27
Si Daꞌud Paokom ma Bangsa Pilistin
1 Saguwāꞌ minsan buwattēꞌ bissala si Saꞌul, maghonaꞌ-honaꞌ na paꞌin si Daꞌud boꞌ yukna ma deyom atayna, “Tantu aku binonoꞌ eꞌ si Saꞌul ma llaw sinosōng. Ahāp lagiꞌ aku alahi pehēꞌ ni lahat Pilistin. Pahali si Saꞌul amiha aku bang aubus eꞌna angalatag katilingkal lahat Israꞌil, ati alipuwas aku min iya.” 2 Jari si Daꞌud maka saga aꞌana nnom hatus hekana bay palanjal minnaꞌan boꞌ palain ni daꞌira Gāt, ni sultan Akis ya anak si Maꞌok. 3 Sakali mainaꞌan sigām pahantiꞌ ma Gāt, ma okoman si Akis. Mainaꞌan sigām pahantiꞌ ma okoman sultan eꞌ, sigām kaniya-kaniya maka anak-hꞌnda sigām. Inaꞌan isab si Daꞌud maka duwa hꞌndana, ya na si Ahinowam min Jesdeꞌel maka si Abigail min Karmel, ya bay balu si Nabal. 4 Jari kahakaꞌan paꞌin si Saꞌul in si Daꞌud waꞌi na makalahi ni Gāt, pahali na iya amiha.
5 Palabay paꞌin waktu, ahꞌlling si Daꞌud ni si Akis, yukna, “Tuwan, bang ka kasulutan du ma aku, pamarūlun ma aku dakayuꞌ kaumannu boꞌ supaya aku makapaglahat mahēꞌ. Mbal patut sosohoꞌannu itu paokom ma kaꞌa ma daꞌira bangsahan itu.” 6 Angkan ma llaw inaꞌan du, pamuwan eꞌ si Akis ma si Daꞌud kauman Siklag. Jari in kauman inān tahinang palsukuꞌan saga sultan bangsa Yuda sampay ni kabuwattinaꞌanan. 7 Saga dantahun maka mpat bulan ya kapaglahat si Daꞌud ma deyoman saga bangsa Pilistin.
8 Na ma waktu inān, angalangpas na paꞌin si Daꞌud maka saga tendogna ni saga bangsa Gesur, bangsa Girsi maka bangsa Amalek. Saga bangsa itu bay asal mainaꞌan min awal lagiꞌ. Ya paglahat sigām paꞌabut ni Sūr, sampay isab ni lahat Misil. 9 Sakahabaꞌ waktu kalangpas si Daꞌud ni kalumaꞌan saga bangsa itu, halam aniyaꞌ kapinanna allum minsan dakayuꞌ dꞌnda ka atawa lꞌlla. Ya nilangpas eꞌna saga bili-bili maka sapiꞌ sampay saga kuraꞌ maka untaꞌ maka panꞌmmek. Jari pabalik na paꞌin iya ni si Akis.
10 Bang tinilaw si Daꞌud eꞌ si Akis bang piꞌingga bay parugpakanna, anambung iya buwattitu, yukna, “Bay kami parugpak ni lahat Yuda tampal ni satan.” Sumaꞌan buwattitu panambungna, “Bay kami ni lahat Jerameꞌel tampal ni paslangan.” Atawa, “Bay kami pehēꞌ ni kauman bangsa Kēn ya ma paslangan isab.” 11 Mbal kinapinan allum eꞌ si Daꞌud minsan dakayuꞌ dꞌnda atawa lꞌlla allum, sabab ma pikilanna, “Ya aniyaꞌ, bang aniyaꞌ lꞌlla atawa dꞌnda binowa ni Gāt, makasumbung lagiꞌ sigām bang ai bay tahinangku.” Buwattēꞌ kahinangan si Daꞌud tꞌggolna patꞌnnaꞌ ma lahat Pilistin. 12 Manjari, pangandolan iya eꞌ si Akis sabab yukna ni baranna, “Tantu kinabꞌnsihan na si Daꞌud itu eꞌ saga pagkahina bangsa Israꞌil, angkan halam dapat bang iya mbal amogbogan aku satꞌggolna allum.”