6
Saga Gindan Pinikit ni Gulungan Katas
1 Na, sabu paꞌin aku angꞌndaꞌ pinaꞌan, taꞌndaꞌku Bili-bili amitas gindan kaissana min gulungan katas inān. Maka takaleku dakayuꞌ binatang min atag paningkōꞌan inān magsuwala. Saliꞌ lꞌggon ya tanog suwalana, yuk-i, “Lanjalin na!” 2 Magtūy aniyaꞌ taꞌndaꞌku kuraꞌ poteꞌ. Ya anguraꞌ inān amowa baꞌugan panaꞌ, maka binuwanan iya korona paporong kōkna. Jari anguraꞌ iya paluwas minnaꞌan anganggaꞌosan saga bantana kamemon. Mbal iya angaku daꞌug.
3 Sakali pinitas eꞌ Bili-bili inān ya gindan karuwana, ati takaleku binatang karuwana magsuwala, yuk-i, “Lanjalin na!” 4 Magtūy aniyaꞌ kuraꞌ dakayuꞌ paluwas, kuraꞌ alutuꞌ keyatna. Ya anguraꞌ inān binuwanan patakos atahaꞌ, maka binuwanan iya kapatut angalaꞌanan kasannangan min kaluhaꞌan dunya, sampay amatꞌnnaꞌ kalengogan ma bangsa manusiyaꞌ amapagbonoꞌ sigām.
5 Puwas eꞌ pinitas isab eꞌ Bili-bili ya gindan katꞌlluna, ati takaleku binatang katꞌlluna magsuwala, yuk-i, “Lanjalin na!” Pagꞌndaꞌku, aniyaꞌ kuraꞌ ettom panguraꞌan eꞌ aꞌa amenten timbangan. 6 Jari aniyaꞌ takaleku saliꞌ suwala paluwas min tꞌngngaꞌ mpat binatang inān. Yuk suwala heꞌ, “Ya pamꞌlli dapansing buwas tirigu atawa tꞌllu pansing dawa subay gadji aꞌa dangꞌllaw. Sagōꞌ in nsꞌllan maka binu daꞌa subay pinakaꞌat.”
7 Puwas eꞌ pinitas isab eꞌ Bili-bili ya gindan kaꞌmpatna, ati takaleku binatang kaꞌmpatna magsuwala, yuk-i, “Lanjalin na!” 8 Pagꞌndaꞌku aniyaꞌ kuraꞌ angamudas, saliꞌ halam lahaꞌna. Ya anguraꞌ inān niōnan Kamatay, maka paturul min buliꞌanna niōnan Ahirat. Manjari in duwangan itu binuwanan kapatut amapatay dabahagiꞌ min bahagiꞌ mpat ma manusiyaꞌ kamemon ma dunya. Bonoꞌ, gotom, bonglay, sampay sattuwa talun, ya pinatꞌkka eꞌ duwangan itu pamapatay saga aꞌa.
9 Puwas eꞌ, pagpitas paꞌin eꞌ Bili-bili ya gindan kalimana min gulungan katas eꞌ, taꞌndaꞌku mainaꞌan, ma deyoꞌ tongod pagkulbanan, saga umagad aꞌa. Aꞌa inān bay pinapatay ma sabab pagnasihat sigām ma palman Tuhan, maka ma sabab katuyuꞌ sigām anaksiꞌ ma pasal si Isa Al-Masi. 10 Sakali angalingan saga umagad itu. Atanog pangalingan sigām, yuk-i, “O Tuhan Panghūꞌ kami, kaꞌa ya tunggal Sangat Kawasa. Mahasussi ka maka abꞌnnal toꞌongan! Buwattingga giꞌ tꞌggolna boꞌ yampa hukumnu saga aꞌa ma dunya heꞌ? Sumiyan sigām pagmulkaꞌannu ma sabab pamapatay sigām ma kami itu?” 11 Jari binuwanan sigām juba poteꞌ pakaniya-pakaniya, ati sinōꞌ sigām pahali-hali giꞌ daiꞌ-daiꞌ. Subay konoꞌ jukup ya heka dauranakan sigām sosohoꞌan Tuhan pinapatay boꞌ yampa minulkaꞌan saga aꞌa bay amapatay heꞌ.
12 Na, aubus paꞌin inaꞌan-i, taꞌndaꞌku Bili-bili amitas gindan kaꞌnnomna min gulungan katas. Magtūy aniyaꞌ linug aheya makajogjog deyom dunya. Angalendom isab mata llaw saliꞌ hantang karut ettom, maka luwa bulan inān akeyat pinaka luwa lahaꞌ. 13 Sampay bituꞌun ma bꞌttong langit, sikapakpakan saliꞌ hantang buwaꞌ kayu amalaganas hūgna bang taluwaꞌ badju. 14 Nilanyapan isab langit saliꞌ hantang katas nilūnan, maka kamemon kabūd-būran maka kapūꞌ-pūꞌan apinda min baina.
15 Manjari saga aꞌa ma dunya, saga kasultanan maka saga parinta, saga kanakuraꞌan sundalu, saga aꞌa dayahan maka aꞌa gaꞌosan sampay isab aꞌa kamemon, ata maka nggaꞌi ka ata, magtapukan di-sigām sama-sama, ai na ka ma deyom songab batu, ai na ka ma deyoꞌ kabatuhan ma kabūd-būran. 16 Aminta-minta sigām ni kabūd-būran maka ni kabatuhan, yuk-i, “Tambunin kami, boꞌ supaya kami mbal taꞌndaꞌ eꞌ Dangan ya aningkōꞌ ma paningkōꞌan bangsahan, boꞌ mbal isab taluwaꞌ mulkaꞌ min niōnan Bili-bili. 17 Sabab taꞌabut na waktu pamatꞌkka mulkaꞌ eꞌ sigā ma manusiyaꞌ. Halam aniyaꞌ makasandalan mulkaꞌ inān, minsan sai.”