12
Dꞌnda maka Naga
1 Manjari itu aniyaꞌ taꞌndaꞌku paltandaꞌan landuꞌ makainu-inu palahil ma bꞌttong langit. Aniyaꞌ inān dakayuꞌ dꞌnda anꞌngge ma bulan, ya pasꞌmmekna saliꞌ sinag llaw. Ya paporong ma kōkna sangpūꞌ maka duwa bituꞌun. 2 Dꞌnda itu araiꞌ na anganak. Tꞌkkahan iya pꞌddiꞌ angkan iya angolang.
3 Puwas eꞌ aniyaꞌ paltandaꞌan makainu-inu saddī palahil ma bꞌttong langit. Taꞌndaꞌku dakayuꞌ naga keyat landuꞌ aheya, pituꞌ kōkna, sangpūꞌ tandukna. Kōkna kapituꞌ inān taga-korona. 4 Sakali itu, in togel naga itu bay angalappet saga bituꞌun, dabahagiꞌ min bahagiꞌ tꞌllu, boꞌ nihantakan eꞌna min bꞌttong langit pareyoꞌ ni dunya. Anꞌngge iya ma dahuan dꞌnda ya song anganak eꞌ, supaya lꞌkkobna ondeꞌ-ondeꞌ bang makaluwas na. 5 Manjari dꞌnda inān anganak lꞌlla sagōꞌ halam taꞌabut eꞌ naga sabab niragtuꞌ minnēꞌ boꞌ tinandanan ni Tuhan ma paningkōꞌanna bangsahan. Ya panganggantaꞌ asal ma ondeꞌ inān in iya subay magbayaꞌ ma palbangsa-bangsahan kamemon ma sinosōng, maka akosog kapagbayaꞌna, saliꞌ hantang tungkud basiꞌ mbal tasaggaꞌ. 6 Na, taragtuꞌ paꞌin ondeꞌ heꞌ, magtūy alahi dꞌnda inān ni lahat halam aꞌana, lahat bay tinagamahan iya eꞌ Tuhan. Mainaꞌan iya niussap ma deyom dangibu maka duwa hatus maka nnompūꞌ llaw.
7 Sakali aniyaꞌ pagbonoꞌ ma deyom sulgaꞌ. Disi Mikaꞌil maka saga malaꞌikat ma deyoꞌanna bay magbonoꞌ maka naga. Angatu isab naga inān maka saga panendogna, 8 sagōꞌ mbal makagaꞌos angkan pinalaꞌan min bay tongod sigām ma deyom sulgaꞌ. 9 Ya naga aheya bay nilarukan paluwas min sulgaꞌ. Ya na heꞌ sowa bay awal, ya niōnan hibilis atawa nakuraꞌ saitan. Angakkal asal iya ma manusiyaꞌ kamemon. Nihantakan iya pareyoꞌ ni dunya, sampay panendogna kamemon.
10 Puwas eꞌ, aniyaꞌ takaleku suwala akosog ahꞌlling min deyom sulgaꞌ, yukna,
“Taꞌabut na waktu kapangalappas Tuhan ma manusiyaꞌ.
Pinaꞌndaꞌan na eꞌ Tuhan ya kosog kapagparintana.
Pinaꞌndaꞌan na isab kapatut Al-Masi ya tapeneꞌna.
Sabab nakuraꞌ saitan bay anuntutan danakantam llaw-sangom
ma alopan Tuhan, inaꞌan na bay nilarukan paluwas min sulgaꞌ.
11 Taraꞌug na iya eꞌ dauranakantam sabab min lahaꞌ si Isa, ya niōnan Bili-bili,
maka min panduꞌ bꞌnnal ya pamatanyag sigām.
Lāgi pinaglillaꞌ eꞌ sigām ginhawa-baran sigām sampay ni kamatay.
12 Kaꞌam maglahat ma deyom sulgaꞌ ilu, magkōg-koyag kam.
Makaꞌaseꞌ-aseꞌ kaꞌam maglahat ma dunya, ma gintanaꞌan maka ma tahik,
sabab ilu nakuraꞌ saitan paruwaꞌi ni kaꞌam.
Kumarukan toꞌongan pasuꞌ atayna,
sabab kataꞌuwanna in gantaꞌanna song na taꞌabut.”
13 Sakali itu, tataꞌu paꞌin eꞌ naga in iya bay nihantakan ni dunya, magtūy turulna dꞌnda ya bay anganakan lꞌlla inān. 14 Sagōꞌ dꞌnda itu bay kabuwanan duwa pikpik belleꞌ aheya boꞌ makaleyang tudju ni lahat halam aꞌana, ya bay tinagamahan iya. Ati mainaꞌan iya niussap ma deyom tꞌlluntahun maka tongaꞌ boꞌ supaya mbal taꞌabut eꞌ sowa, hatina eꞌ naga inān. 15 Jari aniyaꞌ boheꞌ alandos bay sinulapputan eꞌ naga inān min deyom bowaꞌna boꞌ supaya nirunukan dꞌnda inān sampay talaran. 16 Daipara tinabang iya eꞌ tanaꞌ. Waꞌi palowang tanaꞌ ati in boheꞌ bay min bowaꞌ naga inān hal pahūs ni deyom lowang. 17 Na, minnēꞌ mbal takoleꞌ-koleꞌ pasuꞌ atay naga inān tudju ni dꞌnda, angkan iya angangut anguntarahan saga anak-mpu dꞌnda inān kaseheꞌan, sasuku ameyaꞌ ma panohoꞌan Tuhan sampay amogbogan panduꞌ bꞌnnal bay min si Isa. 18 Manjari pehēꞌ naga inān anꞌngge ma bihing tampe.