Pamabukisan i

PAMABUKISAN

Pahati Pasal Jūd itu

Ya bay anulat jūd pamabukisan itu si Yahiya, dakayuꞌ mulid si Isa Al-Masi min kasangpūꞌ maka duwa. Atoꞌa toꞌongan na iya, song na amatay ma waktu kapanulatna itu, song na waktu kamatayna. Bay iya ma pūꞌ Patmos, pūꞌ-pūꞌ arikiꞌ pamilisuhan iya eꞌ parinta Rōm ma sabab pagnasihatna pasal si Isa Al-Masi.

Jūd itu bay sinulat eꞌ si Yahiya pamahogot iman saga Almasihin bay ma masa inaꞌan-i sabab landuꞌ sigām nilaꞌat. Aniyaꞌ uldin bay min Sultan Mahatinggi ma bangsa Rōm, in sasuku magkahagad ma si Isa Al-Masi in iya tunggal pagpanghūꞌan, subay pininjalaꞌ eꞌ parinta. Jari aheka sigām bay amatay ma sabab kabisa paminjalaꞌ sigām eꞌ.

Ya sinulat eꞌ si Yahiya ma deyom jūd itu ai-ai bay pamabukis ma iya eꞌ Tuhan ma pasal pakaradjaꞌan song pinaniyaꞌ ma dunya maka ma langit. Aheka bay pamaꞌndaꞌ ma iya hal panginu-inuhan aꞌa sabab alalom sidda hatina. Kaseheꞌ bay tahati eꞌ saga Almasihin ya bay allum ma masa heꞌ-i, sagōꞌ aheka mbal tahatitam ma buwattinaꞌan. Aheka isab bissala paralilan mbal kahangpatantam. Malaingkan asawa pamanduꞌ ma jūd itu ma pasal si Isa Al-Masi. In iya saliꞌ dalil “Bili-bili” bay pagkulban pamuwas dusa manusiyaꞌ kamemon, maka in iya Panghūꞌ Sangat Kawasa. Tantu iya anganggaꞌosan palbantahanna kamemon sampay nakuraꞌ saitan, ati pinabahaꞌu eꞌna langit maka dunya. Manjari Panghūꞌ Isa Al-Masi ya magsultan ma kamemon sampay ni kasaumulan.