5
Pagmattoꞌahan, Balu Dꞌnda, maka Ata
1 Daꞌa ka amahꞌllingan lꞌlla aumul giꞌ min kaꞌa. Bang saupama aniyaꞌ pamanduꞌnu ma iya, palunukun bissalanu buwat eꞌnu amissala ni mmaꞌnu lissi. Saga lꞌlla abataꞌ lagiꞌ, bistahun saliꞌ danakannu. 2 Saga dꞌnda aumul min kaꞌa, pagaddatin buwat ka-eꞌnu ma inaꞌnu lissi. Saga dꞌnda abataꞌ lagiꞌ, pagaddatin sigām buwat danakannu isab, ma halam aniyaꞌ pikilannu saddī tudju ni sigām.
3 Na, in pasal saga dꞌnda abalu angandol ma si Isa Al-Masi, ya halam taga-kampung amatuntul sigām, pagaddatin sigām. 4 Sagōꞌ bang balu dꞌnda aniyaꞌ anakna atawa mpuna, anak-mpuna heꞌ subay magkaꞌinagonan kamattoꞌahan sigām. Bainat koꞌ inān in sigām magtaꞌat sabꞌnnal-bꞌnnal ni Tuhan, ati katungbasan eꞌ sigām bay kamaleꞌan mattoꞌa sigām atawa mboꞌ sigām angipat sigām tagnaꞌ. Jari bang buwattēꞌ hinang sigām, kasulutan Tuhan. 5 Saguwāꞌ bang balu dꞌnda karangan-danganan, halam toꞌongan aniyaꞌ angupiksaꞌ iya, Tuhan sadja ya kaholatanna. Angamuꞌ-ngamuꞌ na paꞌin iya ni Tuhan, mikitabang isab ma iya llaw-sangom. 6 Sagōꞌ bang aniyaꞌ balu dꞌnda hal angandūlan napsu baranna, sapantun iya aꞌa amatay minsan masi giꞌ allum baranna. 7 Pasampayun pamanduꞌku itu ni saga bebeyaꞌan si Isa mailu, supaya halam aniyaꞌ pagsababan panāꞌan aꞌa ma sigām. 8 Sagōꞌ bang aniyaꞌ aꞌa mailu mbal bilahi amahilalaꞌ lahasiyaꞌna, ya lagiꞌna bang mbal amahilalaꞌ aꞌa ma okomanna, aꞌa inān angꞌbba na min panduꞌ ya pagkahagarantam, maka akalap giꞌ dusana min aꞌa mbal angandol ma Tuhan.
9 Na, bang takdil ni pagsusulatan balu dꞌnda, ya patut nilapay bang dꞌnda taꞌabut nnompūꞌ tahun umulna, maka balu halam bay maghꞌlla ni saddī. 10 Ya patut nilapay, bang balu abantug ma sabab hinangna ahāp, buwat pamiꞌatna ma panganakna, pamahilalaꞌna ma saga aꞌa makani-lumaꞌna, maka areyoꞌ pangatayanna angayuput saga pagkahina sukuꞌ Tuhan. Subay dꞌnda anabang saga aꞌa taluwaꞌ kasusahan, maka atuyuꞌ isab angahinang kahāpan indaginis. Ya na inaꞌan ginis balu ya taluwaꞌ sinulat.
11 Sagōꞌ bang balu dꞌnda abataꞌ giꞌ, daꞌa sigām lapayun ma deyom pagsulatan ilu, sabab aluhay apinda pikilan sigām. Bang sigām tꞌkkahan bayaꞌ maghꞌlla, angꞌbba du sigām min paghinang sigām ma Al-Masi. 12 Jari makarusa sigām pagka mbal na taisbat bay janjiꞌ sigām ni Tuhan tagnaꞌ kabalu sigām. 13 Gana-gana sigām angalisuꞌ maghinang, ati pabiyaksa sigām angalatag kalumaꞌan. Maka nggaꞌi ka isab hal eꞌ-i, sabab tagihan sigām maglituhan suli-suli ma pasal aꞌa kaseheꞌan. Palamud sigām ma palkalaꞌ nggaꞌi ka sukuꞌ sigām, maka pinagsuli-suli na paꞌin eꞌ sigām ya mbal wajib binissala. 14 Bang ma aku, ahāp lagiꞌ bang saga balu masi giꞌ abataꞌ maghꞌlla pabīng maka maganak maka angahatul deyom lumaꞌ sigām. Manjari halam aniyaꞌ laꞌat tabissala eꞌ saga bantatam ma pasalan kitam magpangandol ma si Isa Al-Masi. 15 Angkan buwattitu pamanduꞌku, sabab aniyaꞌ saga balu pataikut na min Tuhan boꞌ ameyaꞌ ma nakuraꞌ saitan. 16 Sagōꞌ bang dꞌnda bebeyaꞌan si Isa taga-lahasiyaꞌ balu dꞌnda, ya dꞌnda inān subay angupiksaꞌ iya. Mbal manjari pinaupiksaꞌ eꞌna ma saga Almasihin kaseheꞌ. Sarang ma sigām amahilalaꞌ saga dꞌnda balu ya halam toꞌongan aniyaꞌ magkaꞌinagonan sigām.
17 Na, in pasal saga mattoꞌa ya ahāp pamatuntul sigām ma kaꞌam jamaꞌa si Isa Al-Masi ilu, patut tungbas sigām nilipat duwa. Labi-labi giꞌ isab bang mattoꞌa amuspusan kosogna magnasihat maka magpanduꞌ. 18 Sabab tasulat asal ma deyom Kitab, ya yuk-i, “Daꞌa sampongunbi bowaꞌ sapiꞌ pasaltaꞌ anganggisaꞌ pai.” Maka aniyaꞌ isab ayat Kitab dakayuꞌ, ya yuk-i, “Bang aꞌa sinōꞌ maghinang, patut iya tinambahan.” 19 Bang saupama aniyaꞌ anuntutan dakayuꞌ mattoꞌabi, daꞌa magtūy asipunbi tuntut eꞌ. Subay aniyaꞌ duwangan atawa tꞌllungan ya makasaksiꞌ ma dusana. 20 Bang aniyaꞌ gantaꞌ makarusa, biꞌatunbi aꞌa inān ma pangꞌndaꞌ saga bebeyaꞌan si Isa kamemon, boꞌ supaya amintāng aꞌa kaseheꞌan maka tināw isab anunuran aꞌa bay makarusa heꞌ.
21 Timuti, saksiꞌku Tuhan maka si Isa Al-Masi maka saga malaꞌikat asussi, sohoꞌta ka toꞌongan angisbat ai-ai ya panohoꞌanku kaꞌa ma deyom sulat itu. Daꞌa ka amapagbiddaꞌ ma aꞌa minsan sai. Ai-ai hinangnu daꞌa ka angandapitan dangan ma saukat kalasahannu. 22 Daꞌa ka magdaiꞌ-daiꞌ ameneꞌ aꞌa nihinang pagmakōkan ma palhimpunanbi. Tandingun dahū boꞌ kinataꞌuwan addat-tabiꞌatna. Daꞌa ka palamud ma dusa aꞌa kaseheꞌan. Pahalliꞌ ka ma barannu boꞌ asaltun kaul-piꞌilnu.
23 Daꞌa hal boheꞌ ya inumnu, sagōꞌ anginum ka isab dangkuriꞌ binu-anggul panambal bꞌttongnu, sabab maumu ka magsaki-saki.
24 Aniyaꞌ saga aꞌa taꞌndaꞌan di-na paldusahan sigām, maka kataꞌuwanta in sigām taga-dusa angkan sigām tantu nihukum ma sinosōng. Aniyaꞌ isab saga aꞌa kaseheꞌan mbal magtūy taꞌndaꞌ dusa sigām. Subay waktu sinōng boꞌ yampa kinataꞌuwan. 25 Damikiyanna isab aniyaꞌ saga hinang atampal magtūy kahāpna, maka aniyaꞌ isab saga hinang mbal magtūy kinataꞌuwan. Sagōꞌ minsan buwattēꞌ, mbal katapukan, kinataꞌuwan du ma sinosōng.