2
Kalangan 2
1 Angay angkan magbantu saga kabangsa-bangsahan,
angay sigām magisun ma halam aniyaꞌ pūsna?
2 Magsakap di-sigām saga kasultanan,
magsakaum saga pagnakuraꞌan
boꞌ angatu ma PANGHŪꞌ-Yawe,
maka ma Al-Masi ya tapeneꞌna.
3 Maghimumungan saga aꞌa inān, yuk-i,
“Gom kitam papuwas min komkoman sigām,
gom bꞌkkattam saga kili-kili ya pangengkot sigām.”
4 Saguwāꞌ pagtittowahan sigām heꞌ Tuhan,
ya aningkōꞌ ma sulgaꞌ magkabayaꞌan ma kamemon.
Pinagtunggīngan sigām eꞌ Panghūꞌ.
5 Pinabukagan saga aꞌa inān kabowa pangastolna,
pinakitāw sigām ma sabab landuꞌ akagit atayna.
6 Yuk Tuhan ma sigām, “Oꞌo, sultan bay tapatingkōꞌku,
inaꞌan ma Būd Siyun, ya būd kamulliyahanku.”
7 Ya panambung sultan eꞌ, “Pasaplagku lapal
ya pangallam aku heꞌ PANGHŪꞌ.”
Yukna ma aku, “Kaꞌa ilu tahinang anakku na.
Aku ya Mmaꞌnu tinagnaꞌan min llaw itu.
8 Bang aku ya pangamuꞌannu,
pamusakaꞌku ma kaꞌa kamemon bangsa,
pamasukuꞌku ma kaꞌa sakalibutan dunya.
9 Kaꞌa ya amarinta ma kabangsa-bangsahan,
ati apaslod pamarintanu sapantun tungkud basiꞌ.
Alopot sigām kamemon saliꞌ dalil paliyuk.”
10 Angkan yukku ma kaꞌam saga sultan, “Pataꞌu kam.
Pahalliꞌ kam, sasuku magbabayaꞌ ma babaw dunya.
11 Magpatireyoꞌ kam ma PANGHŪꞌ,
pagkoyaginbi iya hinabubi magpamidpid.
12 Pasiyum kam ma Anakna, ya aniyaꞌ kakagit atayna,
ati taggahaꞌ kam tꞌkkahan mulkaꞌna.
Sabab pasulapput astolna saruꞌun-duꞌun,
malaingkan aheya kahāpan ma sasuku makabāk patapukan ma iya.”