3
Lapal ni Palhimpunan Almasihin ma Sardis
1 Amissala giꞌ ya aꞌa taꞌndaꞌku inān, yukna, “Sulatun lapal itu ni malaꞌikat pasunuꞌ, ya angꞌntanan palhimpunan jamaꞌaku ma daꞌira Sardis.
Buwattitu ya panulatnu: lapal itu deyoꞌ min aku, ya amowa Rū Tuhan maka bituꞌun pituꞌ hekana. Kataꞌuwanku bang ai kahinanganbi. Kataꞌuwanku isab kabantugbi maghinang kabayaꞌanku, sagōꞌ nggaꞌi ka koꞌ ilu bꞌnnal. 2 Angkan kam subay pahalliꞌ. Pahogotunbi pangandolbi ya masi takapin ilu, boꞌ mbal atighan kamemon. Ya kahinanganbi ilu, bang ma lilinganku isab, mbal giꞌ ajatu ma pangꞌndaꞌ Tuhanku. 3 Angkan pikilunbi saga panduꞌ bay takalebi tagnaꞌ. Beyaꞌunbi na, pataikut kam min dusabi. Sagōꞌ bang kam mbal pahalliꞌ, patangkaw du aku piꞌilu ma waktu mbal kataꞌuwanbi.
4 Sagōꞌ aniyaꞌ giꞌ min kaꞌam ma Sardis ilu halam kalaminan kalaꞌatan. Bay asal halliꞌanbi ataybi, buwat hantang sꞌmmek nihalliꞌan boꞌ mbal katamakan. Papagdonganta kam maka aku ma apoteꞌ lullun pakayanbi, sabab tōp kam ameyaꞌ ma aku. 5 Sasuku mbal tabowa eꞌ sasat-manasat, pinasꞌmmekan du sigām poteꞌ buwat yukku eꞌ, maka mbal papasanku ōn sigām min Kitab pagsusulatan ōn aꞌa ya kabuwanan kallum kakkal. Patanyagku ni Mmaꞌku maka ni saga malaꞌikatna in aꞌa inān sukuꞌku na. 6 Na, sai-sai kam taga-tainga, asipunbi toꞌongan pamissala Rū Tuhan, ya pinasampay ni palhimpunan jamaꞌaku.”
Lapal ni Palhimpunan Almasihin ma Piladilpi
7 “Sulatun lapal itu ni malaꞌikat pasunuꞌ, ya angꞌntanan palhimpunan jamaꞌaku ma daꞌira Piladilpi.
Buwattitu ya panulatnu: lapal itu deyoꞌ min aku, ya Mahasussi, ya Abꞌnnal Toꞌongan. Aku ya angꞌntan kunsiꞌ sultan Daꞌud. Bang aku ya angukab halam aniyaꞌ makatambol. Damikiyanna bang aku ya anambol halam aniyaꞌ makaukab. 8 Kataꞌuwanku bang ai ya kahinanganbi. Kataꞌuwanku isab akulang gaꞌosbi, sagōꞌ taisbatbi panduꞌku maka ahogot pameyaꞌbi ma aku. Aniyaꞌ lawang bay ukabanku kaꞌam pasōranbi, lawang mbal tatambol minsan eꞌ sai. 9 Pakale kam! Saga aꞌa magbauꞌ-bauꞌ ilu in sigām bangsa Yahudi sukuꞌ Tuhan konoꞌ, hal magputing. Sukuꞌ saitan sigām. Ma waktu sinōng, bowaku du sigām pasujud ni tapeꞌbi, jari kinataꞌuwan eꞌ sigām kamemon in kaꞌam kalasahanku. 10 Bay kam sohoꞌku angimanan ai-ai, ati katukiranbi panohoꞌanku heꞌ. Angkan kam hampananku pahāp boꞌ halam aniyaꞌ baya-bayabi ma deyom kabinasahan ya patꞌkka ni kaluhaꞌan dunya ma sinosōng, kabinasahan panulayan aꞌa kamemon.
11 Araiꞌ na aku piꞌilu pabalik ni dunya. Gomgominbi pahāp ai-ai bay pamasukuꞌ kaꞌam boꞌ supaya halam aniyaꞌ makaꞌagaw tungbas ya pamahalaꞌ kaꞌam. 12 Sasuku mbal tabowa eꞌ sasat-manasat, paheyaku du ma haddarat Tuhan. Pataptap iya mainaꞌan, mbal toꞌongan alaꞌan minnēꞌ salama-lama. Sulatku ōn Tuhanku ma baranna, maka ōn daꞌira Tuhan ya niōnan Awrusalam Bahaꞌu. Ya na koꞌ itu daꞌira song pinareyoꞌ min sulgaꞌ, min Tuhanku. Sulatku isab ōnku bahaꞌu ma baran saga aꞌaku inān. 13 Na, sai-sai kam taga-tainga, asipunbi pamissala Rū Tuhan, ya pinasampay ni palhimpunan jamaꞌaku.”
Lapal ni Palhimpunan Almasihin ma Laodikiya
14 “Sulatun lapal itu ni malaꞌikat damuli, ya angꞌntanan palhimpunan jamaꞌaku ma daꞌira Laodikiya.
Buwattitu ya panulatnu: lapal itu deyoꞌ min aku, ya niōnan Amin, ya tantu kapangandolan. Bꞌnnal asal panaksiꞌku. Aku ya poꞌonan ma kamemon bay pinapanjari eꞌ Tuhan. 15 Kataꞌuwanku isab kahinanganbi, in kaꞌam ma llot ameyaꞌ ma aku maka mbal, saliꞌ hantang boheꞌ mbal papasuꞌ, mbal paringin. Ya kabayaꞌanku subay kam anoꞌongan. Bang kam ameyaꞌ ma aku, ameyaꞌ kam toꞌongan. Bang hatiꞌ mbal, daꞌa na. 16 Sagōꞌ magduwa-ruwa lagiꞌ pikilanbi ma pasalku, buwat boheꞌ bang ma llot apasuꞌ maka aringin. Angkan kam ludjaꞌanku. 17 Yukbi in kaꞌam dayahan, ahāp kallumanbi. Yukbi halam aniyaꞌ sukkalbi. Sagōꞌ ya bꞌnnalna, saliꞌ kam hantang buta sabab halam tasayubi bang ai toꞌongan kahālanbi. Asiya-siya kam, makahansul kam deyom atay, sabab miskin kam, hatina akulang pagimanbi. Saliꞌ kam aꞌa halam aniyaꞌ kapanꞌmmekna. 18 Angkan kam hūganku garaꞌ buwattitu: bꞌllihunbi min aku bulawan halam aniyaꞌ simbugna boꞌ kam manjari dayahan. Bꞌllihunbi min aku pakayan poteꞌ pamakaybi boꞌ katambunan tamparasabi. Bꞌllihunbi isab tambal min aku panambal matabi boꞌ kam makaꞌndaꞌ.
19 Sasuku kalasahanku, biꞌatku na paꞌin sampay sowayku supaya amintāng. Angkanna, panuyuꞌinbi kahāpan, pataikut kam min dusabi. 20 Pakale kam! Itiyaꞌ aku angalagaran kaꞌam, saliꞌ aꞌa anꞌngge ma lawang lumaꞌbi angukuꞌ pikiukab. Bang aniyaꞌ angasip ma suwalaku sampay angukaban aku, pasōd du aku boꞌ kami magsalu.
21 Sasuku angandaꞌug maka mbal tabowa eꞌ sasat-manasat, buwananku du kapatut magsamatingkōꞌ maka aku ma tingkōꞌanku bangsahan. Pasaliꞌ du iya ni aku pagka taraꞌugku palbantahanku ati aningkōꞌ aku ma bihing Mmaꞌku, ma paningkōꞌanna bangsahan. 22 Na, sai-sai kam taga-tainga, asipunbi pamissala Rū Tuhan, ya pinasampay ni saga palhimpunan jamaꞌaku.”