31
Kamatay si Saꞌul maka Saga Anakna
1 Manjari itu, parugpak saga Pilistin ni saga sundalu bangsa Israꞌil ati aheka bangsa Israꞌil amatay ma Būd Gilbowa. Malaingkan in kaseheꞌan bay makalahi. 2 In si Saꞌul magtaiꞌanak bay niabut-abut eꞌ saga sundalu Pilistin ati tapapatay eꞌ sigām si Jonatan, si Abinadab maka si Malki-Suwa. 3 Paruhun na paꞌin pagbonoꞌ ma atag si Saꞌul, ati tasekot paꞌin iya eꞌ aꞌa magpapanaꞌ, ahalol iya eꞌ sigām.
4 Angkan iya ahꞌlling ni aꞌa magbobowa pakokosna, yukna, “Hublutun na kalisnu ilu boꞌ aku papatayun, pād-pād saga kapil itu angandugsuꞌan aku maka anganjahulakaꞌan baranku.”
Saguwāꞌ landuꞌ tināw magbobowa pakokos inān angkan mbal tahinangna panohoꞌan si Saꞌul eꞌ. Pagka buwattēꞌ, ningāꞌ eꞌ si Saꞌul kalisna boꞌ iya amapatay di-na. 5 Pagꞌndaꞌ magbobowa pakokos in si Saꞌul amatay na, ya du iya bay angahublut kalisna boꞌ amapatay di-na. 6 Angkan ma llaw inān, magbeyaꞌ amatay si Saꞌul maka tꞌllungan anakna lꞌlla, maka magbobowa pakokosna, sampay isab kamemon saga sundalu bay ma iya.
7 Na, pasampay habal itu ni saga aꞌa Israꞌil ya maglahat ma kapantayan Jesdeꞌel maka ma dambilaꞌ sapaꞌ Jordan, ati tataꞌu na eꞌ sigām in saga sundalu Israꞌil waꞌi maglahian maka in si Saꞌul sampay saga anakna waꞌi na amatay. Pagtaꞌu itu, niꞌbbahan eꞌ sigām saga kalumaꞌan sigām boꞌ alahi. Jari pinaꞌan na saga bangsa Pilistin maglahat ma bay kalumaꞌan bangsa Israꞌil eꞌ.
8 Pagꞌllaw dakayuꞌ, makapinaꞌan paꞌin saga bangsa Pilistin ni būd Gilbowa angāꞌ ai-ai kagunahan min bangkay saga bangsa Israꞌil, tabāk eꞌ sigām mayat si Saꞌul maka saga anakna. 9 Pinonggolan eꞌ sigām kōk si Saꞌul maka niurusan saga pakokosna, ati sinōꞌ pinasaplag habal itu ma katilingkal paglahat Pilistin sampay ma langgal saga tuhan-tuhan sigām. 10 Manjari pinatꞌnnaꞌ pakokos si Saꞌul ma langgal saga tuhan-tuhan sigām Astoret, ati in baranna bay nilansang ma ād ya ma likusan daꞌira Bet-Sān.
11 Pagtaꞌu saga aꞌa Jabes Giliyad ma bay tahinang aꞌa Pilistin ma bangkay si Saꞌul, 12 magtūy palanjal saga aꞌa sigām ya tamakaesog. Animpus sigām sangom boꞌ pehēꞌ ni Bet-Sān. Ningāꞌ eꞌ sigām saga bangkay disi Saꞌul maka saga anakna min ād Bet-Sān inān boꞌ binowa ni Jabes, ati mahēꞌ tinunuꞌ. 13 Tatunuꞌ paꞌin, ningāꞌ saga toꞌolang inān ati kinubul ma deyoꞌan kayu tamaris ya mainaꞌan ma lahat Jabes. Pagubus, magpuwasa saga aꞌa Jabes inān ma deyom pitungꞌllaw.