29
Sinulak si Daꞌud eꞌ Sultan Bangsa Pilistin
1 Na, magtipun na kamemon sundalu bangsa Pilistin ma Apek, ati in sundalu bangsa Israꞌil inaꞌan magpustu ma atag tigbaw ma Jesdeꞌel. 2 Palꞌngngan na paꞌin saga pagnakuraꞌan bangsa Pilistin magbeyaꞌ maka saga tumpukan sundalu sigām ma hatusan maka ma ibuhan. Pasaltaꞌ, inaꞌan isab si Daꞌud maka saga aꞌana palꞌngngan min buliꞌan magabay maka sultan Akis. 3 Atilaw isab saga nakuraꞌ kasundaluhan Pilistin ma si Akis, yuk-i, “Magay saga Hibrani itu?”
Anambung si Akis, yukna, “Si Daꞌud koꞌ ilu, ya bay tendog si Saꞌul, ya sultan bangsa Israꞌil eꞌ. Aniyaꞌ na iya labi dantahun ma deyomanku. Min waktu lagiꞌ kalaꞌanna min okoman si Saꞌul sampay ni kabuwattinaꞌanan, halam iya karapatanku.”
4 Sagōꞌ akagit atay saga nakuraꞌ sundalu inān ma si Akis angkan yuk sigām, “Papoleꞌun aꞌa ilu ni kauman bay pamuwannu paglahatan ma sigām. Mbal iya wajib pabunyug ma kitam ni pagbonoꞌan! Sabab ya aniyaꞌ papinda angatuhan kitam hinabu ma pagbonoꞌan. Tantu iya amonggolan kōk saga sundalutam boꞌ supaya iya makapaghāp maka sultan ya bay nakuraꞌna. 5 Ya na koꞌ ilu si Daꞌud, ya pinagkalang eꞌ saga karꞌndahan, yuk-i,
‘Ibuhan tapapatay eꞌ sultan Saꞌul,
ati hatusan ibu isab ma si Daꞌud’.”
6 Manjari, pinalinganan si Daꞌud eꞌ si Akis boꞌ binowa magbissala. Yuk si Akis ma iya, “Sapahanku ma ōn si Yawe, ya kakkal salama-lama, in kaꞌa ilu kapangandolan angkan kasulutan sidda aku bang ka gantaꞌ pabunyug ma aku maka saga sundaluku. Min waktu lagiꞌ katꞌkkanu sampay ni kabuwattinaꞌanan, halam aniyaꞌ kasāꞌan tabākku ma kaꞌa. Sagōꞌ mbal kasulutan saga pagkahiku nakuraꞌ Pilistin. 7 Angkan amoleꞌ na ka ma halam aniyaꞌ lengog. Maka daꞌa ka angahinang ai-ai ya makalaꞌat pangatayan sigām kaseheꞌ itu.”
8 “Angay tuwan? Ai dusaku?” yuk si Daꞌud. “Ai kasāꞌan bay tahinang eꞌ tendognu itu min waktu katagnaꞌku paokom ma kaꞌa sampay ni waktu itu? Ai sababanna ya angkan aku mbal makajari ameyaꞌ ma kaꞌa amonoꞌ saga aꞌa ya amantahan kaꞌa, tuwan sultan?”
9 Anambung si Akis, yukna, “Kasulutan sidda aku ma kaꞌa, sapantun ka malaꞌikat Tuhan ma pangꞌndaꞌku. Malaingkan, bay makakabtang saga nakuraꞌ Pilistin in kaꞌa konoꞌ mbal wajib ameyaꞌ ma kami ni pagbonoꞌan. 10 Angkan yukku ma kaꞌa, in kaꞌa maka saga tendog si Saꞌul ya seheꞌnu ilu subay angawal salung boꞌ maglaꞌanan minnilu ma halam giꞌ pakꞌllat llaw.”
11 Sakali, pagdaiꞌ llaw paꞌin, pabungkal na si Daꞌud maka saga aꞌana boꞌ amoleꞌ pabīng ni lahat Pilistin. Sagōꞌ in saga sundalu Pilistin patukad na ni daꞌira Jesdeꞌel.