9
1 Manjari ya malaꞌikat kalimana bay amahꞌlling tiyup-tiyupna, ati aniyaꞌ taꞌndaꞌku saliꞌ bituꞌun bay ahūg ni dunya min diyataꞌ langit. Bituꞌun itu bay kabuwanan kunsiꞌ pangukab tambol lowang tegob-tegoban. 2 Pagukabna paꞌin lowang inān, magtūy aniyaꞌ humbu anꞌbbud min deyomna, saliꞌ humbu min tunuꞌ aheya. Jari kalendoman llaw maka langit eꞌ humbu inān. 3 Aniyaꞌ baꞌanan ampan patꞌppak ni dunya luwas bay min deyom humbu, kabuwanan kapatut angeket, buwat jalalangking. 4 Sinōꞌ sigām daꞌa amakaꞌat kaparang-parangan atawa kakayu-kayuhan atawa ai-ai patomoꞌ ma babaw dunya. Luwal saga aꞌa halam bay kasāpan tuktuk sigām maka sāp Tuhan ya makajari minula eꞌ saga ampan inān. 5 Malaingkan mbal sigām pinarūl amapatay. In manusiyaꞌ inān subay pinapꞌddiꞌan sadja ma deyom limambulan. Ya nanam pꞌddiꞌ kalabayan saga aꞌa inān saliꞌ maka pꞌddiꞌ keket jalalangking. 6 Na, ma deyom limambulan parahing na paꞌin saga aꞌa kineket itu bang paꞌin sigām amatay, sagōꞌ mbal tinugutan amatay. Bilahi toꞌongan sigām amatay sagōꞌ mbal nirūlan.
7 Ya pangluwahan saga ampan inān saliꞌ hantang kuraꞌ pinanyapan song panguraꞌan ni pagbonoꞌan. Aniyaꞌ saliꞌ korona bulawan paporong ma kōk sigām, maka pamaihuꞌan sigām saliꞌ manusiyaꞌ. 8 Buꞌun sigām atahaꞌ saliꞌ buꞌun dꞌnda, maka empon sigām saliꞌ taling sattuwa halimaw. 9 Daggaha sigām tinamingan maka sisik saliꞌ luwa basiꞌ. Angꞌllub isab pikpik sigām bang pajabjab, saliꞌ tagandak baꞌanan kuraꞌ angangguyud saga kalesa bang parugpak ni pagbonoꞌan. 10 Togel sigām saliꞌ togel jalalangking, taga-tugsuk ma tōngna. Ya inaꞌan paminasa sigām ma manusiyaꞌ ma deyom limambulan. 11 Aniyaꞌ isab sultan magagi ma sigām, ya na dakayuꞌ saitan tag-ntanan lowang tegob-tegoban inān. Ōn tag-ntanan inān, bang ma bahasa Hibrani, si Abaddon. Bang ma bahasa Girīk, si Apolyon, hatina Pamamakaꞌat.
12 Na, minnēꞌ patobtob na balaꞌ ya dahū pinatꞌkka, sagōꞌ masi giꞌ duwa balaꞌ damuli.
13 Manjari malaꞌikat kannomna bay amahꞌlling tiyup-tiyupna ati makakale aku suwala paluwas min mpat dugu lamisahan bulawan ya pagtugtugan kamanyan, ya mainaꞌan ma alopan Tuhan. 14 Buwattitu ya lapal suwala inān, yukna, “Hubarin na mpat saitan ya bay niengkotan ma bihing sapaꞌ Alpurati heꞌ.” 15 Saga saitan inān bay pinasakap asal sagōꞌ halam sigām bay nihubaran. Subay na taꞌabut waktuna toꞌongan, llawna maka bulanna maka tahunna, boꞌ yampa sigām pinaluwas amapatay baꞌanan manusiyaꞌ, dabahagiꞌ min bahagiꞌ tꞌllu ma sigām kamemon. 16 Kahakaꞌan aku bang pila sundalu ma deyoꞌan mpat saitan eꞌ, aꞌa magpanguraꞌ lullun. Duwampūꞌ ngibu laksaꞌ konoꞌ ya heka sigām.
17 Buwattitu ya pangluwahan saga kuraꞌ bay taꞌndaꞌku, maka saga sundalu magpanguraꞌ inān. Ya daggaha sigām bay tinampanan maka taming magwalnaꞌ keyat api maka bilu alutuꞌ maka saliꞌ biyaning mailang. Ya kōk kuraꞌ inān angaluwa halimaw, ya bowaꞌ sigām paluwasan api maka humbu maka mailang arokot. 18 Jari amatay in binangsa manusiyaꞌ, dabahagiꞌ min bahagiꞌ tꞌllu. Ya makapatay inān tꞌllu ginis balaꞌ bay paluwas min bowaꞌ saga kuraꞌ, hatina api maka humbu maka mailang arokot. 19 Aniyaꞌ duwa balaꞌ pamapatay saga kuraꞌ inān ma manusiyaꞌ. Kaissana, ya balaꞌ paluwas min bowaꞌ sigām. Karuwana, ya balaꞌ ma togel sigām, sabab togel sigām inān saliꞌ sowa taga-kōk pangamula ma manusiyaꞌ.
20 Malaingkan saga manusiyaꞌ takapin, ya halam bay amatay eꞌ balaꞌ inān, mbal toꞌongan pataikut min taꞌu-taꞌu pagtutuhanan sigām. Mbal sigām pahali anumba ni saga saitan sampay ni taꞌu-taꞌu mbal makaꞌndaꞌ, mbal makakale, maka mbal makalꞌngngan, ya bay hinangan bulawan, pilak, tumbaga, batu maka kayu. 21 Mbal sigām papinda min kahinangan alaꞌat. Masi-masi sigām magpamonoꞌ sampay amantak ni pagkahi sigām. Mbal sigām pahali maghinang kasabulan dꞌnda maka lꞌlla, sampay magtangkaw.