7
Dahatus maka Mpatpūꞌ maka Mpat Ngibu Aꞌa Israꞌil
1 Puwas inān makaꞌndaꞌ aku mpat malaꞌikat anꞌngge ma mpat pidju alam magpanagang. Inaꞌan sinagang eꞌ sigām mpat baliyu aheya boꞌ supaya mbal patumbuk ni gintanaꞌan atawa ni dilaut, atawa ni kakayu-kayuhan minsan laꞌa hal ni dampoꞌon. 2 Maka aniyaꞌ taꞌndaꞌku dakayuꞌ malaꞌikat paluwas min sobangan amowa pagsasāp Tuhan, ya kakkal salama-lama. Ginasuran eꞌ malaꞌikat dakayuꞌ saga malaꞌikat kaꞌmpat inān, ya bay kabuwanan kawasa eꞌ Tuhan magpakaꞌat dunya deya-dilaut. 3 Yuk malaꞌikat dakayuꞌ itu, “Daꞌa giꞌ mulahunbi gintanaꞌan maka dilaut ilu sampay kakayu-kayuhanna, satꞌggol halam giꞌ kasāpan eꞌ kami saga sosohoꞌan Tuhantam ma tuktuk sigām.” 4 Manjari nihakaꞌan aku bang pila puhuꞌ ya subay sināpan ma tuktuk. Dahatus konoꞌ maka mpatpūꞌ maka mpat ngibu min kabangsahan tubuꞌ Israꞌil.
5-8 Min panubuꞌ si Yuda aniyaꞌ sangpūꞌ maka duwangibu bay kasāpan. Ya du min panubuꞌ si Ruben, si Gād, si Aser, si Naptali, si Manasse, si Simiyun, si Libi, si Issakar, si Sibulun, si Yusup, maka si Benjamin. Sangpūꞌ maka duwangibu bay kasāpan min panubuꞌ sigām kaniya-kaniya.
Katimukan Aꞌa Mamarahi Hekana
9 Puwas eꞌ angꞌndaꞌ aku, ati taꞌndaꞌku katimukan aꞌa mamarahi hekana, mbal taitung! Aniyaꞌ sigām min lahat kamemon maka min bangsa kamemon, min panubuꞌ kamemon maka min bahasa kamemon. Inaꞌan sigām sikatꞌnggehan ma alopan paningkōꞌan bangsahan maka ma alopan Bili-bili. Magnijuba sigām poteꞌ, magpamowa isab saliꞌ lokay kaniya-kaniya. 10 Atanog eꞌ sigām magsuwala sama-sama, yuk-i,
“Sanglitanta Tuhan Manglalappas,
ya aningkōꞌ ma paningkōꞌanna bangsahan.
Pudjita isab Bili-bili.”
11 Inaꞌan mpat binatang maka saga pagmattoꞌahan anꞌngge ma atag paningkōꞌan, maka inaꞌan isab saga malaꞌikat kamemon anꞌngge min sakalibut sigām. Sakali magsujuran baꞌanan malaꞌikat inān paharap ni paningkōꞌan ati pinudji Tuhan eꞌ sigām. 12 Yuk-i,
“Amin. Sanglitanta Tuhan, mahaldikaꞌta na iya.
Paheyata ōnna, pagsukulanta iya,
sabab ma iya asal pangitaꞌu alalom
maka barakat maka sangat kawasa
sampay ni kasaumulan!
Amin!”
13 Sakali itu, tinilaw aku eꞌ dakayuꞌ min pagmattoꞌahan inān, yukna, “Kataꞌuwannu bahāꞌ bang sai saga aꞌa magnijuba poteꞌ itu? Kataꞌuwannu bang minningga sigām?”
14 Anambung aku, “Tuwan, mbal. Kaꞌa ya makataꞌu.”
Yukna ma aku, “Sigām inān bay makalabay kabinasahan aheya. Bay karakdakan eꞌ sigām juba sigām ma lahaꞌ Bili-bili, hatina kalaꞌanan tamak dusa sigām.
15 Ya heꞌ sababanna angkan sigām anꞌngge ma alopan tingkōꞌan Tuhan.
Maghinang sigām ma iya llaw-sangom ma tongod pangarapan ni iya.
Nihampanan sigām eꞌ Tuhan, ya aningkōꞌ ma tingkōꞌanna bangsahan.
Asalamat sigām ma haddaratna.
16 Mbal na sigām lingantu atawa patay boheꞌ pabalik
sampay ni kasaumulan.
Mbal sigām kinapiyalu atawa apanggang,
17 sabab Bili-bili, ya paꞌatag ma haddarat Tuhan, angupiksaꞌ sigām.
Iya ya magmakōk, amowa sigām ni tuburan boheꞌ makakallum.
Ati sinapuhan eꞌ Tuhan boheꞌ mata sigām kamemon.”