3
Saga Panganak Tuhan
1 Mbal tapulaꞌ-pulaꞌ lasa Mmaꞌtam ma kitam. Min kaheya lasana angkan kitam niōnan anak Tuhan na. Bꞌnnal isab, anak Tuhan na kitam. Mbal ataꞌuwan Tuhan kahekaꞌan aꞌa ma dunya itu, angkan kitam mbal takilā eꞌ sigām. 2 Saga bagay kalasahanku, anak Tuhan kitam buwattinaꞌan, boꞌ halam giꞌ pinabukis bang buwattingga kasōngantam. Daipara kataꞌuwantam, bang pabīng na Al-Masi, makasaliꞌ kitam ni iya sabab makaꞌndaꞌ kitam pangluwahanna. 3 Jari sai-sai aniyaꞌ holatanna buwattēꞌ, sinussi eꞌna pangatayanna boꞌ pasaliꞌna ni kasussi Al-Masi.
4 Makalanggal saraꞌ Tuhan sasuku makahinang dusa, sabab in niōnan dusa itu saliꞌ du maka langgal saraꞌ. 5 Kataꞌuwanbi bang ai mohotna angay palahil Al-Masi ni dunya. Bay iya piꞌitu amuwasan paldusahan manusiyaꞌ, sagōꞌ halam toꞌongan aniyaꞌ dusa ma iya. 6 Jari mbal kasangdanan magdusa sasuku taptap ma Al-Masi. Malaingkan sasuku angandusa na paꞌin, halam bay takilāna Al-Masi, halam isab kataꞌuwanna.
7 Saga anak-mpuku, pahalliꞌ kam boꞌ kam mbal kaꞌakkalan eꞌ sai-na. Sasuku maghinang kabontolan aꞌadil asal, saliꞌ Al-Masi. 8 Sasuku angandusa na paꞌin, sukuꞌ iya ma nakuraꞌ saitan, sabab saitan eꞌ bay magdusa asal sangay min awal tagnaꞌ. Angkan Anak Tuhan bay palahil piꞌitu ni dunya, boꞌ pakaꞌatna kahinangan nakuraꞌ saitan eꞌ. 9 Mbal maghinang dusa sasuku tahinang anak eꞌ Tuhan, sabab inaꞌan kajarihan Tuhan ma deyom pangatayanna. Mbal iya makasangdan magdusa sabab Tuhan ya pagꞌmmaꞌanna. 10 Aniyaꞌ pagbiddaꞌan saga anak Tuhan maka anak nakuraꞌ saitan angkan tasilangtam. Sasuku mbal angahinang kabontolan maka mbal alasa ma pagkahina, mbal kaōnan anak Tuhan.
Pasal Paglasa-liyasahi
11 Ya itu lapal nasihat bay takalebi, tagnaꞌ kapameyaꞌbi ma Al-Masi: in kitam subay maglasa-liyasahi. 12 Daꞌa subay panunurantam si Kabil, ya bay amapatay siyalina lꞌlla. Sukuꞌ saitan Patilaꞌatun iya, sabab alaꞌat asal bay kahinanganna, boꞌ arapun abontol bay kahinangan siyalina heꞌ. 13 Daꞌa kam ainu-inu, saga danakan, bang kam kinabꞌnsihan eꞌ saga aꞌa ma dunya itu. 14 Kataꞌuwanbi kahālantam tagnaꞌ, sapantun kitam aꞌa magpatayan, sagōꞌ papinda na kitam min kamatay tudju ni kallum. Angkan kataꞌuwantam, sabab alasa na kitam ma pagkahita bebeyaꞌan Al-Masi. Paddas ma deyom kamatay sasuku mbal alasa. 15 Sasuku abꞌnsi ma pagkahina, aꞌa inān saliꞌ pamomonoꞌ. Maka kataꞌuwanbi asal, bang aꞌa amonoꞌ pagkahina manusiyaꞌ halam iya bay kaniyaꞌan kallum kakkal.
16 Min Al-Masi ya kataꞌuwantam dī lasa bang buwattingga, sabab bay pinaglillaꞌ eꞌna kallumna gantiꞌtam. Maka ya du kitam, subay kitam magmalillaꞌ amatay ma sabab saga pagkahitam jamaꞌa Al-Masi. 17 Bang saupama aniyaꞌ aꞌa taga-kaniyaꞌ makaꞌndaꞌ pagkahina ma deyom kasigpitan boꞌ mbal kaꞌaseꞌanna, painay eꞌna alasahan Tuhan? 18 Saga anak-mpuku, daꞌa kitam alasa hal min kuwit bowaꞌta. Subay min atay-poteꞌ maka min itikad abontol maka min kahinangan bꞌnnal.
19 Jari bang kita alasa ma pagkahita min deyom atay, minnēꞌ kita manantuhi in kita beyaꞌ du ma kasabꞌnnalan, ati ahantap pangatayantam ma alopan Tuhan. 20 Minsan aniyaꞌ amadlak ni ataytam pasal bay dusata tagnaꞌ, mbal kita sakit asusa sabab alalom giꞌ pangitaꞌu Tuhan min ai-ai tananam eꞌ itikadta. Kasakupan eꞌ Tuhan ai-ai kamemon. 21 Angkanna, saga bagay kinalasahan, bang halam aniyaꞌ sallaꞌ atawa dusa tananamta ma deyom pangatayanta, mbal kita tināw ma matahan Tuhan. 22 Makasambut kita min iya ai-ai amuꞌta sabab beyaꞌta saga panohoꞌanna. Hinangta isab ai-ai makasulut atayna. 23 Ya na itu panohoꞌanna: subay kita magkahagad ma ōn Anakna si Isa Al-Masi, maka subay maglasa-liyasahi isab buwat bay panohoꞌan kita. 24 Pataptap du ma Tuhan sasuku maghinang panohoꞌanna, maka pataptap isab Tuhan ma iya. Angkan kataꞌuwanta in Tuhan pataptap na ma kita, ma sabab Rū ya bay patꞌnnaꞌna ma deyom pangatayanta.