7
Apuwas na Kitam min Saraꞌ
1 Saga danakanku magpangandol ma si Isa, tantu kam makahati ma song pahꞌllingku itu sabab biyaksa du kam ma bowahan saraꞌ. Kapagbayaꞌan kita eꞌ saraꞌ-manaraꞌ tꞌggolta allum, sagōꞌ puwas kita min saraꞌ bang amatay na. 2 Saupama dꞌnda taga-hꞌlla, wajib iya magpūn maka hꞌllana tꞌggolna allum. Saguwāꞌ bang hꞌllana amatay na, apuwas na iya min hatulan saraꞌ pasal aꞌa maglakibini. 3 Bang dꞌnda inān gantaꞌ parakayuꞌ ni lꞌlla saddī hinabu masi allum pagholaꞌna tagnaꞌ, makalanggal iya saraꞌ sabab angaliyu-lakad. Saguwāꞌ bang amatay hꞌllana ati magpūn iya maka lꞌlla saddī, mbal kaōnan pangaliyu-lakad sabab apuwas na iya min bowahan saraꞌ heꞌ.
4 Buwattēꞌ isab ma kaꞌam, saga dauranakanku. Apuwas na kam min saraꞌ tasulat si Musa. Saliꞌ kam hantang aꞌa magpatayan sabab dambeyaꞌan na kam maka Al-Masi ma kamatayna. Bay iya pinakallum pabīng, manjari sukuꞌna na kam boꞌ supaya kam maghinang ahāp ma Tuhan sadja. 5 Ma waktu tagnaꞌ, in ginhawa-baranta itu bay kapagbayaꞌan eꞌ kajarihanta tagnaꞌ. Karuhunan gom paꞌin napsuta pagka subay anaggaꞌ ma saraꞌ, jari kamatay ya kamattihanna. 6 Sagōꞌ buwattinaꞌan alimaya na kita min kalꞌngnganan saraꞌ sabab hantang kita bay amatay, ati angꞌbba na min dusa ya bay magbayaꞌan kita ma waktu tagnaꞌ. Ma buwattitu saddī na pameyaꞌta ma Tuhan. Nggaꞌi ka kalꞌngnganan saraꞌ ya beyaꞌta saguwāꞌ kalꞌngnganan bahaꞌu, ya min Rū Tuhan.
Saraꞌ maka Dusa
7 Manjari ai pamikilta pasal saraꞌ itu? Dusahan bahāꞌ? Tantu mbal. Atampal du, ya angkan kataꞌuwanku dusa maka kamattihanna, ma sabab aniyaꞌ saraꞌ amataꞌu aku. Bay aku aꞌawam pasal napsu itu, mandaꞌ aniyaꞌ panohoꞌan saraꞌ amataꞌu aku, ya yuk-i, “Wajib kam daꞌa anganapsuhan altaꞌ pagkahibi.” 8 Sagōꞌ makataꞌu paꞌin aku min saraꞌ in napsu itu dusahan asal, luhūy pasōng saga dusa ma deyom ginhawa-baranku maka pakꞌnnop napsuku indaginis. Hatina, satꞌggol bay halam aniyaꞌ saraꞌ mbal kinataꞌuwan in kitam dusahan. 9 Ahāp asal palasahanku ma waktu tagnaꞌ pagka halam aniyaꞌ tataꞌuku pasal saraꞌ, ati pangannalku in aku aꞌa ahāp. Sagōꞌ pagtaꞌuku paꞌin pasal saraꞌ Tuhan itu, magtūy kataꞌuwanku aheya kasallaꞌanku, maka patut aku pinatꞌnnaꞌan hukuman ni kamatay. 10 Jari minnēꞌ aheya kasusahanku. Saraꞌ itu bay panganiyat Tuhan ma binangsa manusiyaꞌ supaya sigām binowa ni kallum, saguwāꞌ ma kasulayanku, in saraꞌ itu hal amowa aku ni kamatay sabab dusahan aku. 11 Saliꞌ aku nirupang eꞌ dusaku sabab pangannalku in panohoꞌan saraꞌ taꞌanggapku du, sagōꞌ mbal. Jari pinatꞌnnaꞌan aku hukuman ni kamatay sabab min saraꞌ itu.
12 Ahāp asal saraꞌ si Musa sabab min Tuhan du. Abontol maka ahāp panohoꞌanna kamemon. 13 Jari taluwaꞌ bahāꞌ bang yukta in saraꞌ ahāp ya amowa aku ni kamatay? Tantu mbal. In saraꞌ ahāp itu hal pamabukisan dusaku boꞌ takilāku toꞌongan. Dusaku ya amowa aku ni kamatay. Talhakit toꞌongan in dusa itu mamarahi alaꞌat, ma sabab saraꞌ.
Aniyaꞌ Pagsaggaꞌan ma Ginhawa-baranta
14 Kataꞌuwantam in saraꞌ itu deyoꞌ bay min Rū Tuhan. Saguwāꞌ aku itu manusiyaꞌ sadja, tabanyagaꞌ na paꞌin eꞌ dusaku. 15 Mbal toꞌongan tahatiku kaul-piꞌilku itu, sabab bang aku bilahi angahinang ahāp, saliꞌ aniyaꞌ ma ginhawaku makabimbang. Ya balikna, bang aniyaꞌ mbal kabayaꞌanku nihinang, ya heꞌ tahinangku. 16 Jari bang aku gantaꞌ abꞌnsi ma hinang alaꞌat ya asal hinangku, angahoꞌ du aku in saraꞌ Tuhan ahāp du. 17 Nggaꞌi ka itikadku toꞌongan ya angahinang kalaꞌatan ya kabꞌnsihanku heꞌ, tuꞌud aku abowa-bowa eꞌ dusa ya patꞌnnaꞌ ma deyom kajarihanku. 18 Kataꞌuwanku du, halam aniyaꞌ ahāp ma deyom baranku, hatina ma kajarihanku itu, sabab minsan kabayaꞌanku angahinang ahāp, mbal taꞌanggapku. 19 Mbal tahinangku kahāpan ya angutku, sagōꞌ ya na paꞌin hinangku kalaꞌatan mbal kabayaꞌanku. 20 Jari bang aku gantaꞌ angahinang ai-ai ya mbal makasulut atayku, hatina nggaꞌi ka dī baranku ya angahinang inān, tuꞌud aku tabowa-bowa eꞌ dusa ya ma deyom kajarihanku itu.
21 Buwattitu ya kalꞌngngananna bang aku gantaꞌ bilahi maghinang ahāp, maumu aku tabowa-bowa maghinang alaꞌat. 22 Ma itikadku sadja landuꞌ aku kasulutan ma saraꞌ Tuhan, 23 saguwāꞌ pagꞌndaꞌku paꞌin ni deyom ginhawa-baranku, saddī isab kalꞌngngananna. Sabab aniyaꞌ na paꞌin laꞌat ma deyom kajarihanku magsaggaꞌ maka saraꞌ Tuhan ya makasulutan aku. Minnēꞌ aku binanyagaꞌ, pinagagihan na paꞌin eꞌ dusa ya amowa na paꞌin ma deyom ginhawa-baranku. 24 Allā! Mbal manjari susaku! Sai bahāꞌ anabang aku supaya aku makapuwas min kajarihan alaꞌat itu, sabab itiyaꞌ aku binowa ni kamatay? 25 Magsukul ni Tuhan, itiyaꞌ anabang si Isa Al-Masi Panghūꞌtam!
Na ya du ilu kasusahanku: makaisbat aku saraꞌ Tuhan ma deyom pikilanku, sagōꞌ abowa-bowa aku magdusa pagga kapagbayaꞌan kajarihanku eꞌ dusa.