PAMABUKISAN
1
PAMABUKISAN
ni si Yahiya
1 Jūd pasal pakaradjaꞌan song paniyaꞌ, ya pamataꞌu eꞌ Tuhan ma si Isa Al-Masi sinōꞌ pamabukis ma iya ni saga sosohoꞌanna. Pinabukis eꞌ si Isa labay min malaꞌikatna ya papehēꞌna ni sosohoꞌanna si Yahiya. Jari si Yahiya ya anaksiꞌ ma deyom jūd itu pasal kamemon taꞌndaꞌna. 2 Kasaksiꞌan eꞌ si Yahiya kamemon bay taꞌndaꞌna maka takalena, hatina pangallam Tuhan maka kasabꞌnnalan bay pamataꞌu eꞌ si Isa Al-Masi. 3 Tantu isab pinaniyaꞌan kahāpan sasuku amassa sulat itu pasal pakaradjaꞌan sinosōng, damikiyanna sasuku akale maka angikut ma ai-ai tasulat maitu. Sabab asekot na waktu pamatꞌkka pakaradjaꞌan itu kamemon.
Pagaddat maka Pagpudji
4-5 Sulat itu deyoꞌ min aku, si Yahiya, pinasampay ni pituꞌ palhimpunan jamaꞌa si Isa ma kalingkal lahat Asiya. Mura-murahan, bang paꞌin kam pinaniyaꞌan tabang maka kasannangan atay min Tuhan, ya mbal magkapinda min awal sampay ni kabuwattituhan sampay isab ni kasaumulan, maka min Rū pituꞌ hekana ya ma dahuan tingkōꞌan Tuhan, maka min si Isa Al-Masi, ya kapangandolan ma saksiꞌna. Dahū asal iya pinakallum pabīng min kamatay. Magagi isab iya ma sasuku magnakuraꞌ ma kaluhaꞌan dunya.
Pudji ni iya, ya alasa ma kitam. Tapapuwas kitam eꞌna min paldusahan ma sabab lahaꞌna ya pinabuꞌus ma kamatayna. 6 Tahinangna kitam bangsa sultan, tumpukan kaimaman maghinang ni Tuhan, ya Mmaꞌna. Angkan subay sanglitantam Al-Masi itu, in iya sangat kawasa sampay ni kasaumulan. Amin.
7 Pajaga kam. Ilu si Isa Al-Masi song piꞌitu, ameyaꞌ min gabun.
Taꞌndaꞌ du iya eꞌ manusiyaꞌ kamemon
sampay eꞌ saga aꞌa bay angahiyak iya.
Kamemon bangsa ma dunya itu magkarukkaꞌan du ma sababna.
Ahoꞌ, bang du paꞌin. Amin.
8 “Aku ya Alip maka Yaꞌ,” yuk Tuhan Sangat Kawasa, “Aku in Panghūꞌ ya mbal magkapinda sangay min awal sampay ni kabuwattituhan, sampay ni kasaumulan.”
Magpanyataꞌ Al-Masi
9 Aku itu si Yahiya dakayuꞌ danakanbi. Danseheꞌan kitam ma deyoman si Isa, angkan aku taga-lamud ma kaꞌam angimanan kasigpitan maka kabinasahan, ya pinaniyaꞌan sai-sai pasukuꞌ ni pagparinta si Isa. Bay aku pinalawak pehēꞌ ni pūꞌ Patmos ma sabab panganasihatku palman Tuhan, maka ma sabab lapal kasabꞌnnalan bay pamataꞌu eꞌ si Isa. 10 Manjari aniyaꞌ dakayuꞌ llaw, llaw Panghūꞌ Isa, bay aku kapagbayaꞌan eꞌ Rū Tuhan. Makakale aku suwala akosog ma bukutanku, ahapal saliꞌ lling tiyup-tiyup. 11 Yuk suwala inān, “Sulatun ai-ai taꞌndaꞌnu ati pabeyaꞌun ni saga jamaꞌa ya magtipun ma pituꞌ daꞌira itu: ni Epesos, Ismirna, Pergamo, Tiyatira, Sardis, Piladilpi, maka ni Laodikiya.”
12 Sakali palingiꞌ aku angꞌndaꞌ bang sai ya amissala ni aku. Paglingiꞌku paꞌin, makaꞌndaꞌ aku pituꞌ papagan bulawan pamatꞌnnaꞌan palitaꞌan. 13 Mainaꞌan, ma tꞌngngaꞌ saga papagan palitaꞌan inān, aniyaꞌ dangan anꞌngge, angaluwa manusiyaꞌ. Ya pakayanna paꞌabut ni tapeꞌna, maka aniyaꞌ kambot bulawan palebod ma daggahana. 14 Buꞌunna apoteꞌ toꞌongan buwat poteꞌ tawas, maka parallet matana, pinaka na api. 15 Tapeꞌna inān magsinglab saliꞌ tumbaga bay sinubuhan ni api boꞌ yampa nilanuꞌan. Ya suwalana inān saliꞌ lagublub boheꞌ anasahan min diyataꞌ. 16 Aniyaꞌ pituꞌ bituꞌun balutanna ma tanganna kowan, maka aniyaꞌ takos paluwas min bowaꞌna, atalom solabna karuwambilaꞌ. Baihuꞌna aninag saliꞌ silak llaw bang augtu na.
17 Pagꞌndaꞌku ni iya, magtūy aku pahantak ma atag tapeꞌna, bāꞌnu aku amatay. Daipara pinatꞌnnaꞌ eꞌna tanganna kowan ni aku, maka eꞌna ahꞌlling. Yukna, “Daꞌa ka atāw! Aku ya Tagnaꞌan maka Kahinapusan. 18 Aku dakayuꞌ-kayuꞌ ya asal allum. Bay na aku amatay, sagōꞌ ndaꞌun itu, allum na aku pabīng sampay ni kasaumulan. Aku ya taga-kawasa magagi ma kamatay sampay ma lahat saga aꞌa magpatayan.
19 “Na, sulatun,” yukna, “kamemon bay taꞌndaꞌnu mainaꞌan sīꞌ, maka ya taꞌndaꞌnu ma buwattinaꞌan, maka ya paniyaꞌ isab ma waktu sinōng. 20 Pamahatiku na pasal pituꞌ bituꞌun bay taꞌndaꞌnu ma tanganku kowan maka pasal pituꞌ papagan palitaꞌan bulawan. Ya na itu hatina: in pituꞌ bituꞌun itu, ya na pituꞌ malaꞌikat angꞌntanan pituꞌ palhimpunan jamaꞌaku. In pituꞌ papagan palitaꞌan, ya na pituꞌ palhimpunan.”