1 YAHIYA
1
Sulat Kaissana min si
YAHIYA
1 Sulatanta kam pasal si Isa Al-Masi, ya palman pamoꞌonan kallum. Min awal tagnaꞌ asal palman itu. Bay iya takale kami, bay iya taꞌndaꞌ maka mata kami. Tatanding iya maka kaꞌntanan eꞌ kami. 2 Bay na palahil ya niōnan Poꞌonan Kallum. Bay iya taꞌndaꞌ kami, jari kami itu saksiꞌna angkan kami angahakaꞌan kaꞌam ma pasalna, ya amuwan kallum kakkal. Bay iya ma Mmaꞌna Tuhan asal min kaꞌasalna, boꞌ bay paꞌndaꞌ ni kami. 3 Jari in bay taꞌndaꞌ maka takale kami, ya na heꞌ pamataꞌu kami ni kaꞌam boꞌ supaya kam pauyun ma kami magdaꞌatay maka Mmaꞌtam Tuhan sampay anakna si Isa Al-Masi. 4 Sulatanta kam sulat itu boꞌ supaya ajukup kakoyagantam.
Tuhan Ya Poꞌonan Karantaꞌan
5 Ya na itu lapal bay takale kami min si Isa Al-Masi, lapal pangahaka kami ma kaꞌam: in Tuhan asal poꞌonan kasawahan. Halam aniyaꞌ kalendoman ma kajarihanna minsan dangkuriꞌ. 6 Angkan koꞌ, bang kita gantaꞌ magpaꞌin in kita daꞌatay maka Tuhan boꞌ masi kita ma deyom kalendoman dusa, putingan kita pagka mbal ameyaꞌ ma kasabꞌnnalan. 7 Kakkal Tuhan ma deyom karantaꞌan, jari bang kita pasengod ni iya pataptap ma karantaꞌan, daꞌatay kita. Maka sinussi kita min dusata kamemon sabab min lahaꞌ si Isa Anak Tuhan.
8 Abila yukta halam aniyaꞌ dusata, angakkalan kita di-ta maka halam aniyaꞌ kasabꞌnnalan ma deyom kajarihanta. 9 Sagōꞌ bang kita magpasabꞌnnal ni Tuhan pasal paldusahanta, tantu kita niampun. Sinussi isab kita min kalaꞌatanta kamemon sabab tinuman eꞌ Tuhan janjiꞌna, maka abontol kahinanganna. 10 Bang yukta in kita halam bay makarusa, saliꞌ pahiputingta Tuhan, ati halam pasobsob lapal palmanna ni deyom atayta.