8
Gindan Kapituꞌna
1 Manjari itu, apuwas paꞌin eꞌ Bili-bili amitas gindan kapituꞌna min gulungan katas inān, magtūy halam aniyaꞌ minsan bahꞌssek ma deyom sulgaꞌ ma deyom saga tongaꞌ jām. 2 Puwas eꞌ taꞌndaꞌku pituꞌ malaꞌikat anꞌngge ma haddarat Tuhan, ati tinoporan sigām tiyup-tiyup pakaniya-pakaniya.
3 Sakali aniyaꞌ malaꞌikat dakayuꞌ pinaꞌan anꞌngge ma atag pagkukulbanan, maka eꞌna amowa tugtugan bulawan. Aheka kamanyan bay pamuwan ma iya pamasimbugna ni saga duwaꞌa ya pangamuꞌ-ngamuꞌ eꞌ kamemon saga aꞌa sukuꞌ Tuhan. Ati tinukbal eꞌ malaꞌikat mainaꞌan ma lamisahan bulawan ya ma dahuan tingkōꞌan Tuhan. 4 Jari in humbu kamanyan maka pangamuꞌ-ngamuꞌ saga aꞌa sukuꞌ Tuhan, waꞌi patꞌbbud pariyataꞌ min tangan malaꞌikat eꞌ. 5 Sakali, niāꞌ tugtugan eꞌ malaꞌikat itu. Pinꞌnnoꞌan eꞌna maka baga api min diyataꞌ lamisahan inān boꞌ yampa nilarukan ni dunya. Paglaruk itu, magtūy aniyaꞌ lꞌggon maglagublub, maka lꞌtteꞌ, maka lāt aninglab. Aniyaꞌ isab linug anganjogjog deyom dunya.
Pinahꞌlling Tiyup-tiyup
6 Manjari in pituꞌ malaꞌikat, ya amowa pituꞌ tiyup-tiyup inān, sakap na song amahꞌlling.
7 Ya malaꞌikat dakayuꞌ inān amahꞌlling na tiyup-tiyupna. Magtūy aniyaꞌ tigtigan aes maka api bay pinatumbuk ni dunya maglamud maka lahaꞌ. Minnēꞌ atunuꞌ dunya, dabahagiꞌ min bahagiꞌ tꞌllu. Talapay saga kakayu-kayuhan dabahagiꞌ isab min bahagiꞌ tꞌllu, maka atunuꞌ isab kaparang-parangan kamemon ma dunya.
8 Puwas eꞌ ya malaꞌikat karuwana inān amahꞌlling na isab tiyup-tiyupna. Sakali aniyaꞌ api akompol buwat heya būd waꞌi pinatumbuk ni deyom tahik. Paglaruk paꞌin itu, magtūy dabahagiꞌ min bahagiꞌ tꞌllu ma katahikan inān tahinang lahaꞌ. 9 Amatay magtūy dabahagiꞌ min bahagiꞌ tꞌllu ya ai-ai bay allum ma deyom tahik. Magkaꞌat isab dabahagiꞌ min bahagiꞌ tꞌllu ya sasuku tabayan ma kuwit tahik inān.
10 Puwas eꞌ ya malaꞌikat katꞌlluna amahꞌlling na isab tiyup-tiyupna. Sakali aniyaꞌ bituꞌun aheya amagaꞌ-magaꞌ saliꞌ suwariyan, waꞌi pinatumbuk min bꞌttong langit tudju ni kasapaꞌ-sapaꞌan maka ni tuburan boheꞌ, dabahagiꞌ isab min bahagiꞌ tꞌllu. 11 Bituꞌun inān niōnan “Paꞌit” sabab ya boheꞌ bay katumbukanna apaꞌit du. Aheka aꞌa bay amatay paginum sigām boheꞌ inān, sabab min paꞌitna.
12 Puwas eꞌ ya malaꞌikat kaꞌmpatna amahꞌlling na isab tiyup-tiyupna. Magtūy taluwaꞌ lendom dabahagiꞌ min bahagiꞌ tꞌllu ma llaw, ma bulan, sampay saga bituꞌun. Angkan ma deyom dangꞌllaw, alendom mpat jām tꞌggolna. Damikiyanna ma waktu sangom, mpat jām isab mbal amuwan sawa min diyataꞌ langit.
13 Na puwas inaꞌan-i, sabuku angꞌndaꞌ, aniyaꞌ belleꞌ takaleku magsuwala, inaꞌan paleyang ma toꞌongan ayan. Atanog suwalana, yukna, “Arōy! Arōy! Asiya-siya na sasuku maglahat ma dunya, sabab landuꞌ abisa saga balaꞌ ya pinatꞌkka ni sigām bang taꞌabut waktu pamahꞌlling tiyup-tiyup eꞌ tꞌllu malaꞌikat damuli!”