4
Tatabun Pahāp saga Aꞌa Magnabi-nabi
1 Saga bagay kalasahanku, bang aniyaꞌ aꞌa amūng in iya bay katulunan eꞌ Rū Tuhan, daꞌa iya kahagarunbi magdaiꞌ-daiꞌ. Subay tatabunbi dahū bang bꞌnnal min Tuhan ya pasangon ma iya. Sabab aheka na saga aꞌa bay paluwas ni kaluhaꞌan dunya maglaku-laku in sigām nabi, boꞌ nggaꞌi ka. 2 Buwattitu ya pangilāhanbi saga aꞌa bang bꞌnnal bay patulunan Rū Tuhan: sasuku angaku in si Isa Al-Masi bay piꞌitu magbaran manusiyaꞌ, min Tuhan iya. 3 Sagōꞌ sasuku mbal angaku buwattēꞌ, nggaꞌi ka Rū Tuhan ya pasangon ma iya. Min banta Al-Masi koꞌ inān, ya yukku ma kaꞌam song palahil piꞌitu. Itiyaꞌ na iya ma buwattinaꞌan.
4 Sagōꞌ kaꞌam ilu, saga anak-mpu, sukuꞌ Tuhan na. Taraꞌugbi saga nabi ya nggaꞌi ka bꞌnnal ma sabab Rū Tuhan ma deyom pangatayanbi ilu. Akawasa giꞌ Rū Tuhan ya bay pasangon ma kaꞌam min sai-sai ma dunya itu. 5 Sukuꞌ ma dunya itu saga nabi putingan inān, angkan niasip panduꞌ sigām eꞌ saga aꞌa ma dunya. 6 Saguwāꞌ sukuꞌ Tuhan asal kitam, ati sai-sai ataꞌuwan Tuhan angikut kitam du. Mbal angikut saga aꞌa ya nggaꞌi ka sukuꞌ Tuhan. Minnēꞌ kapandogahanta pamanduꞌ aꞌa, bang min Rū kasabꞌnnalan ka atawa min saddī.
Tuhan Poꞌonan Lasa
7 Saga bagay kalasahanku, subay kitam maglasa-liyasahi sabab min Tuhan asal lasa kamemon. Anak Tuhan sasuku alasa, maka kataꞌuwanna Tuhan. 8 Sasuku mbal alasa, mbal kataꞌuwanna Tuhan sabab Tuhan ya poꞌonan lasa kamemon. 9 Buwattitu ya kamattanan lasa Tuhan ni kitam: bay sohoꞌna Anakna tunggal piꞌitu ni dunya supaya kitam pinaniyaꞌan kallum kakkal. 10 Ya itu dī lasa: lasa Tuhan ma kitam, nggaꞌi ka lasatam ma Tuhan. Min lasana angkan sohoꞌna Anakna piꞌitu ni dunya pinapatay hantang pagkulban boꞌ supaya aniyaꞌ pangampunan dusatam.
11 Saga bagay kalasahanku, pagka buwattēꞌ lasa Tuhan ma kitam, wajib kitam subay maglasa-liyasahi. 12 Halam aniyaꞌ aꞌa bay makaꞌndaꞌ luwa Tuhan, malaingkan bang kitam maglasa-liyasahi, pataptap du Tuhan ma kitam ati pinasampulnaꞌ lasana ma deyom kajarihantam.
13 Ya na itu pamandogahantam angkan kataꞌuwantam in kitam pataptap na ma Tuhan, maka iya ya pataptap isab ma kitam: itiyaꞌ Rū-na bay pamuwan eꞌna boꞌ patꞌnnaꞌ ma deyom pangatayantam. 14 Bay ya taꞌndaꞌ kami, maka kami isab saksiꞌ in si Isa bay sinōꞌ piꞌitu eꞌ Mmaꞌna Tuhan boꞌ kalappasanna manusiyaꞌ kamemon. 15 Sasuku magpasabꞌnnal in si Isa Anak Tuhan, pataptap du Tuhan ma aꞌa inān, maka iya isab pataptap ma Tuhan. 16 Pasangdolantam lasa Tuhan ya kataꞌuwantam asal.
Tuhan ya poꞌonan lasa, jari sasuku pasangdan alasa ma Tuhan maka ma pagkahina, pataptap iya ma Tuhan, maka Tuhan isab pataptap ma iya. 17 Pinasampulnaꞌ lasatam supaya kita mbal agawa bang taꞌabut llaw pangahukum Tuhan ma manusiyaꞌ. Mbal kita tināw sabab saliꞌ du kahālantam ma dunya itu maka kahālan Al-Masi. 18 Bang bꞌnnal toꞌongan lasata, mbal du kalamuran tāw, sabab bang tinubus na lasata pahalam tāwta. Sasuku masi makananam tāw halam giꞌ asampulnaꞌ lasana, sabab tināw iya bininasa eꞌ Tuhan.
19 Angkan kitam alasa ma Tuhan sabab dahū iya bay alasahan kitam. 20 Bang aniyaꞌ gantaꞌ amūng in iya alasa ma Tuhan boꞌ masi kabꞌnsihanna pagkahina, putingan aꞌa inān. Sabab bang mbal kalasahanna pagkahina ya taꞌndaꞌna, daka buwattingga eꞌna alasahan Tuhan ya halam taꞌndaꞌna. 21 Ya na itu panohoꞌan Al-Masi ma kitam: sasuku alasa ma Tuhan subay alasa isab ma pagkahina.