14
Bili-bili maka saga Aꞌa Sukuꞌna
1 Puwas eꞌ angꞌndaꞌ aku pabalik ati taꞌndaꞌku ya pinagsambat Bili-bili, inaꞌan anꞌngge ma būd Siyun. Ameyaꞌ isab ma iya baꞌanan aꞌa, dahatus maka mpatpūꞌ maka mpat ngibu hekana, ya bay sinulatan tuktuk sigām maka ōn Bili-bili sampay ōn Mmaꞌna Tuhan. 2 Takaleku isab lling min deyom sulgaꞌ landuꞌ atanog, saliꞌ lagublub boheꞌ anasahan min diyataꞌ, saliꞌ kosog lꞌggon. Boꞌ aluꞌuy lling bay takaleku inān, saliꞌ tunis min aꞌa magbibiyula. 3 Na, ya aꞌa dahatus maka mpatpūꞌ maka mpat ngibu, inaꞌan mainaꞌan magpanꞌngge paꞌalop ma tingkōꞌan Tuhan maka ma mpat binatang maka ma saga pagmattoꞌahan. Magkalangan sigām kalangan bahaꞌu, kalangan mbal taꞌanad eꞌ saddī min sigām karahatus maka mpatpūꞌ maka mpat ngibu, ya bay nilꞌkkat min pangꞌntanan nakuraꞌ saitan waktu lagiꞌ sigām bay ma dunya. 4 Halam aniyaꞌ tamak ma saga aꞌa itu, saliꞌ sapantun subul asussi toꞌongan pangatayanna, aꞌa halam giꞌ bay makalabay dꞌnda. Paumpig sadja sigām ma niōnan Bili-bili piꞌingga-piꞌingga palꞌngngananna. Bay sigām nilꞌkkat eꞌ Tuhan min pangꞌntanan nakuraꞌ saitan waktu sigām lagiꞌ ma dunya, ati sigām ya makarahū pinasukuꞌ ma Tuhan maka ma Bili-bili. 5 Halam aniyaꞌ kaputingan atawa tamak sigām.
Tꞌllu Malaꞌikat
6 Puwas eꞌ makaꞌndaꞌ aku malaꞌikat dakayuꞌ paleyang ma diyataꞌ ayan, maka eꞌna amowa lapal ahāp ya mbal magkapinda ni kasaumulan. Pinasaplag eꞌna ni aꞌa kamemon ma dunya, ni lahat kamemon, ni bangsa kamemon, ni bahasa kamemon, maka ni pihak kamemon. 7 Sakali magsuwala malaꞌikat eꞌ. Atanog suwalana, yuk-i, “Katāwinbi Tuhan, mahaldikaꞌunbi, sabab taꞌabut na waktu pangahukumna ma manusiyaꞌ kamemon. Pudjihunbi na iya, ya bay amapanjari langit maka dunya, sꞌllang maka tuburan boheꞌ kamemon.”
8 Na, aniyaꞌ paturul malaꞌikat saddī magsuwala isab. Yukna, “Magkaꞌat na, magkaꞌat toꞌongan na daꞌira Babilon, ya daꞌira binabantug inān. Sapantun iya dꞌnda alaꞌat bay amowa-mowa bangsa kamemon maginum binuna makalango, hatina tabowa maghinang kabaꞌisan.”
9 Puwas eꞌ paturul isab malaꞌikat saddī, katꞌlluna na. Atanog isab eꞌna magsuwala, yukna, “Sasuku amudji sattuwa maka taꞌu-taꞌuna, maka sasuku bay makataimaꞌ sāp sattuwa ma tuktukna atawa ma tanganna, 10 pinananaman mulkaꞌ Tuhan. In mulkaꞌ itu saliꞌ hantang binu halam aniyaꞌ lamudna, ya tinumpahan ni deyom Sawan Mulkaꞌ Tuhan. Ahoꞌ, sasuku amudji sattuwa inān pinapꞌddiꞌan toꞌongan ma deyom api maka mailang asuleyab, ma pangꞌndaꞌ saga malaꞌikat sussi maka Bili-bili. 11 Aniyaꞌ humbu patꞌbbud na paꞌin min api paminasahan inān, sampay ni kasaumulan. Llaw-sangom halam aniyaꞌ halian pagsandal saga aꞌa ya bay anumba ni sattuwa maka taꞌu-taꞌuna, atawa sai-sai bay kasāpan maka ōn sattuwa.” 12 Angkan koꞌ kaꞌam sukuꞌ Tuhan ilu, ya ameyaꞌ ma panohoꞌan Tuhan sampay amogbogan si Isa, pahogotunbi imanbi.
13 Sakali makakale aku suwala min deyom sulgaꞌ, yukna, “Sulatun na: puwas min llaw itu aheya du kakōganna sasuku amatay ma deyoman Panghūꞌ Isa.”
Magtūy anambag Rū Tuhan, yukna, “Ahoꞌ, tantu du sigām magkōg-koyag. Pahali sigām min bay pagsangsāꞌan sigām, sabab paddas na ma sigām ya kamaujuran ma bay kahinangan sigām ahāp.”
Dalil Kapagani ma Dunya
14 Manjari angꞌndaꞌ aku pabalik ati aniyaꞌ taꞌndaꞌku gabun poteꞌ, maka aniyaꞌ aningkōꞌ mainaꞌan saliꞌ angaluwa manusiyaꞌ. Aniyaꞌ korona bulawan pamaporong kōkna, maka aniyaꞌ sanggot atalom ma tanganna. 15 Sakali aniyaꞌ giꞌ malaꞌikat saddī bay paluwas min deyom langgal inān, ati angalingan pakosog ni iya ya aningkōꞌ ma diyataꞌ gabun eꞌ. Yuk-i, “Gunahun na sanggotnu ilu. Magani na ka, sabab taꞌabut na musim kapagani ma dunya. In dunya inān saliꞌ dalil huma ajatu na buwaꞌna.” 16 Manjari ya malaꞌikat bay aningkōꞌ ma diyataꞌ gabun inān waꞌi angalabaran sanggotna ni dunya boꞌ pinagani eꞌna kamemon.
17 Sakali aniyaꞌ isab taꞌndaꞌku malaꞌikat saddī luwas bay min langgal ma deyom sulgaꞌ, amowa isab sanggot atalom. 18 Maka aniyaꞌ giꞌ isab malaꞌikat saddī, malaꞌikat tungguꞌ api, paluwas min tongod lamisahan pagtugtugan kamanyan ni Tuhan. Angalingan pakosog malaꞌikat itu ni malaꞌikat ya amowa sanggot atalom eꞌ, yukna, “Gunahun na sanggotnu ilu pananggot buwaꞌ anggul ma dunya sabab atahak na. Sanggotun na saga tundunanna min bahanna.” 19 Magtūy ya malaꞌikat taga-sanggot eꞌ bay angalabaran sanggotna ni dunya. Tinipun eꞌna buwaꞌ anggul inān boꞌ yampa larukanna ni deyom pagpꞌggaꞌan aheya, ya pangisihan mulkaꞌ Tuhan. 20 Jari pinꞌggaꞌ baꞌanan anggul inān ma pagpꞌggaꞌan ma luwasan daꞌira. Pagpꞌggaꞌ paꞌin, lahaꞌ ya paluwas angandunuk ni katāhan saga tꞌllu hatus kilometro. Ati lalomna dandꞌppa maka tongaꞌ.