3
Pagmakōkan ma Palhimpunan saga Jamaꞌa si Isa
1 Bꞌnnal kabtangan itu, ya yuk-i, “Bang aꞌa angangut pinatꞌnnaꞌ magmakōk ma saga jamaꞌa si Isa, ahāp pangangutna.” 2 Subay halam aniyaꞌ laꞌat atawa sāꞌ panāꞌan aꞌa magmakōk. Subay dakayuꞌ du hꞌndana, subay iya ahantap ma ai-ai hinangna, subay ahāp pikilanna maka ahāp addatna. Bang aniyaꞌ pehēꞌ ni lumaꞌna subay paꞌiddana toꞌongan. Subay iya apanday isab amanduꞌ ma saga seheꞌna. 3 Subay iya nggaꞌi ka aꞌa maglalango. Subay iya mbal abꞌngngis sagōꞌ subay ahāp bowahanna ni kamemon. Subay iya mbal pangalulugat, subay mbal napsuhan ma pilak. 4 Subay ahāp eꞌna angahatul anak-hꞌndana, maka in iya baranna subay pinagaddatan eꞌ panganakna. Panohoꞌanna isab subay bineyaꞌ eꞌ sigām. 5 Sabab bistahunbi, bang aꞌa pinatꞌnnaꞌ nakuraꞌ boꞌ mbal ataꞌu angahatul ma anak-hꞌndana, buwattingga eꞌna angahatul katimukan saga aꞌa sukuꞌ Tuhan? 6 Bang aꞌa sōd bahaꞌu ni si Isa Al-Masi mbal iya makajari pinatꞌnnaꞌ nakuraꞌ sabab mbal giꞌ ahogot pangandolna, gana-gana palanga atayna ati pinatꞌkkahan iya hukuman, buwat bay hukuman ma nakuraꞌ saitan. 7 Sagōꞌ ya aꞌa pinatꞌnnaꞌ pagmakōkan subay pinagaddatan asal eꞌ saga aꞌa nggaꞌi ka jamaꞌa si Isa. Sababna, bang iya gantaꞌ tasāꞌ eꞌ sigām, gana-gana iya tabowa eꞌ sasat nakuraꞌ saitan.
Magtatabang ma Palhimpunan saga Jamaꞌa si Isa
8 Na, in pasal aꞌa pinatꞌnnaꞌ magtatabang ma katimukanbi saga jamaꞌa si Isa Al-Masi, subay asaltun addat-tabiꞌat sigām, maka subay sigām mbal magduwa-dꞌllaꞌ. Subay sigām mbal maglalango maka subay mbal napsuhan ma sīn. 9 Subay sigām patotog magatay poteꞌ ma panduꞌ kasabꞌnnalan ya bay pamataꞌu eꞌ Tuhan pasal si Isa Al-Masi. 10 Subay sigām sinulayan dahū, jari bang kapandogahan na in addat sigām ahāp, makajari na sigām pinatꞌnnaꞌ magtatabang ma saga nakuraꞌ.
11 Damikiyanna hꞌnda sigām, subay ahāp isab addat-tabiꞌat sigām maka subay mbal biyaksa angalituhan suli-suli. Subay isab mbal angandūl ma napsu sigām, maka subay kapangandolan ma ai-ai indaginis. 12 Saga aꞌa pinatꞌnnaꞌ magtatabang itu subay dakayuꞌ du hꞌndana maka subay ahāp eꞌna angahatul anak-hꞌndana maka sasuku ma okomanna. 13 Jari bang ahāp eꞌ saga aꞌa magtatabang itu maghinang kahinangan sigām, pinaheya du ōn sigām, ati makatawakkal sigām amissala ma pasal pangandol ni si Isa Al-Masi.
Pasal Bay Pamataꞌu eꞌ Tuhan
14 Na, Timuti, buwattitu panulatku ma kaꞌa sabab angasa aku pasaꞌut piꞌilu. 15 Sagōꞌ bang aku tinaggahan, kataꞌuwannu du min sulat itu bang buwattingga bowahan saga aꞌa ma deyom okoman Tuhan, hatina ma palhimpunanbi saga aꞌa sukuꞌ Tuhan ya kakkal salama-lama. In palhimpunan ilu ibarat papagan maka hāg ya pasangdolan panduꞌ kasabꞌnnalan itu. 16 Halam aniyaꞌ kalu-kaluna, alalom sidda panduꞌ agamatam, panduꞌ pasal si Isa Al-Masi ya bay halam kinataꞌuwan, sagōꞌ pinataꞌu na eꞌ Tuhan.
Bay iya palahil piꞌitu magpabaran manusiyaꞌ,
sinaksiꞌan iya eꞌ Rū Sussi in iya aꞌadil.
Taꞌndaꞌ iya eꞌ baꞌanan malaꞌikat.
Pinagnasihat iya ni palbangsahan kamemon,
pinagkahagad iya eꞌ saga aꞌa ma kaluhaꞌan dunya.
Tabowa iya paꞌangkat ni kasahayaꞌan sulgaꞌ.