11
Duwangan Saksiꞌ
1 Manjari itu kabuwanan aku batang kayu pagsukuran, ati sinohoꞌ aku anukud. Yuk panohoꞌan eꞌ, “Pehēꞌ ka, sukurun langgal Tuhan sampay pagkukulbanan. Itungun bang pila jamaꞌa ya angarap ni Tuhan mainaꞌan. 2 Sagōꞌ daꞌa lapayun halaman ma katilibut langgal inān. Daꞌa sukurun heꞌ-i sabab pamasukuꞌ ma saga aꞌa nggaꞌi ka sukuꞌ Tuhan. Nilumuꞌ daꞌira sussi eꞌ sigām ma deyom mpatpūꞌ maka duwambulan. 3 Sōꞌku duwangan saksiꞌku pinaꞌan,” yukna. “Magpamakay sigā sꞌmmek karut, ati pinasaplag eꞌ sigā lapal Tuhan ma deyom dangibu maka duwa hatus maka nnompūꞌ llaw.”
4 Na, in duwa saksiꞌ itua, ya na duwa kayu jaitun maka duwa palitaꞌan anꞌngge ma dahuan Panghūꞌ ya tag-sukuꞌan dunya. 5 Bang aniyaꞌ gantaꞌ pasulay angalaꞌugan saga saksiꞌ itu, aniyaꞌ api pasulapput min bowaꞌ sigā amakaꞌat saga banta sigā. Angkan tantu amatay sai-sai anawakkal anganjahulakaꞌan duwangan itu. 6 Aniyaꞌ isab kapatut sigā anambolan langit boꞌ supaya mbal angulan satꞌggol sigā masi magpasaplag lapal Tuhan. Taga-kapatut isab sigā magbayaꞌ ma tuburan boheꞌ, pinapinda ni lahaꞌ. Maka aniyaꞌ isab kapatut sigā amatꞌkka balaꞌ kaginisan ni dunya, sumiyan-sumiyan ya kabayaꞌan sigā.
7 Na, bang aubus na eꞌ duwangan saksiꞌ itu magpasaplag lapal Tuhan, nirugpakan du sigā eꞌ dakayuꞌ sattuwa makatāw-tāw, ya paluwas min deyom lowang tegob-tegoban. Taraꞌug eꞌna duwangan itu, pinapatay. 8 Jari patay sigā pinasagaran pahantal ma paglabayan ma deyom daꞌira binabantug inān, daꞌira bay pangalansangan Panghūꞌ sigā ni hāg. Ya pangōn daꞌira inān Sodom maka Misil, boꞌ nggaꞌi ka heꞌ dī ōnna. Tuꞌud ōn pamaralil sadja. 9 Ma deyom tꞌllungꞌllaw maka tongaꞌ in patay duwangan saksiꞌ itu niaroꞌ-aroꞌan na paꞌin eꞌ baꞌanan aꞌa min panubuꞌ kamemon, min bangsa kamemon, min bahasa kamemon, maka min lahat kamemon. Saguwāꞌ mbal toꞌongan amakubul saga aꞌa angaroꞌ-ngaroꞌ inān. 10 Na, kinōgan du sidda saga aꞌa ma sakalingkal dunya ma sabab kamatay duwangan itu. Magkalamihan sigām sampay maghulmat-hiyulmati dangan maka dangan, sabab in duwa nabi itu bay amaniyaꞌ kabinasahan ni saga aꞌa patꞌnnaꞌ ma dunya.
11 Saguwāꞌ, palabay paꞌin tꞌllungꞌllaw maka tongaꞌ min bay kamatay duwangan itu, magtūy pinabatuk nyawa sigā pabīng eꞌ Tuhan, binuwanan kallum pabalik. Magtūy sigā pabungkal, ati sasuku makaꞌndaꞌ ma sigā landuꞌ toꞌongan tināw. 12 Puwas eꞌ aniyaꞌ takale eꞌ duwangan nabi itu suwala atanog amissala ni sigā min deyom sulgaꞌ, yuk-i, “Pariyataꞌ kam piꞌitu.” Magtūy sigā pariyataꞌ ni sulgaꞌ min deyom gabun ma sabu banta sigā angꞌndaꞌ-ngꞌndaꞌ.
13 Saltaꞌ kapariyataꞌ sigā, saruꞌun-duꞌun aniyaꞌ linug akosog makalanduꞌ. Alubu dabahagiꞌ min bahagiꞌ sangpūꞌ ma daꞌira inān. Aniyaꞌ pituꞌ ngibu aꞌa amatay eꞌ linug. Sakali saga aꞌa ya takapin allum inān sinōd tāw sidda, angkan sigām bay amuwan sanglit ma Tuhan ya ma deyom sulgaꞌ.
14 Na, palabay na balaꞌ karuwana sagōꞌ araiꞌ na balaꞌ katꞌlluna.
Pinahꞌlling Tiyup-tiyup Kapituꞌ
15 Na, ya malaꞌikat katapusan amahꞌlling na tiyup-tiyupna. Magtūy aniyaꞌ saga suwala atanog takale min deyom sulgaꞌ, yuk-i, “In dunya itu kapagparintahan na eꞌ Panghūꞌtam Tuhan maka Al-Masi ya tapeneꞌna. Taptap kapagparintana sampay ni kasaumulan!” 16 Manjari in duwampūꞌ maka mpat pagmattoꞌahan, ya magtingkōꞌan asal ma alopan Tuhan, pasujud magpamudji iya, 17 yuk-i,
“O Tuhan Panghūꞌ kami Sangat Kawasa,
kakkal ka asal min awal sampay ni kabuwattituhan.
Aheya pagsukulan kami sabab ginuna eꞌnu kawasanu
boꞌ ka anagnaꞌ magparinta ma dunya.
18 Bay akagit atay saga palbangsahan patigaggahun,
ati taꞌabut na waktu kapangamulkaꞌnu sigām,
waktu pangahukumnu ma saga aꞌa magpatayan,
waktu kapanungbasnu ma saga kanabi-nabihan ya sosohoꞌannu,
sampay aꞌa sukuꞌnu kamemon maka sasuku magaddat ma ōnnu,
ai na ka alanga, ai na ka areyoꞌ,
waktu isab kapamakaꞌatnu saga aꞌa bay amakaꞌat dunya itu.”
19 Sakali niukab na langgal Tuhan ma sulgaꞌ ati taꞌndaꞌku mainaꞌan baꞌul pangisihan kapagsulutan Tuhan maka saga aꞌa sukuꞌna. Aniyaꞌ inān singlab lāt, maka lꞌggon maglagublub, maka linug, maka aniyaꞌ tigtigan aes parugpak min diyataꞌ.