4
Pakaradjaꞌan ma Deyom Sulgaꞌ
1 Puwas eꞌ aniyaꞌ saddī paꞌndaꞌ ni aku. Aniyaꞌ taꞌndaꞌku lawang aukab ma deyom sulgaꞌ. Takaleku isab suwala ya bay amissala ni aku dahū, ya saliꞌ lling tiyup-tiyup. Yukna, “Pariyataꞌ ka piꞌitu, paꞌndaꞌanta ka saga pakaradjaꞌan ya song patꞌkka.” 2 Saruꞌun-duꞌun du aku kapagbayaꞌan eꞌ Rū Tuhan ati taꞌndaꞌku paningkōꞌan bangsahan ma deyom sulgaꞌ, maka aniyaꞌ Dangan aningkōꞌ ma diyataꞌna. 3 Angillap asal pamaihuꞌanna, buwat palmata gaddung maka palmata keyat. Paningkōꞌan inān alengkol eꞌ biradalia walnaꞌ gaddung. 4 Alibut isab eꞌ duwampūꞌ maka mpat paningkōꞌan saddī, paningkōꞌan eꞌ duwampūꞌ maka mpat pagmattoꞌahan magpamakay poteꞌ, maka magpinorong korona bulawan. 5 Ya paningkōꞌan ma tꞌngngaꞌ inān asal paluwasan lāt maka lꞌtteꞌ maka lꞌggon maglagublub, maka aniyaꞌ pituꞌ suwariyan parallet ma alopanna. Bang nihati, in pituꞌ suwariyan inān ya na Rū Tuhan. 6 Aniyaꞌ isab ma dahuan paningkōꞌan inān pinaka sꞌllang aningaw-tingaw, saliꞌ luwa samin.
Taꞌndaꞌku isab ma sakalibut paningkōꞌan, ma mpat duguna, aniyaꞌ mpat binatangb. Alapat baran sigām eꞌ mata, min dahuan maka min bukutan. 7 Ya pangluwahan dakayuꞌ binatang inān buwat luwa halimaw. Karuwana buwat luwa sapiꞌ, katꞌlluna buwat pamaihuꞌan manusiyaꞌ, maka kaꞌmpatna inān buwat luwa belleꞌ bang paleyang. 8 In mpat binatang inān taga-kepet, nnom hekana pakaniya-pakaniya, maka alapat sigām eꞌ mata deyom-luwasan. Halam aniyaꞌ halian sigām magkalang llaw-sangom, yuk-i,
“Sussi, sussi, sussi asal Tuhan,
ya Panghūꞌ Sangat Kawasa.
In iya Tuhan mbal magkapinda sangay min awal tagnaꞌ
sampay ni kabuwattituhan, sampay isab ni kasaumulan.”
9 Magkalang na paꞌin mpat binatang inān, pagsanglit maka pagmahaldikaꞌ maka pagsukul sigām ni Tuhan kakkal salama-lama ya aningkōꞌ ma tingkōꞌanna bangsahan. Sakahabaꞌ waktu magkalang mpat binatang itu, 10 magsujuran saga pagmattoꞌahan karuwampūꞌ maka mpat. Paharap sigām ni Dangan ya aningkōꞌ ma tingkōꞌan eꞌ, ati amudji sigām ma iya, ya kakkal allum salama-lama. Pinatꞌnnaꞌ eꞌ sigām saga korona bay paporong sigām ma dahuan paningkōꞌan bangsahan, boꞌ yampa sigām amaluwas bissala. Yuk-i,
11 “O Tuhan, Panghūꞌ kami, kaꞌa ya dakayuꞌ-kayuꞌ
patut sinanglitan sampay minahaldikaꞌ.
Patut isab ka kaniyaꞌan kawasa,
sabab kaꞌa ya bay amapanjari kamemon.
Asal min kahandaknu angkan pinaniyaꞌ ai-ai kamemon,
angkan kabuwanan kallum.”