JUDAS
1
Sulat min si
JUDAS
1 Sulat itu min aku, si Judas, dakayuꞌ sosohoꞌan si Isa Al-Masi, maka danakan si Yakub. Pasampayku sulat itu ni kaꞌam saga aꞌa tapeneꞌ maka kinalasahan eꞌ Tuhan, ya niokoman eꞌ si Isa Al-Masi.
2 Mura-murahan, bang paꞌin kam pinaniyaꞌan aseꞌ maka lasa ballabi-labihan, sampay kasannangan deyom atay.
Kamaujuran saga Aꞌa Mbal Angisbat Tuhan
3 Sagay bagayku kinalasahan, landuꞌ aku bilahi anulatan kaꞌam pasal kalappasan ya pagkahagarantam saliꞌ-saliꞌ, sagōꞌ saddī ya panulatku ma kaꞌam buwattinaꞌan. Ya pangamay-ngamayku ma kaꞌam: tꞌnggehinbi panduꞌ bꞌnnal ya bay pangandol pinamꞌntꞌdda eꞌ Tuhan ma saga aꞌa sukuꞌna. 4 Aniyaꞌ saga aꞌa mbal magmatāw ma Tuhan makalamud ni kaꞌam ma halam kataꞌuwanbi, angkan kam amay-amayanku pahāp. Pinabengkok eꞌ sigām pamanduꞌ pasal aseꞌ maka lasa Tuhantam, boꞌ aniyaꞌ pangandaꞌawahan sigām maghinang kalumuꞌan. Tapaliluhan eꞌ sigām si Isa Al-Masi, ya tunggal Panghūꞌtam Sangat Kawasa. Tasulat asal ma masa awal lagiꞌ pasal hukuman ya panganggantaꞌ ma saga aꞌa buwattēꞌ.
5 Minsan kasakupanbi bay kahālan bangsa Israꞌil ma masa awal, bilahi giꞌ aku amaentoman kaꞌam pasal waktu kabanyagaꞌ sigām ma lahat Misil. Bay sigām niliyus eꞌ Panghūꞌ min lahat Misil sagōꞌ puwas eꞌ bay papatayna sasuku mbal magkahagad ma iya. 6 Entomunbi isāb pasal saga malaꞌikat kaseheꞌ, ya bay angaliyu-lakad min kapatutan bay panganggantaꞌ Tuhan ma sigām boꞌ angꞌbba min patꞌnnaꞌan sigām luggiyaꞌ. Waꞌi sigām tinambolan eꞌ Tuhan ma deyom kalendoman bitu-bituhan, binaggot maka kili-kili kakkal ni kasaumulan, sampay taꞌabut Llaw Aheya pangahukum Tuhan ma sigām. 7 Entomunbi isāb saga aꞌa bay ma daꞌira Sodom maka Gomora sampay ma saga kalumaꞌan ma sakalibutna. Tagihan sigām maghinang kalumuꞌan maka kasabulan makatamparasa, ati pinatꞌkkahan sigām api mbal magkapꞌdda boꞌ aniyaꞌ pamintāngan ma aꞌa kamemon.
8 Buwattēꞌ isāb saga aꞌa ma deyomanbi ilu. Anguppi na paꞌin sigām ati katamakan anggautaꞌ-baran sigām. Sinulak eꞌ sigām kapagbayaꞌ Tuhan, nilimut bangsa malaꞌikat ya landuꞌ asahaya. 9 Minsan si Mikaꞌil, ya pagnakuraꞌan saga malaꞌikat, mbal makatawakkal angalimut ma nakuraꞌ saitan, waktu kapaglugat sigā. Ya sadja pahꞌlling si Mikaꞌil, “Panghūꞌ Tuhan ya amabukagan kaꞌa.” 10 Malaingkan maghimumūngan na paꞌin saga aꞌa ya sambatku ma sulat itu. Akasla pahꞌlling sigām pasal ai-ai ya mbal tahati eꞌ sigām. Saliꞌ sigām hayop angandūlan ai-ai kanapsuhan sigām, angkan sigām kamulahan.
11 Makaꞌaseꞌ-aseꞌ sidda saga aꞌa inān sabab sinengoran eꞌ sigām kajarihan si Kabil. Bineyaꞌ-beyaꞌ eꞌ sigām kasāꞌan si Balaꞌam, sabab ya du sigām tabowa eꞌ bahaya pilak. Anaggaꞌ sigām ma Tuhan, buwat bay kapanaggaꞌ disi Kora ma masa awal eꞌ, ati alaglag isab sigām.
12 Saga aꞌa ilu saliꞌ dalil tamak ma pagjamubi, ya hinangbi tandaꞌ sin paglasabi. Mbal sigām ataꞌu aiyaꞌ sabab halam aniyaꞌ pangannal sigām saddī, luwal baran sigām. Sapantun sigām gabun mbal amuwan ulan, gabun tabowa paleyang eꞌ baliyu. Sapantun isab sigām poꞌon kayu mbal amuwan buwaꞌ minsan musimna na, angkan binubut sampay gamutna. Jari minduwa kamatay saga aꞌa inān. 13 Sapantun sigām goyak ma timpu badju. In kaiyaꞌan sigām saliꞌ bulaꞌ-bulaꞌ goyak bang amꞌssaꞌ. Ibarat sigām bituꞌun maglensa, mbal tapamandogahan. Kalendoman bitu-bituhan ya katobtoban sigām sampay ni kasaumulan.
14 Bay angallam nabi Idris, ya panubuꞌ si Adam min nnom pangkat, ma pasal aꞌa buwattilu, yuk-i, “Pataꞌu kam. Piꞌitu du Panghūꞌtam maka malaꞌikatna sussi magibu-ibuhan, 15 boꞌ tahukum eꞌna manusiyaꞌ kamemon. Pinatōngan eꞌna dusa saga aꞌa agagga ma iya, ma sabab kalaꞌatan ya tahinang sigām luwas min kajarihan sigām alaꞌat, maka ma sabab lling pangkal kamemon bay pamissala eꞌ sigām ni Tuhan.” 16 Magdurugal maka magsosoway saga aꞌa inān. Tagihan sigām angandūlan napsu sigām alaꞌat, maka magbantug-bantug di-sigām. Nilanahan eꞌ sigām aꞌa kaseheꞌan boꞌ supaya karūlan ai-ai kabayaꞌan sigām.
Bissala Pangamay-ngamay
17 Sagōꞌ saddī ma kaꞌam, saga bagayku. Entomunbi bay pangallam eꞌ saga aꞌa kawakilan eꞌ Panghūꞌtam si Isa Al-Masi. 18 Yuk sigām ma kaꞌam, “Bang song na kahinapusan masa itu, paniyaꞌ saga aꞌa angudjuꞌ-ngudjuꞌ kaꞌam, aꞌa hal angandūlan napsu sigām minsan pangalāngan eꞌ Tuhan.” 19 Bilahi saga aꞌa inān angahinang okatan ma saga jamaꞌa Al-Masi. Pinagbayaꞌan sigām eꞌ napsu baran sigām maka halam ma sigām Rū Tuhan.
20 Saguwāꞌ kaꞌam, saga bagay, subay magpakosog di-bi boꞌ ahogot pagkahagadbi ma panduꞌ sussi ya pangandolanbi. Subay kam angamuꞌ duwaꞌa isab min kawasa Rū Sussi. 21 Pahogot kam ma lasa Tuhan samantalaꞌ kam angalagaran si Isa Al-Masi Panghūꞌtam, ya amuwanan kaꞌam kallum taptap ni kasaumulan ma sabab kaꞌaseꞌna.
22 Maꞌaseꞌ kam ma saga seheꞌbi ya magāng-āng angandol ma si Isa. 23 Liyusunbi saga aꞌa ya song magnikalaꞌatan, ibarat aꞌa song ahūg ni api. Kaꞌaseꞌinbi pahāp saga aꞌa kaseheꞌan, sagōꞌ tangkisinbi kalaꞌatan sigām boꞌ kam mbal kalaminan. Kabꞌnsihinbi napsu sigām, ya saliꞌ hantang lꞌmmis makatupak badjuꞌ.
Pamudji ni Tuhan
24 Magpudji kitam ni Tuhan. Luwal iya taga-kawasa angahampanan kitam boꞌ mbal tabowa maghinang dusa pabīng. Pinatampal kitam eꞌna ni haddaratna asahaya ma halam aniyaꞌ tamak atay. Aheya isab pagkōg-koyagtam. 25 Luwal Tuhan dakayuꞌ-kayuꞌ ya amuwasan kitam min hukuman dusa, angkan iya subay pudjitam labay min Panghūꞌtam si Isa Al-Masi. Sabab ma iya kasanglitan, kabantugan, gaꞌosan maka kawasahan, min awal tagnaꞌ sampay ni kabuwattituhan, sampay ni kasaumulan. Amin. Wassalam