1 TIMUTI
1
Sulat si Paul Kaissana ni si
TIMUTI
1 Sulat itu min aku, si Paul, aꞌa kawakilan eꞌ si Isa Al-Masi ma sabab panohoꞌan Tuhantam Manglalappas, maka ma sabab si Isa Al-Masi ya pangaholatantam. 2 Pasampayku sulat itu ni kaꞌa, Timuti, ya ōnanku anakku lahasiyaꞌ ma sabab pangandolnu ma si Isa.
Mura-murahan, bang paꞌin ka pinaniyaꞌan tatabangan eꞌ Mmaꞌtam Tuhan maka Panghūꞌtam si Isa Al-Masi. Bang paꞌin ka kinaꞌaseꞌan sampay binuwanan kasannangan deyom atay.
Pasal Saga Guru Magpanduꞌ Kaputingan
3 Na, Timuti, balikanku lagiꞌ bay panohoꞌanku ma kaꞌa, songku paꞌin atulak ni lahat Makidunya. Kabayaꞌanku subay ka patꞌddas mailu ma Epesos boꞌ supaya talāngnu saga aꞌa mailu, ya amanduꞌ saga panduꞌ nggaꞌi ka bꞌnnal. 4 Sohoꞌun sigām pahali magsuli-suli pasal kissa hinangan manusiyaꞌ maka saga salsila panugsugan kaꞌmboꞌ-mboꞌan sigām, sabab hal paglugatan. Mbal amowa ni maksud Tuhan, ya pamataꞌuna ma saga aꞌa angandol ma si Isa Al-Masi. 5 Ya mohotku angkan buwattitu pamituwaku, subay ajatu lasabi luwas min atay poteꞌ, maka min pikilan alanuꞌ maka min iman sabꞌnnal-bꞌnnal. 6 Sagōꞌ aniyaꞌ aꞌa bay pasihaꞌ min panduꞌku. Ya taturul eꞌ sigām saga suli-suli halam aniyaꞌ pūsna. 7 Bilahi sigām niōnan guru pagguruhan saraꞌ Tuhan, sagōꞌ mbal tahati eꞌ sigām bang ai pamanduꞌ sigām maka ai pangalogos sigām ma saga aꞌa.
8 Kataꞌuwanta in saraꞌ bay tasulat eꞌ si Musa ahāp asal, bang paꞌin apatut eꞌta angangguna iya. 9 Kataꞌuwantam isab nggaꞌi ka aꞌa adil ya pinatꞌnnaꞌan saraꞌ itu, sagōꞌ aꞌa magpangalanggal saraꞌ maka aꞌa agagga pinanduꞌan, aꞌa mbal angisbat Tuhan, maka aꞌa baldusa. Ya pinatꞌnnaꞌan saraꞌ isab saga aꞌa asabul maka aꞌa halam aniyaꞌ kannal sigām tudju ni Tuhan, beyaꞌ isab saga aꞌa amonoꞌ mattoꞌa sigām atawa pagkahi sigām manusiyaꞌ. 10 Pinatꞌnnaꞌan isab saraꞌ saga aꞌa angaliyu-lakad, maka aꞌa maghinang kasabulan, maka aꞌa anaggaw pagkahi sigām pagpilak, aꞌa magputing, aꞌa anaksiꞌ ya nggaꞌi ka bꞌnnal. Taluwaꞌ saraꞌ isab baꞌanan kahinangan ai-ai ya mbal magtaluwaꞌ maka panduꞌ bꞌnnal. 11 Panduꞌ bꞌnnal itu magtaluwaꞌ maka lapal ahāp ya pangandol ma aku eꞌ Tuhan asahaya, ya wajib pinagmahaldikaꞌan.
Aseꞌ maka Lasa Tuhan ya Pagsukulan si Paul
12 Magsukul aku ni si Isa Al-Masi Panghūꞌtam, ya amuwanan aku kosog boꞌ supaya aku makahinang hinangku. Magsukul aku ni iya sabab tabistana aku patut pangandolan, ati kawakilan aku eꞌna maghinang ma iya. 13 Kawakilan aku eꞌna minsan iya bay pahꞌllinganku pangkal ma tahun palabay, minsan bay talaꞌatku saga aꞌana maka abisa bay pangalaꞌugku ma sigām. Daipara kinaꞌaseꞌan aku eꞌna sabab ma waktu heꞌ halam giꞌ aniyaꞌ bay pangandolku ma iya, angkan aku aꞌawam in bay kahinanganku inān alaꞌat. 14 Pinalabi eꞌ Panghūꞌtam lasana maka aseꞌna ma aku, maka tinabang aku eꞌna boꞌ pasōng pangandolku. Tinabang isab aku angalasa pagkahiku. Sukuꞌtam asal kahāpan inaꞌan-i bang kitam parakayuꞌ ni si Isa Al-Masi.
15 Bꞌnnal kabtangan itu, subay tinaimaꞌ toꞌongan, ya yuk-i, “In si Isa Al-Masi bay piꞌitu ni dunya boꞌ supaya puwasanna saga aꞌa dusahan min hukuman dusa.” Bang takdil ni aꞌa dusahan, halam aniyaꞌ paliyu min aku. 16 Sagōꞌ minsan buwattēꞌ paldusahanku, bay aku kinaꞌaseꞌan toꞌongan eꞌ Tuhan ati niampun aku eꞌna. Pinaꞌndaꞌan eꞌ si Isa katuyuꞌna ma saga aꞌa dusahan, angkan aku bay imananna toꞌongan minsan aku dusahan labi min kamemon. Manjari aku itu saliꞌ suntuꞌan ma saga aꞌa magkahagad ma iya ma llaw sinōng sampay binuwanan kallum kakkal ni kasaumulan. 17 Magmahaldikaꞌ kitam ma Tuhan dakayuꞌ-kayuꞌ, ya Sultan ni kasaumulan. Mbal iya magkamatay, mbal iya taꞌndaꞌ eꞌ manusiyaꞌ. Wajib iya pinudji salama-lama. Amin.
18 Timuti, anakta ka. Pangandolku na ma kaꞌa panohoꞌan itu, ya magtaluwaꞌ asal maka palman Tuhan, ya bay binowahan kaꞌa eꞌ saga aꞌa magbobowa palman. Isbatun toꞌongan kabtangan palman itu boꞌ ahāp eꞌnu angatu ma ai-ai alaꞌat. 19 Pahogotun pangandolnu ma si Isa Al-Masi. Paisbat ka boꞌ halam aniyaꞌ dusa tahinangnu ya makasasaw pikilannu. Sabab aniyaꞌ saga aꞌa mbal ameyaꞌ ma pikilan alanuꞌ, ya angkan magkaꞌat pangandol sigām ma Tuhan. 20 Buwattēꞌ si Himinus maka si Iskandar maka kaseheꞌan lagiꞌ. Bay na sigām tukbalanku ni pangꞌntanan nakuraꞌ saitan supaya sigām amintāng ati boꞌ pahali amahꞌlling pangkal ni Tuhan.