5
Gulungan Katas maka Bili-bili
1 Manjari aniyaꞌ isab taꞌndaꞌku gulungan katas, inaꞌan binalutan ma tanganna kowan eꞌ Dangan ya aningkōꞌ ma paningkōꞌan bangsahan. Katas inān bay sinulatan min karuwambilaꞌna maka bay pinikitan maka pituꞌ gindan boꞌ mbal pabꞌllat. 2 Sakali aniyaꞌ taꞌndaꞌku malaꞌikat akawasa. Atanog eꞌna amissala, yuk-i, “Sai bahāꞌ taga-kapatut amitas saga gindan ma gulungan katas itu sampay amꞌllat iya?” 3 Sagōꞌ minsan ma diyataꞌ langit atawa ma babaw dunya atawa ma deyom ahirat, halam aniyaꞌ bay tabāk makarapat amꞌllat gulungan katas inān, angꞌndaꞌ ni deyomna. 4 Na, pagka halam aniyaꞌ minsan dakayuꞌ patut amꞌllat katas inān atawa angꞌndaꞌ ma deyomna, magtūy aku anangis magkarukkaꞌan. 5 Manjari binissalahan aku eꞌ dakayuꞌ mattoꞌa min duwampūꞌ maka mpat inān, yuk-i, “Daꞌa ka anangis. Ndaꞌun ba. Taraꞌug na nakuraꞌ saitan eꞌ dangan aꞌa ya pinagsambat Halimaw min panubuꞌ si Yuda. Babantugun iya, maka tubuꞌ sultan Daꞌud. Angkanna iya makarapat amitas pituꞌ gindan ma gulungan katas inān, sampay amꞌllat iya.”
6 Puwas eꞌ aniyaꞌ taꞌndaꞌku mainaꞌan saliꞌ Bili-bili anꞌngge ma atag paningkōꞌan bangsahan ma tꞌngngaꞌ-tꞌngngaꞌna. Pinaglibutan iya eꞌ mpat binatang maka duwampūꞌ maka mpat pagmattoꞌahan. Aniyaꞌ taꞌndaꞌku ma baran Bili-bili saga bainat in iya bay pinapatay. Aniyaꞌ pituꞌ tandukna maka pituꞌ isab matana. Bang pinaꞌamu, in pituꞌ matana inān, ya na Rū Tuhan pinabeyaꞌ eꞌ Tuhan ni kaluhaꞌan dunya. 7 Sakali itu paꞌabut Bili-bili itu ni Dangan ya aningkōꞌ ma paningkōꞌan bangsahan, angāꞌ gulungan katas min tanganna kowan. 8 Pagāꞌna katas, magtūy in mpat binatang, maka duwampūꞌ maka mpat pagmattoꞌahan inān magsujuran ma dahuanna amudji iya. Saga pagmattoꞌahan inān bay amowa biyula kaniya-kaniya maka tugtugan bulawan apꞌnnoꞌ eꞌ kamanyan, boꞌ hamut kamanyan inān buwat ibarat pagduwaꞌa min aꞌa sukuꞌ Tuhan. 9 Sakali magkalangan sigām kalangan bahaꞌu, yuk-i,
“Kaꞌa ya taga-kapatut angāꞌ gulungan katas
sampay amitas gindanna,
sabab kaꞌa ya bay pinapatay,
maka lahaꞌnu bay pabuꞌus ma kamataynu.
Ya na koꞌ ilu bay pangalꞌkkat saga manusiyaꞌ min karusahan sigām
boꞌ supaya sigām manjari sukuꞌ Tuhan.
Saga aꞌa itu asal min bangsa kamemon, min bahasa kamemon,
min panubuꞌ kamemon, sampay min lahat kamemon.
10 Tahinangnu sigām tubuꞌan sultan,
tumpukan imam maghinang ni Tuhantam.
Ati sigām ya magbayaꞌ ma babaw dunya itu ma sinosōng.”
11 Puwas eꞌ angꞌndaꞌ aku pinaꞌan pabalik, ati aniyaꞌ takaleku suwala min malaꞌikat magibu-ibuhan. Sikatꞌnggehan sigām ma sakalibut paningkōꞌan bangsahan maka mpat binatang maka duwampūꞌ maka mpat pagmattoꞌahan inān. 12 Atanog eꞌ baꞌanan malaꞌikat itu magkalang, yuk-i,
“Patut minahaldikaꞌ Bili-bili ya bay pinapatay.
Akawasa iya maka dayahan toꞌongan.
Aheya asal pangitaꞌuna maka kosogna.
Mahaldikaꞌta iya, sanglitanta iya, pudjita iya.”
13 Puwas eꞌ takaleku magkalangan kamemon bay pinapanjari eꞌ Tuhan, ma diyataꞌ langit, ma babaw dunya, ma ahirat, sampay ma deyom tahik. Ahoꞌ, magdakayuꞌ saga binangsa kamemon ma sakalingkal alam, yuk-i,
“Pudjitam iya ya aningkōꞌ ma paningkōꞌan bangsahan.
Pudjitam Bili-bili inān.
Subay iya mahaldikaꞌtam,
subay sanglitantam salama-lama,
sabab in iya asal sangat kawasa.”
14 Sakali anambag mpat binatang inān, yuk-i, “Amin”. Ati pasujud karuwampūꞌ maka mpat pagmattoꞌahan inān amudji Tuhan maka Bili-bili.