2
Lapal ni Palhimpunan Almasihin ma Epesos
1 Yukna giꞌ, “Sulatun lapal itu boꞌ pabeyaꞌun ni malaꞌikat dakayuꞌ, ya angꞌntanan palhimpunan jamaꞌaku ma daꞌira Epesos.
Buwattitu ya panulatnu: lapal itu deyoꞌ min aku, ya amowa pituꞌ bituꞌun ma tanganku kowan, maka maglꞌngngan pehēꞌ-piꞌitu ma deyoman pituꞌ papagan palitaꞌan bulawan itu. 2 Kataꞌuwanku hinangbi. Kataꞌuwanku isab kapanuyuꞌbi maghulas-sangsāꞌ, maka ma kosogbi anandalan kasigpitan ai-ai. Kataꞌuwanku isab mbal kaimananbi saga aꞌa maghinang kalaꞌatan. Bay na tapariksaꞌbi toꞌongan saga aꞌa magnahuꞌ-nahuꞌ in sigām bay kawakilan eꞌku, ati minnēꞌ kataꞌuwanbi saga aꞌa inān magputing. 3 Kataꞌuwanku isab in kaꞌam aiman asal. Bay sandalanbi kasigpitan ai-ai ma pasalku, maka halam bay bbahanbi imanbi.
4 Sagōꞌ aniyaꞌ panowayku ma kaꞌam, sabab lasabi ma aku nggaꞌi ka buwat bay kaꞌina tagnaꞌ. 5 Entomunbi bay kaheya lasabi tagnaꞌ, apinda na toꞌongan. Taikutinbi na dusabi, jari hinangunbi kahāpan buwat bay hinangbi tagnaꞌ. Bang mbal taikutanbi dusabi magbaran du aku piꞌilu ni kaꞌam angalaꞌanan palitaꞌanbi min patꞌnnaꞌanna. 6 Sagōꞌ kasulutan isab aku ma kaꞌam sabab kaꞌmbalanbi hinang saga aꞌa magpameyaꞌ ma umpigan Nikulai, ya kaꞌmbalanku isab.
7 Na, kaꞌam kamemon ya taga-tainga, asipunbi toꞌongan pamissala Rū Tuhan ni saga palhimpunan jamaꞌaku. Sai-sai mbal tabowa eꞌ sasat-manasat, buwananku iya kapatut amangan buwaꞌ min kayu ya makabuwan kallum salama-lama, ya patomoꞌ mahēꞌ ma lahat Tuhan.”
Lapal ni Palhimpunan Almasihin ma Ismirna
8 “Sulatun isab lapal itu ni malaꞌikat pasunuꞌ, ya angꞌntanan palhimpunan jamaꞌaku ma daꞌira Ismirna.
Buwattitu ya panulatnu: lapal itu deyoꞌ min aku, ya Tagnaꞌan maka Kahinapusan. Bay aku amatay, boꞌ allum na pabīng. 9 Kataꞌuwanku kabinasahan ya kalabayanbi ilu, maka ya kahālan kamiskinbi, saguwāꞌ ya bꞌnnalna taga-karaya kam aheya. Kataꞌuwanku isab bang ai pangalimut kaꞌam eꞌ aꞌa magnahuꞌ-nahuꞌ in sigām Yahudi aꞌa sukuꞌ Tuhan, boꞌ paꞌin nggaꞌi ka. Saga aꞌa inān danseheꞌan asal maka saga aꞌa bebeyaꞌan nakuraꞌ saitan. 10 Daꞌa katāwinbi saga kabinasahan ya song patꞌkka ni kaꞌam. Pakale kam! Sōng kam sinulayan eꞌ nakuraꞌ saitan boꞌ kam apinda min pagimanbi. Aniyaꞌ kam niꞌisi ni deyom kalabusu, ati sangpūꞌ ngꞌllaw ya tꞌggol kapangananambi kabinasahan. Sagōꞌ patꞌttog kam angandol ma aku minsan kamatay ya sōngbi, sabab tungbasanta du kam kallum saumul-umul.
11 Na, sai-sai kam taga-tainga, asipunbi toꞌongan pamissala Rū Tuhan itu, ya pinasampay ni palhimpunan jamaꞌaku. Sai-sai mbal tabowa eꞌ sasat-manasat mbal du makananam kapꞌddiꞌan ma deyom nalkaꞌ, ya pinagbahasa kamatay kaminduwana.”
Lapal ni Palhimpunan Almasihin ma Pergamo
12 “Sulatun isab lapal itu ni malaꞌikat pasunuꞌ, ya angꞌntanan palhimpunan jamaꞌaku ma daꞌira Pergamo.
Buwattitu ya panulatnu: lapal itu deyoꞌ min aku, ya amowa takos atalom solabna karuwambilaꞌ. 13 Kataꞌuwanku bang maꞌai paglahatanbi. Inaꞌan kam ma lahat binabantug sabab pagsusumbahan ni nakuraꞌ saitan. Saguwāꞌ minsan buwattēꞌ, ahogot pameyaꞌbi ma aku. Halam bay butawananbi pagimanbi ni aku minsan waktu bay pamapatay ma si Antipas eꞌ. Kapangandolan iya magnasihat ma pasalku, angkanna iya bay binonoꞌ ma lahat nakuraꞌ saitan ilu.
14 Sagōꞌ aniyaꞌ panowayku ma kaꞌam. Muna-muna, aniyaꞌ min kaꞌam ilu ameyaꞌ-meyaꞌ ma panduꞌ si Balaꞌam, ya bay ma masa awal eꞌ. Si Balaꞌam eꞌ bay amanduꞌan si Balak amowa bangsa Israꞌil magdusa ni Tuhan, ati takakan eꞌ sigām pagkakan haram ya bay paglamas ni taꞌu-taꞌu. Bay isab sigām magkarupangan dꞌnda-lꞌlla. 15 Karuwana, aniyaꞌ isab min kaꞌam ameyaꞌ-meyaꞌ ma panduꞌ umpigan Nikulai. 16 Angkan kam subay pataikut min dusabi. Bang kam gantaꞌ mbal, pasaꞌut aku piꞌilu ati atuhanku saga aꞌa ilu. Pangatuku pakokos ya paluwas min bowaꞌku.
17 Na, sai-sai kam taga-tainga, asipunbi toꞌongan pamissala Rū Tuhan itu, ya pinasampay ni palhimpunan jamaꞌaku. Sai-sai mbal tabowa eꞌ sasat-manasat, buwananku sigām kinakan mbal taꞌndaꞌ eꞌ kaseheꞌan, kinakan min deyom sulgaꞌ ya niōnan manna. Toporanku isab sigām batu poteꞌ bay kasulatan ōn sigām bahaꞌu. Halam aniyaꞌ makataꞌuwan ōn inān saddī min aꞌa asal makataimaꞌ iya.”
Lapal ni Palhimpunan Almasihin ma Tiyatira
18 “Sulatun na isab lapal itu ni malaꞌikat pasunuꞌ, ya angꞌntanan palhimpunan jamaꞌaku ma daꞌira Tiyatira.
Buwattitu ya panulatnu: lapal itu deyoꞌ min aku, Anak Tuhan. Mataku itu parallet saliꞌ suleyab api, tapeꞌku itu magsinglab saliꞌ tumbaga bay sinubuhan. 19 Kataꞌuwanku kahinanganbi. Kataꞌuwanku in lasabi aheya, maka pangandolbi ma aku ahogot, maka akosog isab panabangbi ma pagkahibi, maka panandalbi ma kasigpitan ai-ai. Ahāp lagiꞌ kahinanganbi buwattinaꞌan min bay dahū.
20 Saguwāꞌ aniyaꞌ panowayku ma kaꞌam. Ilu pasagaranbi si Jesebel, ya dꞌnda magnahuꞌ-nahuꞌ in iya magpalatun palman min Tuhan. Tabowa saga sosohoꞌanku magdusa sabab min pamanduꞌna. Tabowana sigām maghinang kasabulan dꞌnda maka lꞌlla, sampay amangan kinakan haram ya bay pangalamas ni taꞌu-taꞌu. 21 Bay na patangguku dꞌnda inān, kalu iya apinda min paldusahanna. Sagōꞌ mbal iya bilahi angꞌbba min pagbaꞌis-baꞌisna. 22 Pahantakku iya ma pabahakanna sabab saki, ati makananam iya kabinasahan. Ya du saga seheꞌna maghinang alaꞌat, bowaku isab angananam kabinasahan aheya bang mbal pinagsusunan sampay tinaikutan saga kalaꞌatan bay tahinang sigām. 23 Papatayku isab saga aꞌa ameyaꞌ ma panduꞌ dꞌnda inān, boꞌ supaya kinataꞌuwan eꞌ saga jamaꞌaku kamemon ma palhimpunan sigām, in aku itu dakayuꞌ-kayuꞌ makasakupan akkal-pamikil maka itikad manusiyaꞌ. Tungbasanku kam isab kaniya-kaniya, pinapagtongod maka bay kahinanganbi. 24 Sagōꞌ kaꞌam kaseheꞌan ma Tiyatira ilu, halam bay ameyaꞌ ma panduꞌ si Jesebel eꞌ. Halam isab bay anadbi panduꞌ magilmuꞌ ya pinagōnan panduꞌ alalom min nakuraꞌ saitan. Hakaꞌanta kam, mbal kam pahunitanku angkan itu sadja panohoꞌanku kaꞌam: 25 gomgominbi ai-ai bay pamasukuꞌ kaꞌam, sampay taꞌabut waktu kabalikku piꞌilu.
26-27 Sai-sai mbal tabowa eꞌ sasat-manasat, maka atuyuꞌ isab maghinang kabayaꞌanku sampay ni llaw kamatayna, buwananku du kawasa buwat bay pamuwan aku eꞌ Mmaꞌku. Buwananku sigām kawasa magnakuraꞌ ma kabangsa-bangsahan. Ya bowahan pagnakuraꞌ sigām saliꞌ hantang tungkud basiꞌ mbal kaꞌatuhan, ati palbantahan sigām saliꞌ bilaꞌ poga akaukanat sadja. 28 Buwananku isab sigām bituꞌun maga. 29 Na, sai-sai kam taga-tainga, asipunbi toꞌongan pamissala Rū Tuhan ya pinasampay ni saga jamaꞌaku ilu.”