13
Duwa Sattuwa
1 Manjari itu, aniyaꞌ taꞌndaꞌku saliꞌ sattuwa paluwas min tahik. Sattuwa itu pituꞌ kōkna maka sangpūꞌ tandukna, boꞌ tandukna heꞌ bay sinangonan korona pakaniya-pakaniya. Kōkna kapituꞌ inān bay sinulatan ōn sidda alaꞌat, ōn pangkal ni Tuhan. 2 Ya sattuwa taꞌndaꞌku itu saliꞌ luwa halimaw bꞌttikan, tapeꞌna saliꞌ tapeꞌ sattuwa baruwang, maka bowaꞌna saliꞌ bowaꞌ halimaw. Sattuwa itu bay kawakilan eꞌ naga, kabuwanan barakatna luggiyaꞌ maka kapagsultanna maka kapatutna akosog. 3 Dakayuꞌ kōk sattuwa itu bay nilagut ma katubaganna, sagōꞌ kauliꞌan bay bakatna arak makapatay heꞌ, angkan takuddat saga aꞌa kamemon ma dunya. Jari ameyaꞌ sigām ma sattuwa itu. 4 Pasumba kamemon saga aꞌa ma naga inān sabab in iya bay amuwan kapatutna ma sattuwa. Sinumba isab sattuwa eꞌ sigām maka eꞌ sigām ahꞌlling, yuk-i, “Sattuwa itu halam aniyaꞌ saliꞌna! Halam aniyaꞌ makaꞌatuhan iya!”
5 Manjari in sattuwa itu pinarūl magbayaꞌ ma dunya ma deyom mpatpūꞌ maka duwambulan. Pinasagaran isab iya magmalangkahi sampay amahꞌlling pangkal ni Tuhan. 6 Pinabangaꞌ eꞌna bowaꞌna anuknaꞌan Tuhan maka ōnna maka pajātanna, maka sasuku maglahat ma deyom sulgaꞌ. 7 Pinasagaran isab sattuwa itu amonoꞌ saga aꞌa sukuꞌ Tuhan sampay sigām taraꞌug eꞌna. Binuwanan iya kapatut magbayaꞌ ma panubuꞌ kamemon, ma pihak kamemon, ma bahasa kamemon, sampay ma bangsa kamemon. 8 Ma sinosōng in sattuwa itu pinudji eꞌ aꞌa kamemon maglahat ma deyom dunya, sasuku halam tasulat ōnna ma kitab ya palsukuꞌan Bili-bili. Sangay min waktu kapamapanjari dunya, tasulat asal ma kitab inān ōn saga aꞌa ya taga-kallum kakkal.
9 Na, sasuku kam taga-tainga, asipunbi itu-i:
10 Bang aꞌa pinakadalan sinaggaw, tantu du iya sinaggaw.
Bang kadalna patay lagut, tantu du iya amatay eꞌ lagut.
Angkan kaꞌam saga aꞌa sukuꞌ Tuhan, subay kam pasandal maka subay pahogotbi imanbi.
11 Manjari aniyaꞌ na isab taꞌndaꞌku sattuwa dakayuꞌ, luwas bay min deyom tanaꞌ. Aniyaꞌ duwa tandukna arikiꞌ pinaka luwa tanduk bili-bili, sagōꞌ suwalana inān saliꞌ lling naga. 12 Sattuwa damuli itu bay kawakilan eꞌ sattuwa tagnaꞌ, ya bay kauliꞌan bakatna makatubag eꞌ, angkan pinagguna eꞌ sattuwa damuli in kapatut aheya ya bay min sattuwa tagnaꞌ. Pinissokoꞌ aꞌa kamemon ma dunya eꞌ sattuwa damuli itu, sinōꞌ pasumba ma sattuwa dahū inān. 13 Tahinang isab eꞌ sattuwa damuli itu hinang makainu-inuhan aꞌa. Bay sohoꞌna api pareyoꞌ min diyataꞌ langit tudju ni dunya ma pangꞌndaꞌan aꞌa kamemon. 14 Kaꞌakkalan eꞌna saga aꞌa kamemon ma deyom dunya. Tabowa-bowa sigām sabab hinang makainu-inu ya tahinangna deyoꞌ bay min sattuwa dahū ya pagantiꞌanna. Jari in sattuwa damuli itu bay magpanohoꞌan ma aꞌa kamemon, sinōꞌ sigām angahinang taꞌu-taꞌu pangahulmat sattuwa ya bay nilagut maka kalis eꞌ, sagōꞌ masi allum. 15 Kabuwanan isab kawasa sattuwa damuli itu amuwan napas ma taꞌu-taꞌu, ya nihinang saliꞌ pangluwahan sattuwa dahū. Manjari allum taꞌu-taꞌu itu, angkan makapamūng na, anohoꞌ subay pinapatay sasuku mbal anumba iya. 16 Bay pinissokoꞌ eꞌna aꞌa kamemon subay sināpan ma tangan sigām kowan maka ma tuktuk sigām. Pinagsaliꞌ-saliꞌ kamemon, alanga maka areyoꞌ, miskin maka dayahan, ata maka nggaꞌi ka. 17 Sai-sai halam taga-sāp mbal makajari amꞌlli atawa amabꞌlli. Sāp inān, ya na ōn sattuwa atawa umbul gantiꞌ ōnna.
18 Ahunit umbul itu nihati. Sagōꞌ sai-sai atahaꞌ nahuꞌna makataliꞌ du bang ai hatina umbul sattuwa itu, sabab ōn aꞌa koꞌ heꞌ. Umbulna itu nnom hatus maka nnompūꞌ maka nnom.