2
Aniyaꞌ Amogbogan Kita ma Haddarat Tuhan
1 Saga anak-mpuku, sulatanta kam sulat itu supaya kam mbal magdusa. Malaingkan bang aniyaꞌ gantaꞌ makarusa, aniyaꞌ du amogbogan kita ma alopan Tuhan, ya na si Isa Al-Masi, ya Aꞌadil. 2 Baran Al-Masi bay tahinang pagkulban pangampunan dusatam. Maka nggaꞌi ka dusatam hal, sampay dusa manusiyaꞌ kamemon ma dunya itu.
3 Bang beyaꞌta panohoꞌan Tuhan, minnēꞌ kita makatantu in kita ataꞌuwan iya. 4 Bang aniyaꞌ gantaꞌ magpaꞌin in iya ataꞌuwan Tuhan boꞌ mbal beyaꞌna panohoꞌanna, aꞌa inān putingan maka halam aniyaꞌ kasabꞌnnalan ma deyom kajarihanna. 5 Saguwāꞌ sasuku ameyaꞌ ma lapal palman Tuhan, tantu ajatu lasa Tuhan ma kajarihan aꞌa inān. Bang kita makarakayuꞌ sabꞌnnal-bꞌnnal ma Tuhan, buwattitu pangilahanna: 6 sasuku ahꞌlling in iya pataptap ameyaꞌ ma Tuhan, panunuranna kaul-piꞌil si Isa waktu kamaituna lagiꞌ ma dunya.
Panohoꞌan Bahaꞌu
7 Saga bagay kalasahanku, nggaꞌi ka panohoꞌan bahaꞌu ya panulatku itu ma kaꞌam. Panohoꞌan tagnaꞌ giꞌ koꞌ itu, ya bay ma kaꞌam sangay min katagnaꞌ kapagkahagadbi ma Al-Masi, hatina lapal pagnasihat ya bay takalebi. 8 Saguwāꞌ minsan bay atꞌggol ma kaꞌam, patut niōnan panohoꞌan bahaꞌu sabab manyatakan kabꞌnnalna ma kajarihan Al-Masi maka ma kajarihanbi. Anginut na palabay kalendoman, anahaya na in sawa bꞌnnal.
9 Sasuku magpinaꞌin in iya ma deyom karantaꞌan, boꞌ kabꞌnsihanna na paꞌin pagkahina bebeyaꞌan si Isa, masi iya ma deyom kalendoman sampay ni kabuwattituhan. 10 Sagōꞌ sasuku alasa ma pagkahina, karantaꞌan iya pataptapanna, maka halam aniyaꞌ makabowa iya angahinang dusa. 11 Sagōꞌ masi giꞌ ma deyom kalendoman sasuku abꞌnsi ma pagkahina. Mbal kataꞌuwanna bang piꞌingga ya patudjuhanna sabab abuta iya eꞌ kalendoman.
12 Sulatanta kam, saga anak-mpuku,
sabab taꞌampun na dusabi min ōn Al-Masi.
13 Sulatanta kam isab, saga kamattoꞌahan,
sabab kataꞌuwanbi Al-Masi, ya min katagnaꞌ awal.
Sulatanta kam isab, saga kasubulan,
sabab taraꞌugbi nakuraꞌ saitan, ya patilaꞌatun.
Sulatanta kam isab, saga anak-mpuku,
sabab kataꞌuwanbi na Mmaꞌbi Tuhan.
14 Sulatanta kam isab, saga kamattoꞌahan,
sabab kataꞌuwanbi Al-Masi,
ya bay asal min katagnaꞌ awal.
Sulatanta kam isab, saga kasubulan,
sabab akosog kam maka patꞌttog palman Tuhan
ma deyom pangatayanbi.
Taraꞌugbi isab nakuraꞌ saitan, ya patilaꞌatun.
15 Daꞌa panuyuꞌinbi dunya pinjaman itu maka kahinanganna, sabab mbal alasa ma Mmaꞌtam Tuhan sasuku amanuyuꞌan kahinangan dunya itu. 16 Sabab nggaꞌi ka min Tuhan saga kahinangan dunya itu: buwat saga napsutam alaꞌat, maka ai-ai kinarandaman mata, maka ai-ai pagmalangkahian manusiyaꞌ. Luwas koꞌ itu min alam dakayuꞌ. 17 Palabay du alam itu maka kanapsuhanna, sagōꞌ sasuku maghinang kabayaꞌan Tuhan allum sampay ni kasaumulan.
Banta Al-Masi
18 Saga anak-mpuku, song na patobtob dunya itu. Bay na kam kahakaꞌanku, aniyaꞌ banta Al-Masi palahil piꞌitu. Aheka na isab piꞌitu buwattinaꞌan amantahan iya, angkan kataꞌuwanta asekot na katapusan dunya itu. 19 Bay palamud saga banta inān ma kitam tagnaꞌ, sagōꞌ waꞌi na sigām pasaddī sabab nggaꞌi ka dambeyaꞌan toꞌongan maka kitam. Bang bay sigām bꞌnnal dambeyaꞌan maka kitam, bay du sigām pataptap ma kitam. Sagōꞌ pasaddī na sigām boꞌ mattan in sigām nggaꞌi ka min pameyaꞌantam.
20 Aniyaꞌ bay pamatulun ni kaꞌam eꞌ Mahasussi, angkan kaꞌam kamemon taga-pangitaꞌu. 21 Ya poꞌon aku anulat itu ni kaꞌam, nggaꞌi ka ma sabab kam aꞌawam pasal panduꞌ bꞌnnal, sagōꞌ ma sabab kasakupanbi na. Kataꞌuwanbi isab, halam aniyaꞌ puting paluwas min kasabꞌnnalan. 22 Na, sai bahāꞌ putingan? Ya aminaꞌin in si Isa nggaꞌi ka Al-Masi tapeneꞌ eꞌ Tuhan. Banta Al-Masi in aꞌa putingan heꞌ, sinulak eꞌna Tuhan maka Anakna. 23 Sabab sai-sai anulak si Isa Anak Tuhan, tasulakna isab Tuhan. Maka sai-sai angaku si Isa in iya Anak Tuhan, inaꞌan isab Tuhan Mmaꞌ ma aꞌa inān.
24 Angkan kam amay-amayanku: pasobsobunbi lapal bay takalebi tagnaꞌ ni deyom panahuꞌanbi. Bang tauꞌbi pahogot, kakkal du kapagdakayuꞌbi maka Anak Tuhan maka Mmaꞌna. 25 Panganjanjiꞌ Al-Masi koꞌ itu ma kitam, hatina kallum taptap ni kasaumulan.
26 Angkan buwattēꞌ panulatku ma kaꞌam boꞌ tataꞌubi pasal saga aꞌa ya bilahi amowa kaꞌam pasaddī min kasabꞌnnalan. 27 Sagōꞌ patꞌttog ma kaꞌam ya bay pamatulun eꞌ Al-Masi, mbal kam magkagunahan panduꞌ min sai-sai. Sabab kapanduꞌan na kam eꞌ Rū Sussi ya pamatulun ma kaꞌam, maka bꞌnnal sadja pamanduꞌna, nggaꞌi ka puting. Jari beyaꞌunbi pamanduꞌna boꞌ supaya kam taptap ma Al-Masi.
Panganak Tuhan
28 Na, saga anak-mpuku, pataptap kam ma Al-Masi boꞌ kam mbal tināw ma waktu kabalikna, ati mbal magkaiyaꞌan paꞌalop ma iya bang taꞌabut llaw kapiꞌituna pabīng.
29 Pagka kataꞌuwanbi in Al-Masi asal adil, kataꞌuwanbi sasuku maghinang kaꞌadilan tahinang anak Tuhan isab.