6
1 Sasuku banyagaꞌ magpangandol ma si Isa subay magaddat toꞌongan ma saga aꞌa ya tag-dapu sigām, boꞌ supaya halam aniyaꞌ makapahꞌlling laꞌat ma Tuhan, atawa makasoway panduꞌ ya pameyaꞌantam. 2 Bang banyagaꞌ pinagdapuhan eꞌ pagkahi bebeyaꞌan si Isa, subay mbal kinulangan pagaddatna ma saukat magdanakan sigām ma deyoman Al-Masi. Ahāp lagiꞌ bang banyagaꞌ inān amahāp hinangna, ma sabab aꞌa paghinanganna heꞌ pagkahina bebeyaꞌan si Isa, aꞌa isab asal kalasahanna. Ya itu subay pamanduꞌnu ma kaseheꞌannu ilu: sohoꞌun sigām ameyaꞌ toꞌongan.
Pasal Karaya Bꞌnnal
3 Bang aniyaꞌ mailu magpanduꞌ, boꞌ saddī pamanduꞌna min panduꞌ kasabꞌnnalan bay min Panghūꞌtam si Isa Al-Masi, maka bang saddī isab min panduꞌ ya amowa kitam maghinang kabayaꞌan Tuhan, 4 na, hal magmalangkahi aꞌa inān maka halam aniyaꞌ kataꞌuwanna. Ya sadja kabayaꞌanna subay magpayod maka magsuꞌal pasal saga kabtangan. Ya kamaujuranna aniyaꞌ maglindi-lindihan, aniyaꞌ magpanganjawab, aniyaꞌ maghimumungan alaꞌat, aniyaꞌ magtunaꞌ nsaꞌ-biddaꞌ. 5 Jari magsaggaꞌ na paꞌin saga aꞌa itu. Asagut deyom pikilan sigām, maka mbal na tasilang eꞌ sigām panduꞌ kasabꞌnnalan. Ma pangannal sigām, bang sigām magagama magdaya du sigām.
6 Bꞌnnal isab, aheya untungta bang kita magsukul sadja ma ai-ai panganggantaꞌ kita. 7 Kita itu ma waktu kalahilta, aniyaꞌ bahāꞌ bay bowata ni deyom dunya itu? Halam aniyaꞌ. Damikiyanna bang kita amatay, halam aniyaꞌ tabowata pehēꞌ. 8 Angkanna kita subay mbal anawad. Bang paꞌin aniyaꞌ napakata maka panꞌmmekta, sarang na koꞌ heꞌ. 9 Sagōꞌ saga aꞌa bilahi magkarayahan, aluhay tabowa sinasat magdusa. Tajallat sigām eꞌ baꞌanan napsu ma karupangan indaginis ya amakaꞌat sigām, ati ya kamattihanna magmula du sigām ma dunya ītu sampay ma dunya dakayuꞌ. 10 Sabab napsuta ma altaꞌ ya poꞌonan laꞌat kaginisan kamemon ya nihinang eꞌ manusiyaꞌ. Aniyaꞌ isab saga aꞌa napsuhan ma altaꞌ, ati minnēꞌ sigām angꞌbbahan pangandol sigām ma si Isa Al-Masi. Ya kamaujuranna ahansul pangatayan sigām eꞌ baꞌanan kasusahan ya patꞌkka ni sigām.
Pamituwa ma si Timuti Sadja
11 Saguwāꞌ kaꞌa, Timuti, aꞌa tapeneꞌ eꞌ Tuhan, patala ka min kalaꞌatan inān kamemon. Tukirin kaul-piꞌil abontol maka pangisbat ni Tuhan, maka pangandol ma Al-Masi, maka lasa ma pagkahinu. Pahantapun bowahannu minsan ma sai, maka imanin ai-ai tumꞌkka ni kaꞌa. 12 Puspusin kosognu ameyaꞌ ma Al-Masi, maka angutun kallum kakkal ya anatas ni kasaumulan, sabab ya na ilu poꞌonanna ya angkan kaꞌa-i niabbit eꞌ Tuhan. Entomun bay kapagsabꞌnnalnu ma alopan saga saksiꞌ aheka, hatina in kaꞌa angandol toꞌongan ma si Isa Al-Masi. 13 Aniyaꞌ itu pamituwaku ma kaꞌa ma pangꞌndaꞌ Tuhan, ya amuwan napas ma binangsa kamemon, maka ma pangꞌndaꞌ si Isa Al-Masi, ya bay atawakkal magpasabꞌnnal ma alopan gubnul Puntus Pilatu pasal pangandol ma Tuhan. Buwattitu pamituwaku: 14 hinangun kamemon ya pamahinang kaꞌa eꞌ Tuhan, ma halam aniyaꞌ sāꞌna atawa laꞌatna panāꞌan iya. Hinangun toꞌongan sampay taꞌabut waktu kabalik Panghūꞌ Isa Al-Masi piꞌitu ni dunya. 15 Bang taꞌabut na waktuna, pinapiꞌitu du iya pabalik eꞌ Tuhan, ya jukup asal barakatna, maka tunggal isab magbayaꞌ ma kamemon. Sultan asal iya ma kasultan-sultanan kamemon, Panghūꞌ isab ma kapanghūꞌ-panghūꞌan kamemon. 16 Hal iya mbal magkamatay. Paꞌataganna asal deyom sahaya ya mbal tasekot eꞌ manusiyaꞌ. Halam aniyaꞌ bay makaꞌndaꞌ iya ma waktu palabay, maka halam du aniyaꞌ makaꞌndaꞌ iya ma sinōng. Wajib iya mahaldikaꞌtam, maka ma iya asal barakat sampay ni kasaumulan. Amin.
17 Na, in pasal saga aꞌa mailu taga-karaya, sohoꞌun sigām daꞌa magmalangkahi ma sabab karaya sigām ma deyom dunya itu. Subay sigām mbal angandol ma pangaltaꞌ sigām sabab mbal du kakkal. Subay Tuhan ya pasangdolan sigām, sabab magmura eꞌna amuwan ai-ai makalasig pangatayantam. 18 Panduꞌin isab saga aꞌa ilu subay maghinang kahāpan ma pagkahi sigām. Ya karaya sigām subay kahinangan ahāp. Subay sigām hilas amuwan ma sasuku taluwaꞌ kasusahan. 19 Bang itu nihinang eꞌ sigām, saliꞌ aniyaꞌ altaꞌ tatauꞌ eꞌ sigām ma deyom sulgaꞌ panantuhan sigām ma waktu sinōng. Jari makasambut du sigām kallum bꞌnnal, hatina kallum kakkal.
20 Na, Timuti, amay-amay, tauꞌun pahogot saga panduꞌ bay pangandol ma kaꞌa. Tangkisin bissala ya mbal makasulut atay Tuhan, maka saga pagpayod halam aniyaꞌ gunana. Niōnan koꞌ itu pangitaꞌu eꞌ aꞌa kaseheꞌan, sagōꞌ nggaꞌi ka. 21 Sabab aniyaꞌ saga aꞌa magpinaꞌin in sigām bay kaniyaꞌan pangitaꞌu inaꞌan-i, sagōꞌ minnēꞌ sigām tabowa pasihaꞌ min panduꞌ bꞌnnal ya pamꞌnnalantam.
Mura-murahan, bang paꞌin kaꞌam kamemon pinaniyaꞌan tatabangan eꞌ Tuhan. Wassalam