa samin, maka kalamuran api angillaw-ngillaw. Taꞌndaꞌku isab saga aꞌa bay makapangandaꞌug min sattuwa talun maka min taꞌu-taꞌu ya hinangan pangluwahanna. Halam sigām bay angaku umbul ya panganggindan ōn sattuwa heꞌ. Jari inaꞌan saga aꞌa bay angandaꞌug magpanꞌngge ma bihing sꞌllang, ya saliꞌ sawa samin. Amowa sigām biyula bay pamuwan sigām eꞌ Tuhan pakaniya-pakaniya. 3 Magkalangan sigām kalangan bay min si Musa ya sosohoꞌan Tuhan, maka kalangan min Bili-bili. Buwattitu ya lapal kalangan sigām:
“O Panghūꞌ, Tuhan Sangat Kawasa,
kawasahan kahinangannu kamemon, makainu-inu sidda.
Kaꞌa ya sultan ma palbangsa-bangsahan.
Abontol maka bꞌnnal kaniyatannu kamemon.
4 O Panghūꞌ, sai bahāꞌ mbal magmatāwan kaꞌa?
Aniyaꞌ bahāꞌ mbal magmahaldikaꞌan kaꞌa?
Kaꞌa sadja ya tunggal mahasussi,
magsakaum kamemon palbangsahan amudji kaꞌa,
sabab taꞌndaꞌ eꞌ aꞌa kamemon in kahinangannu asal adil.”
5 Puwas eꞌ taꞌndaꞌku aukab langgal ma deyom sulgaꞌ, maka taꞌndaꞌku isab Bilik Mahasussi mainaꞌan. 6 Taꞌndaꞌku isab pituꞌ malaꞌikat paluwas min deyom langgal inān, ya malaꞌikat amowa pituꞌ ginis balaꞌ. Alꞌssin pakayan sigām, makasilaw poteꞌna. Pinakambotan bulawan isab daggaha sigām. 7 Makaluwas paꞌin, na, tinoporan sigām pinggan bulawan eꞌ dakayuꞌ binatang min mpat inān. Ya pituꞌ pinggan inān apꞌnnoꞌ eꞌ mulkaꞌ Tuhan ya kakkal ni kasaumulan. 8 Manjari langgal inān apꞌnnoꞌ eꞌ humbu min haddarat Tuhan, paltandaꞌan sahayana maka kawasana, ati halam aniyaꞌ makasōd ni deyom langgal inān satꞌggol halam giꞌ aubus saga balaꞌ pituꞌ hekana ya binowa eꞌ pituꞌ malaꞌikat eꞌ.