28
Si Saꞌul maka Dꞌnda Maglilingan Umagad
1 Manjari palabay paꞌin waktu, pinapagtipun saga sundalu bangsa Pilistin supaya amowa magbonoꞌ ma bangsa Israꞌil. Ahꞌlling si Akis ni si Daꞌud, yukna, “Tahatinu du in kaꞌa maka saga tendognu ilu subay pagapiꞌ ma aku ma pagbonoꞌan.”
2 Anguyun si Daꞌud, yukna, “Na, tuwan, song taꞌndaꞌnu bang ai tahinang eꞌ sosohoꞌannu itu.”
Anambung si Akis, “Ahāp koꞌ ilu. Angkan na ka hinangku jaga ma baranku satꞌggolku allum.”
3 Malaingkan in si Samwel bay na asal amatay. Bay na iya pinagdukkaꞌan eꞌ kamemon saga jamaꞌa Israꞌil, ati waꞌi bay kinubul eꞌ sigām ma Rama, ya lahatna luggiyaꞌ. Ma waktu heꞌ-i, bay na asal tinꞌggal eꞌ si Saꞌul kamemon saga aꞌa magpangꞌndaꞌ umagad maka saga magjijīn min lahat Israꞌil.
4 Sakali itu, magtipun na saga sundalu Pilistin boꞌ pehēꞌ magpustu ma Sunem. Pasaltaꞌ in si Saꞌul bay amatimuk saga sundaluna bangsa Israꞌil boꞌ magpustu ma Gilbowa. 5 Pagꞌndaꞌ si Saꞌul ma baꞌanan sundalu Pilistin, magtūy iya sinōd tāw mbal tapulaꞌ-pulaꞌ. 6 Angkan iya angaru ni PANGHŪꞌ bang ai subay hinangna, sagōꞌ halam aniyaꞌ lapal PANGHŪꞌ pinasampay ma iya, ai naka ma uppina, ai naka min Urima atawa min saga nabi. 7 Pagka buwattēꞌ, ahꞌlling si Saꞌul ni saga tendog ya pangandolanna, yukna, “Pihaꞌinbi aku dꞌnda maglilingan umagad boꞌ supaya aku makapangaru ma iya.”
“Tuwan,” yuk sambung saga tendog inān, “aniyaꞌ konoꞌ mainaꞌan ma kauman Endor.”
8 Sakali itu, magbinadjuꞌ saddī si Saꞌul supaya halam aniyaꞌ makakilā iya. Jari sangom inān pehēꞌ na iya maka duwa tendogna ni lumaꞌ dꞌnda. Makatꞌkka paꞌin, yuk si Saꞌul ni iya, “Bilahi aku angaru ni umagad aꞌa bay amatay. Tugilaꞌku paꞌin ma kaꞌa bang sai subay linganannu.”
9 Sagōꞌ yuk sambung dꞌnda, “Tantu kasakupannu bang ai ya bay panohoꞌan si Saꞌul. Bay palaꞌanna min lahat Israꞌil kamemon saga aꞌa maglilingan umagad maka saga magjijīn. Tuꞌud koꞌ kaꞌa ilu pasulay anganjallat aku boꞌ supaya aku pinatꞌnnaꞌan hukuman ni kamatay.”
10 Pagga buwattēꞌ anapa si Saꞌul, yukna, “Sapahanku ma ōn si Yawe, ya kakkal salama-lama, halam aniyaꞌ kamulahan tumꞌkka ni kaꞌa ma sabab palkalaꞌ itu.”
11 Jari tinilaw na iya eꞌ dꞌnda inān, yukna, “Umagad sai kabilahiannu lingananku?”
“Umagad si Samwel,” yuk sambung si Saꞌul.
12 Pagꞌndaꞌ paꞌin dꞌnda inān ma umagad si Samwel, magtūy iya angolang pakosog maka eꞌna atilaw ma si Saꞌul, yukna, “Angay aku bay akkalannu? Kaꞌa tuwiꞌ sultan Saꞌul!”
13 Sakali yuk sultan ma iya, “Daꞌa ka tināw. Ai taꞌndaꞌnu ilu?”
Ya sambung dꞌnda, “Tuwan,” yukna, “makaꞌndaꞌ aku umagad pabungkal min tanaꞌ.”
14 Atilaw si Saꞌul, yukna, “Buwattingga luwana?”
“Mattoꞌa lꞌlla magjinuba,” yuk sambung dꞌnda inān. Manjari kinataꞌuwan magtūy eꞌ si Saꞌul si Samwel na koꞌ inān, angkan iya pasujud.
15 Yuk si Samwel ni iya, “Angay lagiꞌ aku sasatnu pagka aku bay sohoꞌnu pinabangun?”
Anambung si Saꞌul, yukna, “Landuꞌ aheya kasukkalanku. Itiyaꞌ aku binonoꞌ eꞌ saga aꞌa Pilistin, maka tinaikutan na aku eꞌ PANGHŪꞌ. Mbal na sinambungan pangaruku, ai naka ma uppi atawa pinalabay min saga nabi. Angkan ka bay sohoꞌku pinalinganan boꞌ supaya aku pituwahannu bang ai subay hinangku.”
16 Yuk si Samwel, “Angay lagiꞌ aku subay pangaruhannu saukat ka bay tinaikutan maka binantahan eꞌ PANGHŪꞌ? 17 Tahinang na eꞌna ya bay pagkallamna labay min aku. Ilu na niragtuꞌ eꞌna min kaꞌa kapagsultannu boꞌ pamuwanna na ma dakayuꞌ pagkahinu, ya na si Daꞌud. 18 Angkan itu nihinang eꞌ PANGHŪꞌ ma kaꞌa buwattinaꞌan sabab halam bay beyaꞌnu panohoꞌanna. Halam bay pasampaynu mulkaꞌna ma saga bangsa Amalek. 19 Jari in kaꞌa maka saga bangsa Israꞌil maraiꞌ na tinukbalan eꞌ PANGHŪꞌ ni komkoman bangsa Pilistin. Pagsalung,” yuk umagad si Samwel, “kaꞌa maka saga anaknu lꞌlla parakayuꞌ du ma aku maitu ma ahirat. Damikiyanna isab saga sundalu bangsa Israꞌil, tinukbalan eꞌ PANGHŪꞌ ni komkoman bangsa Pilistin.”
20 Saruꞌun-duꞌun du magtūy kumꞌppang si Saꞌul ni tanaꞌ, maka sinōd iya tāw landuꞌ aheya ma pasalan pamissala si Samwel heꞌ. Na, alamma si Saꞌul pagka halam bay amangan animpus dangꞌllaw maka dasangom.
21 Manjari pasekot dꞌnda heꞌ, ati taꞌndaꞌna inaꞌan si Saꞌul amidpid kabowa tāwna, angkan yukna, “Tuwan sultan, bay na beyaꞌku panohoꞌannu. Bay panūkku kallumku ni kamatay sabab pameyaꞌku ma panohoꞌannu. 22 Ndūꞌ Tuwan,” yukna, “daꞌa busung, kalehun lagiꞌ pamissala sosohoꞌannu itu maka dūlin aku angadjalan kaꞌa takakan boꞌ supaya pabalik kosognu ati boꞌ ka makalanjal ni palꞌngnganannu.”
23 “Ē! Mbal aku amangan!” yuk sambung si Saꞌul.
Sagōꞌ magbeyaꞌ saga tendog maka dꞌnda inān amogos na paꞌin si Saꞌul, sampay iya tapogosna. Pagubus, pabangun iya min tanaꞌ boꞌ aningkōꞌ ma pabahakanna. 24 Na, aniyaꞌ anak sapiꞌ alꞌmmok taipat eꞌ dꞌnda inān, magtūy sinumbaliꞌ eꞌna. Angaddun isab iya tirigu boꞌ hinangna tinapay halam taga-pasulig. 25 Atahak paꞌin, pinatꞌnnaꞌ na eꞌna ni si Saꞌul maka saga tendogna ati amangan sigām. Pagubus, ma sangom heꞌi du, palanjal na sigām amoleꞌ.