10
Malaꞌikat maka Gulungan Katas Arikiꞌ
1 Manjari aniyaꞌ na isab dakayuꞌ malaꞌikat akosog taꞌndaꞌku pareyoꞌ min sulgaꞌ tudju ni dunya, paputus ma gabun. Aniyaꞌ biradalia palengkong min diyataꞌ kōkna, ati baihuꞌna magsinag saliꞌ mata llaw. Ya bꞌttisna inān saliꞌ hāg arokot. 2 Aniyaꞌ ntananna gulungan katas arikiꞌ pabꞌllat. Tapeꞌna kowan bay pinatꞌppak ni diyataꞌ tahik, ati tapeꞌna gibang pinatꞌppak ni gintanaꞌan. 3 Sakali angalingan pakosog malaꞌikat itu, saliꞌ pamanggohongb pakosog min bowaꞌ halimaw. Paglinganna itu, na, sinambag iya eꞌ pituꞌ lꞌggon angalagublub. 4 Paglagublub itu, arak sulatku bay lapal lꞌggon eꞌ, sagōꞌ aniyaꞌ takaleku suwala min deyom sulgaꞌ anagang aku, yuk-i, “Daꞌa sulatun ya pagkallam eꞌ pituꞌ lꞌggon ilu. Kuli-kulihun sadja.”
5 Manjari in malaꞌikat ya bay taꞌndaꞌku anꞌngge ma tahik maka ma gintanaꞌan, bay anayang tanganna kowan tudju ni langit 6 maka eꞌna anibahat. Ya panibahatanna ōn Tuhan kakkal, ya bay amapanjari langit maka kakayaꞌ-kayaꞌanna sampay dunya itu deya-dilaut maka kakayaꞌ-kayaꞌanna isab. Yuk sibahatna, “Pinalanjal na, mbal na patanggu. 7 Sagōꞌ taꞌabut paꞌin saga llaw song pinahꞌlling tiyup-tiyup eꞌ malaꞌikat kapituꞌna, atuman kagaraꞌan Tuhan ya bay ma deyom sipuk. Tahinang buwat bay pamataꞌuna ma saga sosohoꞌanna, hatina ma kanabi-nabihan.”
8 Puwas eꞌ amissala ni aku pabīng ya suwala bay takaleku ahꞌlling min deyom sulgaꞌ, yuk-i, “Pehēꞌ ka, ngāꞌun katas pabꞌllat min tangan malaꞌikat ya anꞌngge ma tahik sampay ma gintanaꞌan inān.”
9 Na, pehēꞌ aku ni malaꞌikat angamuꞌ gulungan katas arikiꞌ. Yukna ni aku, “Ā, ngāꞌun na, kakanun. Tananamnu du koꞌ ilu, amamis saliꞌ gulaꞌ buwani ma deyom bowaꞌnu, sagōꞌ alꞌssom ma deyom bꞌttongnu.” 10 Ngāꞌku gulungan katas arikiꞌ min tangan malaꞌikat inān boꞌ yampa kakanku. Pagkakanku magtūy amamis saliꞌ gulaꞌ buwani, sagōꞌ pagtꞌllonku, alꞌssom ma deyom bꞌttongku. 11 Manjari aniyaꞌ amissala ni aku, yukna, “Subay paluwasnu lapal Tuhan pabīng pasal ya song pinatꞌkka ni kabangsa-bangsahan, ni kapanubuꞌan, ni bahasa kaginisan, sampay ni baꞌanan kasultanan sigām.”