5
Daꞌugantam min Kalaꞌatan Dunya
1 Sasuku magkahagad in si Isa asal Al-Masi ya tapeneꞌ eꞌ Tuhan, aꞌa inān anak Tuhan. Bang kita alasa ma aꞌa, kalasahanta isab anakna. 2 Minnēꞌ kataꞌuwantam, bang kita alasa ma Tuhan maka bang beyaꞌta isab panohoꞌanna, tantu kita alasa ma panganakna. 3 Hatina bang kita sabꞌnnal alasa ma Tuhan, subay beyaꞌta panohoꞌanna. Maka panohoꞌanna mbal sakit abuhat. 4 Sabab sasuku kita bay tahinang anak eꞌ Tuhan, taraꞌugta na sasat dunya itu. Min pangandolta ma Al-Masi ya angkan kita makapangandaꞌug. 5 Jari sai lagiꞌ ya makaraꞌug min kalaꞌatan dunya itu? Luwal sasuku ya amarassaya ma si Isa, ya Anak Tuhan.
Saksiꞌ Pasal si Isa Al-Masi
6 Si Isa Al-Masi bay piꞌitu ni dunya labay min boheꞌ maka lahaꞌ. Nggaꞌi ka hal boheꞌ, sagōꞌ lahaꞌ isab bay kamatayanna. Rū Tuhan ya anaksiꞌ sabab in iya poꞌonan kasabꞌnnalan. 7 Manjari maguyun tꞌllu saksiꞌ itu: 8 Rū Tuhan, maka boheꞌ, maka lahaꞌ. 9 Magkahagad kita bang saksiꞌ min manusiyaꞌ, sagōꞌ akosog lagiꞌ saksiꞌ min Tuhan sabab saksiꞌ Tuhan koꞌ, ya bay pangallamna pasal Anakna. 10 Manjari sasuku amarassaya ma Anak Tuhan, aniyaꞌ isab saksiꞌ ma deyom itikadna. Sagōꞌ sasuku mbal amarassaya ma Tuhan, amahiputing iya ma Tuhan pagka halam kahagadna panaksiꞌ ya bay pamuwan eꞌ Tuhan pasal anakna. 11 Ya na itu lapal saksiꞌ min Tuhan: Tuhan ya bay amuwanan kitam kallum kakkal ni kasaumulan, maka kallum kakkal itu bay min Anakna. 12 Sasuku parakayuꞌ toꞌongan ni Anak Tuhan, ma iya asal kallum itu. Sasuku isab halam makarakayuꞌ, halam aniyaꞌ kallumna kakkal.
Pasal Kallum Kakkal
13 Sulatanta kam boꞌ kataꞌuwanbi in kaꞌam taga-kallum kakkal salama-lama, sasuku kam amarassaya ma Anak Tuhan. 14 Halam aniyaꞌ hawal-hawaltam paharap ni Tuhan, sabab tantu kinale ai-ai panabbuttam bang paꞌin min kahandakna. 15 Kataꞌuwantam isab, tantu kitam pinaniyaꞌan ai-ai bay panabbuttam.
16 Bang aniyaꞌ makaꞌndaꞌ danakanna magdusa boꞌ nggaꞌi ka dusa pagmulkaꞌan Tuhan, subay iya angamuꞌ tabang ni Tuhan. Jari kabuwanan kallum danakanna heꞌ bang paꞌin nggaꞌi ka dusa pagmulkaꞌan. Bꞌnnal aniyaꞌ dusa pagmulkaꞌan Tuhan, mbal yukku in kaꞌam subay angamuꞌ-ngamuꞌ pasal dusa buwattēꞌ. 17 Dusa asal kahinangan alaꞌat kamemon, sagōꞌ aniyaꞌ dusa mbal pagmulkaꞌan Tuhan.
18 Kataꞌuwanta, sasuku bay tahinang panganak Tuhan mbal pinasangdan dusana sabab nihampanan iya eꞌ Anak Tuhan, ati mbal ya taꞌabut eꞌ saitan Patilaꞌatun. 19 Kataꞌuwanta in kitam sukuꞌ Tuhan na, sagōꞌ in aꞌa kahekaꞌan ma dunya itu masi kapagbayaꞌan eꞌ saitan Patilaꞌatun. 20 Kataꞌuwanta, in Anak Tuhan bay piꞌitu ni dunya sampay amuwanan kita panghati boꞌ supaya kataꞌuwanta Tuhan bꞌnnal. Maka parakayuꞌ na kita ni Tuhan bꞌnnal itu maka ni Anakna si Isa Al-Masi. Ya na itu Tuhan bꞌnnal, iya ya poꞌonan kallum kakkal.
21 Saga anak-mpuku, pahalliꞌ kam boꞌ kam mbal kapagtuhanan eꞌ saddī min Tuhan. Wassalam