30
Nilaglag eꞌ si Daꞌud saga Bangsa Amalek
1 Manjari itu, pagpuwas paꞌin tꞌllungꞌllaw, atꞌkka na si Daꞌud maka saga aꞌana ni Siklag ya kauman sigām. Sagōꞌ waktu sigām lagiꞌ bay ma labayan, in kauman Siklag sampay lahat Yuda tampal ni sꞌddopan inān bay nirugpak eꞌ bangsa Amalek. Tatunuꞌ isab eꞌ sigām saga kalumaꞌan ma kauman Siklag, 2 tasaggaw isab kamemon karꞌndahan sampay saga aꞌa kamemon ondeꞌ-mattoꞌa ya bay mainaꞌan. Malaingkan halam aniyaꞌ bay pinapatay minsan dakayuꞌ, hal bay sinaggaw eꞌ saga aꞌa Amalek boꞌ binowa alaꞌan.
3 Na, pagtꞌkka si Daꞌud maka saga aꞌana ni kauman Siklag inān, taꞌndaꞌ eꞌ sigām atunuꞌ kamemon, maka saga anak-hꞌnda sigām waꞌi bay nilahiyan. 4 Angkan maglemong disi Daꞌud sampay sigām apaya na eꞌ paglemong sigām. 5 Ya karuwangan hꞌnda si Daꞌud, ya si Abigail maka si Ahinowam, waꞌi du talapay tasaggaw. 6 Aheya isab kasusahan si Daꞌud sabab pinagbambahan iya binantung eꞌ saga aꞌana kabowa astol sigām ma pasalan kasaggaw saga anak sigām dꞌnda-lꞌlla. Malaingkan pakosog iman si Daꞌud ma sabab pangandolna ma si Yawe ya Tuhanna.
7 Manjari ahꞌlling si Daꞌud ni imam Abiyatar ya anak si Ahimelek. Yukna, “Tuwan, bowahin aku piꞌitu epod eꞌ.” Sakali binowa na ni iya eꞌ si Abiyatar. 8 Mainaꞌan paꞌin, angaru si Daꞌud ni PANGHŪꞌ, yukna, “Wajib bahāꞌ aku paturul ni saga aꞌa bay parugpak ni kauman itu? Taꞌabutku bahāꞌ sigām?”
Anambung PANGHŪꞌ, yukna, “Ahoꞌ, turulun sigām pehēꞌ. Tantu sigām taꞌabutnu maka talappasnu saga anak-hꞌndabi.”
9 Sakali, lumꞌngngan na si Daꞌud magbeyaꞌ maka saga aꞌana nnom hatus puhuꞌ. Makatꞌkka paꞌin sigām ni Lꞌbbak Besor, magpaꞌbba mainaꞌan in kaseheꞌan sigām. 10 Aniyaꞌ duwa hatus puhuꞌ ma sigām magbaleꞌan toꞌongan angkan mbal makatukad ni pampang ya ma dambilaꞌ lꞌbbak inān. Malaingkan in si Daꞌud maka mpat hatus aꞌana bay palanjal angapas saga bangsa Amalek.
11 Na, aniyaꞌ aꞌa Misil talanggal eꞌ sigām ma huma, jari binowa iya eꞌ sigām ni si Daꞌud. Binuwanan iya takakan maka boheꞌ niꞌinum. 12 Ya pamakan sigām ma iya buwaꞌ igira bay kinompol maka duwa tundun anggul bay pinaꞌllawan. Bay paꞌin iya makakakan, pahāp na palasahanna pabalik, sabab halam iya bay makakakan ai-ai atawa makainum boheꞌ ma deyom tꞌllungꞌllaw tꞌllumbahangi. 13 Manjari, tinilaw iya eꞌ si Daꞌud, yukna, “Sai nakuraꞌnu, maka mꞌnningga ka?”
Anambung lꞌlla inān, yukna, “Tuwan, aku itu bangsa Misil. Banyagaꞌ aku ma dakayuꞌ aꞌa bangsa Amalek. Bay aku pinasagaran eꞌna tꞌllungꞌllaw na palabay pagka aku bay asaki. 14 Bay kami parugpak ni lahat sꞌddopan, ni tanaꞌ bangsa Keret maka ni kauman ya palsukuꞌan saga bangsa Yuda, maka ni tanaꞌ isab saga panubuꞌ si Kaleb. Bay isab tunuꞌ kami kauman Siklag.”
15 Atilaw si Daꞌud pabalik, yukna, “Katuliꞌannu aku pehēꞌ ni saga bangsa Amalek heꞌ?”
“Ahoꞌ tuwan,” yuk sambung lꞌlla inān. “Kaseheꞌanta ka pehēꞌ ni sigām bang paꞌin sapahannu ma matahan Tuhan in aku mbal papataynu atawa tukbalannu pabalik ni bay nakuraꞌku.”
16 Na, sineheꞌan na si Daꞌud eꞌ lꞌlla bangsa Misil inān palūd pehēꞌ ni saga bangsa Amalek. Inaꞌan sigām magkaukanat ma lugal pagpustuhan sigām, magkakanan maka maginuman. Aheya paglami-lami sigām ma sabab kaheka pangaltaꞌ bay tataban sigām min paglahat bangsa Pilistin maka min Yuda. 17 Binonoꞌ magtūy sigām eꞌ disi Daꞌud min kohap inān sampay ni kasangoman ma llaw dakayuꞌ. Halam aniyaꞌ minsan dangan min saga aꞌa Amalek bay makalꞌppa, luwal mpat hatus ondeꞌ bahaꞌu bay pakuraꞌ ma untaꞌ alahi. 18 Taꞌāꞌ pabalik eꞌ si Daꞌud kamemon bay tataban eꞌ bangsa Amalek, beyaꞌ na duwangan hꞌndana. 19 Taꞌāꞌ eꞌna kamemon, halam kakulangan minsan dansolag, ai naka ondeꞌ-mattoꞌa, dꞌnda ka atawa lꞌlla. Taꞌāꞌ sampay saga pangaltaꞌ bay tataban aheya-arikiꞌ. 20 Taꞌāꞌna isab kamemon saga bili-bili maka saga kahayopan, boꞌ pinalꞌngngan eꞌ saga aꞌana min dahuwan sigām. Ya pagpaꞌin sigām, “Palsukuꞌan si Daꞌud tatabanan itu kamemon.”
21 Na, pabīng na si Daꞌud ni saga aꞌana duwa hatus hekana ya inaꞌan bay magpaꞌbba ma Lꞌbbak Besor pagka sigām bay landuꞌ apaya. Jari pasōng saga aꞌa itu amāk si Daꞌud maka baꞌanan saga seheꞌna. Asekot paꞌin disi Daꞌud, sinagina sigām pahāp. 22 Malaingkan aniyaꞌ saga aꞌa asabul maka alaꞌat kasuddahanna pabeyaꞌ asal ma si Daꞌud. Yuk saga aꞌa itu, “Mbal sigām patut pinahampit saga tatabanan ilu sabab halam sigām bay ameyaꞌ ma kitam. Sagōꞌ makajari sigām angāꞌ saga anak-hꞌnda sigām boꞌ magpoleꞌan na.”
23 “Mbal manjari, saga danakan,” yuk sambung si Daꞌud. “Daꞌa kam maghinang buwattilu ma bay tahinang eꞌ PANGHŪꞌ ma kitam. Bay kitam nihampanan eꞌna, maka bay tukbalanna ni deyom komkomantam saga aꞌa ya bay amonoꞌ kitam. 24 Mbal tabeyaꞌ kabilahianbi ilu, kalnaꞌ in bahagiꞌ aꞌa bay magpaꞌbba anungguꞌan saga balanjaꞌ subay pinapagsaliꞌ maka bahagiꞌ aꞌa bay ameyaꞌ ni pagbonoꞌan. Pinapagtopod in bahagiꞌ dangan maka dangan.” 25 Ya saraꞌ bay pinaniyaꞌ eꞌ si Daꞌud itu binogbogan na paꞌin eꞌ bangsa Israꞌil sampay ni kabuwattinaꞌanan.
26 Na, makabalik paꞌin si Daꞌud ni Siklag, bay pinabeyaꞌ eꞌna kaseheꞌ tatabanan ni saga bagayna ya pagmattoꞌahan ma Yuda. Aniyaꞌ isab lapalna, yukna, “Itu saga tatabanan bahagiꞌbi min saga aꞌa banta PANGHŪꞌ.” 27 Bay isab binahagiꞌan eꞌna saga aꞌa ma Betel, ma Ramot-ni-Sꞌddopan maka ma Jattir. 28 Binahagiꞌan isab saga aꞌa ma Arowel, ma Sepmot, ma Estemowa, 29 maka ma Rakal. Ya du saga aꞌa ya magsakaum ma bangsa Jerameꞌel maka bangsa Kēn, 30 saga aꞌa isab ma Horma, ma Bōr Asan, maka ma Atak, 31 sigām isab ma Hebron sampay ma kaseheꞌan paglahat ya bay pahantiꞌan si Daꞌud maka saga aꞌana.