2
Pasal Pangarap ni Tuhan
1 Ya itu saga pamituwaku: in kitam bebeyaꞌan si Isa subay anabbut Tuhan, subay angamuꞌ tabang ni iya maka magsarang-sukul. Subay kitam angamuꞌ-ngamuꞌ ma pasal aꞌa kamemon, 2 ma pasal saga sultan maka aꞌa kamemon taga-kapatut magparinta boꞌ supaya asannang maka ahantap paglahattam, samantalaꞌ kitam magmatāw ma Tuhan min addat-tabiꞌat asaltun. 3 Landuꞌ ahāp bang buwattēꞌ bowahantam, makasulut atay Tuhan ya Manglalappas. 4 Ya kabayaꞌan Tuhan itu, in manusiyaꞌ kamemon subay lappasan min hukuman dusa maka subay ataꞌuwan panduꞌ kasabꞌnnalan. 5 Sabab dakayuꞌ du Tuhan, maka dakayuꞌ du isab magpaꞌllot ma Tuhan maka manusiyaꞌ amapagkahāp sigām, ya na si Isa Al-Masi pagkahita manusiyaꞌ. 6 Bay paglillaꞌna kallumna pangalꞌkkat bangsa manusiyaꞌ min paldusahan sigām. Manjari, pagka amatay si Isa ma waktu bay asal panganggantaꞌ eꞌ Tuhan, minnēꞌ tatuman bang ai ya kabayaꞌan Tuhan ma manusiyaꞌ. 7 Ya na itu sababna angkan aku kawakilan eꞌ Tuhan, sinōꞌ amanduꞌ ma saga aꞌa nggaꞌi ka bangsa Yahudi, supaya sigām nasihatanku pasal pangandol ma si Isa Al-Masi maka pasal panduꞌ kasabꞌnnalan. Bꞌnnal sadja ya pahꞌllingku itu, mbal aku magputing!
8 Maingga-maingga aniyaꞌ saga jamaꞌa si Isa magtipun, ya kabayaꞌanku in kalꞌllahan subay angamuꞌ-ngamuꞌ ni Tuhan magatay poteꞌ, hinabu sigām anangga ma halam aniyaꞌ kaꞌastol atawa paglugat sigām ni sai-sai. 9 Kabayaꞌanku isab subay ahantap bowahan saga dꞌnda bang takdil ni panꞌmmek. Ya kalingkat sigām subay agantaꞌ. Buꞌun sigām subay nihatul sagōꞌ daꞌa sakit pinaꞌalti. Subay sigām daꞌa magbulawan atawa magmussaꞌ atawa magsꞌmmek ahalgaꞌ. 10 Ya makalingkat sigām saga kahinangan ahāp. Tōp asal itu ma saga dꞌnda ya magpinaꞌin in sigām magtataꞌat ma Tuhan.
11 Saga dꞌnda isab subay akale sadja bang ninasihatan, maka subay angaku pinanduꞌan. 12 Mbal tugutanku saga dꞌnda magnasihat atawa magmanda ma lꞌlla. In dꞌnda subay hal akale bang ma palhimpunanbi. 13 Sabab si Mboꞌ Adam bay pinapanjari dahū eꞌ Tuhan boꞌ yampa si Sitti Hawa. 14 Maka nggaꞌi ka si Adam ya bay kaꞌakkalan eꞌ nakuraꞌ saitan. Dꞌnda ya bay kaꞌakkalan, maka dꞌnda ya bay angalanggal saraꞌ Tuhan. 15 Malaingkan lappasan du saga dꞌnda ma paganak bang paꞌin tinuyuꞌan eꞌ sigām pangandol ma Tuhan, maka lasa sigām ma aꞌa, maka kasussi pangatayan sigām. Addat-tabiꞌat sigām isab subay ahantap na paꞌin.