3
Kalangan 3
Kalangan si Daꞌud ma waktu kalahina min anakna si Absalom
1 O Yawe, aheka saga aꞌa amantahan aku!
Kapilahan aku eꞌ saga aꞌa magpanaggaꞌ aku.
2 Aheka isab saga aꞌa anunggīngan aku, yuk-i,
“Mbal iya pinuwas eꞌ Tuhan min kamulahan.”
3 Saguwāꞌ kaꞌa ya tampanku, O PANGHŪꞌ.
Kaꞌa ya amuwanan aku kasahayaꞌan.
Kaꞌa ya amahogot kamahaldikaꞌanku.
4 Bang aku parahing ni PANGHŪꞌ-Yawe,
sinambungan aku eꞌna min būdna mulliya.
5 Ahāp eꞌku atuli, asannang isab kabatiꞌku,
sabab binogbogan aku eꞌ PANGHŪꞌ.
6 Mbal aku tināw ma saga bantaku ibu-ibuhan,
ya angalibutan aku ma paruruwambilaꞌ.
7 Ya PANGHŪꞌ, pasaꞌut ka,
lappasun aku min kaꞌaniban.
Suntukun palbantahanku ma baihuꞌ sigām,
paglopotun empon sigām.
8 Si Yawe ya angaliyusan aku min kamulahan.
Bang paꞌin buwanannu kahāpan saga aꞌa sukuꞌnu.