4
1 Pastiꞌ asal pamissala Rū Tuhan ma pasal waktu sinōng. Yukna aheka aꞌa angꞌbba min pamogbog sigām ma panduꞌ kasabꞌnnalan boꞌ angisbat ma saitan putingan, maka ameyaꞌ isab ma panduꞌ bay minnēꞌ. 2 Saga panduꞌ itu pinalatun eꞌ saga aꞌa pangangakkal, ya mbal ataꞌu magsusun sabab abengkok itikad sigām. 3 Bang ma panduꞌ saga aꞌa itu, dusahan konoꞌ sasuku maghꞌnda atawa maghꞌlla, maka aniyaꞌ konoꞌ pagkakan mbal manjari kinakan. Asāꞌ toꞌongan panduꞌ buwattēꞌ sabab in pagkakan itu bay pinapanjari eꞌ Tuhan, angkan patut nihalal maka pinagsukulan eꞌ sasuku magkahagad maka makataꞌu panduꞌ bꞌnnal. 4 Ahāp asal kamemon bay pinapanjari eꞌ Tuhan, angkan subay taimaꞌta sadja bang paꞌin amuꞌanta pagsukulan ni iya. 5 Halal kinakanta kamemon ma sabab lapal Tuhan maka ma sabab pagsukulta isab.
Sosohoꞌan si Isa Al-Masi Ahāp
6 Na, Timuti, bang pamanduꞌnu saga pituwaku itu ni saga dauranakanta angandol ma si Isa Al-Masi, ahāp hinangnu. Akosog isab imannu ma sabab lapal agamatam ya pamalutannu, maka ma sabab panduꞌ kasabꞌnnalan ya pameyaꞌannu. 7 Sagōꞌ daꞌa ka angikut ma saga kissa-kissa nsaꞌ-biddaꞌ, ya halam aniyaꞌ kapūsanna. Patanamun akkal-pikilannu boꞌ taptap ahāp pameyaꞌnu ma kabayaꞌan Tuhan. 8 Bang baranta ya pakosogta, aniyaꞌ du kagunahanna minsan mbal aheya. Sagōꞌ bang pakosogta pangandolta tudju ni Tuhan supaya tabeyaꞌta kabayaꞌanna, aheya toꞌongan kagunahanna. Sabab minnēꞌ kita tabowa ni kahāpan, nggaꞌi ka hal ma dunya ītu, sampay isab ma dunya dakayuꞌ.
9 Bꞌnnal kabtangan itu, wajib niꞌisbat kamemon. 10 Ya angkan kitam magsangsāꞌ na paꞌin maka magtuyuꞌ na paꞌin magnasihat, sabab pangasahantam Tuhan kakkal salama-lama. In iya isab angalappas ma manusiyaꞌ kamemon min hukuman dusa, labi-lubaꞌna saga aꞌa magkahagad ma iya.
11 Manjari, Timuti, panduꞌin pahāp maka sohoꞌun bineyaꞌ saga panohoꞌan itu. 12 Daꞌa ka aiyaꞌ amanduꞌ minsan aniyaꞌ amareyoꞌ-deyoꞌ kaꞌa ma sabab abataꞌ lagiꞌ ka. Sagōꞌ subay ahāp bowahannu kamemon boꞌ ka manjari panunuran eꞌ saga aꞌa angandol mailu ma si Isa Al-Masi. Subay ahāp kaul-piꞌilnu, subay alasa ma pagkahinu, subay akosog pangandolnu ma Tuhan, maka subay halam aniyaꞌ laꞌat ma deyom pikilannu. 13 Satꞌggolku mbal giꞌ makapiꞌilu, patuyuꞌ ka amassa min Kitab sakahabaꞌ waktu kapagtipunbi saga jamaꞌa si Isa. Patuyuꞌ ka anganasihat maka amanduꞌan sigām. 14 Daꞌa haman-hamanun kapandayannu, ya bay min Rū Sussi. Kapandayan itu bay pamuwan kaꞌa ma waktu palabay, pagka aniyaꞌ lapal min Tuhan bay binissala ma pasalnu, maka kaꞌa bay pinatꞌnnaꞌan tangan eꞌ saga pagmattoꞌahan.
15 Hinangun kamemon ya pamahinang kaꞌa ma deyom sulat itu. Patukid ka toꞌongan, boꞌ supaya taꞌndaꞌ eꞌ aꞌa kamemon ahāp kasōngannu. 16 Kamayaꞌ-mayaꞌ ka ma barannu sampay ma pamanduꞌnu. Hinangun na paꞌin ai-ai panohoꞌanku itu ma kaꞌa. Sabab bang itu pagtuyuꞌannu, nggaꞌi ka hal kaꞌa ya lappasan min hukuman dusa, sagōꞌ sasuku akale ma lapalnu.