8
Kabayaꞌan Rū Sussi ya Panunurantam
1 Malaingkan buwattinaꞌan, pagka kitam sōd si Isa Al-Masi na, mbal na kapatꞌnnaꞌan hukuman Tuhan. 2 Apuwas na kitam min kalꞌngnganan dusa maka min kamatay ya kamattihanna, sabab ameyaꞌ na kitam ma kalꞌngnganan Rū Tuhan. Tabowa kitam ni kallum pagka si Isa Al-Masi ya parakayuꞌantam. 3 Halam aniyaꞌ gaꞌosan saraꞌ pamapuwas kitam min pagbayaꞌan dusa, sabab manusiyaꞌ sadja kitam mbal makabogbogan saraꞌ. Sagōꞌ Tuhan ya makagaꞌos. Pinapiꞌitu eꞌna Anakna lissi pamapuwas baꞌanan dusatam. Daisi iya maka kitam, ati iya ya katōngan dusa gantiꞌ min kitam. 4 Buwattēꞌ hinang Tuhan supaya tatuman kamemon ya tasulat ma panohoꞌan-saraꞌ sabu paꞌin kitam angꞌbba min napsutam boꞌ ameyaꞌ ma kabayaꞌan Rū Sussi.
5 Sai-sai angandūl ma napsu baranna kapagbayaꞌan du eꞌ napsu. Sai-sai ameyaꞌ ma kabayaꞌan Rū Sussi, kapagbayaꞌan du eꞌ Rū Sussi. 6 Bang aꞌa abowa-bowa pikilanna eꞌ napsu baranna, kamatay ya kamattihanna, sagōꞌ bang kapagbayaꞌan pikilanna eꞌ Rū Sussi, kallum kakkal ya kamattihanna maka kasannangan deyom atay. 7 Manjari bang aꞌa abowa-bowa eꞌ napsuna, saggaꞌna Tuhan pagga mbal magmaluluy ma panohoꞌanna. Maka minsan iya bilahi ameyaꞌ, mbal toꞌongan taꞌanggapna. 8 Bang aꞌa abowa-bowa eꞌ napsuna, mbal tasulutna Tuhan.
9 Malaingkan kaꞌam ilu mbal na abowa-bowa eꞌ napsubi buwat bay kajarihanbi tagnaꞌ, saguwāꞌ Rū Tuhan ya pameyaꞌanbi na ma ai-ai kabayaꞌanna, pagka ilu na iya patꞌnnaꞌ ma deyom ataybi. Sai-sai halam kaniyaꞌan Rū Tuhan eꞌ Al-Masi, nggaꞌi ka iya sukuꞌ Al-Masi. 10 Magkamatay baranbi sabab dusa, sagōꞌ minsan na, kabuwanan du kam kallum taptap min Rū Sussi bang ilu Al-Masi ma deyom ataybi, sabab tabista kam abontol eꞌ Tuhan. 11 Bang patꞌnnaꞌ ma kaꞌam Rū Tuhan, tantu kam pinakallum eꞌ Tuhan buwat bay pamakallumna Al-Masi min kamatayna.
12 Angkan yukku ma kaꞌam, saga dauranakanku, aniyaꞌ subay pagmatayantam saddī min kajarihan maka kanapsuhantam tagnaꞌ. 13 Sabab bang kitam gantaꞌ abowa-bowa na paꞌin, eꞌ kajarihantam dusahan, kamatay ya kamattihanna. Saguwāꞌ bang paglagitam tabang min Rū Tuhan boꞌ bbahantam hinangtam alaꞌat, taptap du kallumtam. 14 Panganak Tuhan sasuku minaliman eꞌ Rū Tuhan. 15 Sabab nggaꞌi ka umagad makatāw-tāw ya tasambuttam, sagōꞌ Rū Sussi ya angahinang kitam panganak Tuhan. Kawasa min iya isab, ya angkan kitam makatawakkal angōn ‘Mmaꞌ’ ma Tuhan. 16 Aniyaꞌ saksiꞌ ma deyom palnyawahantam bay min Rū Sussi, angkan kitam makatantu in kitam tantu anak Tuhan. 17 Na, pagka kitam panganak Tuhan sabꞌnnal-bꞌnnal, pinahampitan kitam pusakaꞌ ma llaw damuli. Magdakayuꞌ kitam maka Al-Masi pinasambutan pusakaꞌ itu, sabab bang kitam palamud ma kabinasahanna ma buwattinaꞌan, palamud isab kitam ma kasahayaꞌanna bang taꞌabut waktuna.
Kasahayaꞌan ma Sinosōng
18 Bang ma aku, mbal angatu kasigpitan ya kalabayantam buwattinaꞌan ma kasahayaꞌan ya pinabukisan kitam ma sinosōng. 19 Angagad ai-ai pinapanjari kamemon ma waktu kapamabukis eꞌ Tuhan saga panganakna. 20 Sabab kamemon bay pinapanjari eꞌ Tuhan kalungayan pūsna, nggaꞌi ka min kabayaꞌan ai-ai pinapanjari itu, saguwāꞌ min kahandak Tuhan. Sabab aniyaꞌ niholat, 21 hatina ma sinosōng in bay pinapanjari kamemon pinalimaya du min kasigpitan ya kalabayanna ma buwattinaꞌan, pagka magkaꞌndang du maka magkamatay du kamemon. Saguwāꞌ ma sinosōng magdakayuꞌ du bay pinapanjari kamemon itu maka panganak Tuhan, bang sigām pinabangsa sampay pinalimaya na min kasigpitan kamatay.
22 Kataꞌuwanta, in kamemon pinapanjari itu magsalinggā asal sampay ni kabuwattinaꞌan, buwat hantang dꞌnda kapꞌddiꞌan bang song anganak. 23 Maka nggaꞌi ka hal inaꞌan-i, sampay kitam ya kabuwanan Rū Sussi eꞌ Tuhan pangawalna, magsalinggā du isab satꞌggoltam angalagaran waktu pamabahaꞌu barantam. Bang taꞌabut waktu inaꞌan pinatampal in kitam panganak Tuhan. 24 Ya na heꞌ holatantam pagka lappasan na kitam min hukuman dusa. Halam giꞌ mattan, angkan niōnan ‘holat’. Mbal kaōnan holat bang magmattan na. 25 Saguwāꞌ aniyaꞌ holatantam tantu minsan mbal giꞌ magmattan, ya angkan kitam mbal sinumu angagad.
26 Pagapiꞌ du Rū Sussi anabangan kitam bang mbal makakoleꞌ. Maumu kitam mbal ataꞌu bang buwattingga subay pangamuꞌ-ngamuꞌtam ni Tuhan, sagōꞌ Rū Sussi ya anibahat ma sababtam, boꞌ arapun mbal tapagsuli-suli sibahatna. 27 Tatanding deyom pamikiltam eꞌ Tuhan maka kasakupanna isab bang ai kinannal eꞌ Rū Sussi, sabab palamud Rū Sussi itu angamuꞌan kitam sukuꞌ Tuhan kahāpan, ma buwat kahandak Tuhan.
28 Ya koꞌ itu kataꞌuwantam: nihinangan kitam kahāpan eꞌ Tuhan ma deyom pakaradjaꞌan indaginis ahāp-alaꞌat, pagka kitam alasa ma iya. Jari minsan buwattingga pakaradjaꞌan ya kalabayantam, ahāp sadja kaluwasanna. 29 Bay kitam tapeneꞌ eꞌ Tuhan min awal lagiꞌ, ginantaꞌ kitam subay anunud ma Anakna supaya iya pagsiyakahan ma dauranakanna manusiyaꞌ kamemon. 30 Sasuku bay ginantaꞌ eꞌ Tuhan anunud ma Anakna, pineneꞌ isab eꞌna, maka sasuku ya pineneꞌ binista eꞌna abontol. Sasuku isab abontol ma bistahanna binahagiꞌan du min deyom sahayana.
Pasal Lasa Tuhan Mbal Kaliyuhan
31 Na, bang pikiltam bay pahꞌllingku-i, saliꞌ halam aniyaꞌ sugpatna. Sabab bang Tuhan ya amogbogan kitam, mbal kitam takoleꞌ eꞌ sai-na. 32 Halam bay kaꞌlloganna Anakna lissi, sagōꞌ sinōngan eꞌna pinapatay ma pasalantam kamemon. Bang buwattēꞌ kalasa Tuhan anukbalan Anakna, tantu kitam binuwanan eꞌna ai-ai makahāp, luwas min kahilasanna. 33 Halam aniyaꞌ makatunaꞌan kitam ya pineneꞌ eꞌ Tuhan, sabab Tuhan ya amabontol itikadtam. 34 Angkanna halam aniyaꞌ amatꞌnnaꞌan kitam kasāꞌan pinehēꞌ ni deyom nalkaꞌ. Bay amatay si Isa Al-Masi ma sabab dusatam, ati pinakallum pabīng eꞌ Tuhan. Pinabangsa na iya ma buwattitu, pinatingkōꞌ ma bihing Tuhan tampal ni kowan, ati inaꞌan na iya magpatillot ma manusiyaꞌ maka Tuhan, angamuꞌan kitam tabang. 35 Manjari sai bahāꞌ amapagbutas kitam maka lasa Al-Masi? Tantu halam aniyaꞌ. Minsan ai kalabayantam, ai na kasusahan, ai na ka katiksaꞌan, ai na ka pagpuhingaꞌ aꞌa, kasigpitan ka atawa kamiskinan, minsan ma deyom kapiligduhan, minsan kita pinapatay, tantu mbal apinda lasa Al-Masi ma kitam. 36 Saga kabinasahan inān tasulat asal ma deyom Kitab, ya yuk-i,
“Kasiya-siyahan kami sakahabaꞌ llaw,
hal angagad pinapatay ma sabab kaꞌa ya pameyaꞌan.
Saliꞌ kami hantang hayop bili-bili ma pamista saga aꞌa,
hal binowa sinumbaliꞌ.”
37 Saguwāꞌ mbal tapamagaytam saga pakaradjaꞌan itu. Angandaꞌug du kitam toꞌongan ma sabab Al-Masi, ya alasa asal ma kitam. 38 Makatantu du aku, halam aniyaꞌ makagaꞌos amapagbutas kitam maka lasa Al-Masi, minsan ma kallumta maka ma kamatayta. Minsan bangsa malaꞌikat atawa bangsa mananasat, minsan ai kalabayantam ma masa itu maka ma masa sinōng, tantu kitam kinalasahan na paꞌin. 39 Minsan ma diyataꞌ maka minsan ma deyoꞌ, halam aniyaꞌ min bay pinapanjari kamemon makagaꞌos amapagbutas kitam maka lasa Tuhan, ya bay pinaꞌndaꞌan ni kitam eꞌ si Isa Al-Masi Panghūꞌtam.