26
Si Saꞌul Mbal Niꞌinay eꞌ si Daꞌud, Kaminduwana na
1 Na, aniyaꞌ saga aꞌa min lahat Sīp bay pehēꞌ ni si Saꞌul hinabuna ma Gibeya supaya anumbung pasal si Daꞌud. “Tuwan sultan,” yuk sigām, “inaꞌan si Daꞌud patapuk ma būd Hakila ya ma anggopan Jesemon.”
2 Manjari, pehēꞌ ni paslangan Sīp si Saꞌul maka tꞌllungibu aꞌa Israꞌil magbobonoꞌ ya bay peneꞌna, boꞌ amiha si Daꞌud. 3 Bay magpustu asal si Saꞌul ma bihing lān, inaꞌan ma būd Hakila ma anggopan Jesemon, malaingkan in si Daꞌud waꞌi ma paslangan. Pagtaꞌu si Daꞌud pasal si Saꞌul bay anurul iya pinaꞌan, 4 aniyaꞌ saga aꞌa sohoꞌna pehēꞌ angꞌndaꞌ. Jari tataꞌuna min sigām, bꞌnnal, inaꞌan na si Saꞌul.
5 Sakali, magsakap si Daꞌud boꞌ pehēꞌ ni atag pagpustuhan si Saꞌul. Taꞌndaꞌna bang maingga patulihan si Saꞌul maka si Abner ya pagnakuraꞌan kamemon saga sundaluna. Si Abner itu anak si Nēr. Na, ma waktu inān, in si Saꞌul atuli ma pustu, ma tꞌngngaꞌ-tꞌngngaꞌ baꞌanan saga bobonoꞌna. 6 Na, atilaw si Daꞌud ma si Ahimelek aꞌa bangsa Hīt maka si Abisai ya danakan si Jowab. (Si Seruya ya inaꞌ sigām). Yuk panilaw si Daꞌud, “Sai ameyaꞌ ma aku palūd ni si Saꞌul ma pustu inān?”
Anambung si Abisai. “Aku,” yukna.
7 Angkan sangom heꞌ-i du, nilꞌngngan pustu si Saꞌul eꞌ si Daꞌud maka si Abisai ati taꞌndaꞌ sigām si Saꞌul atuli mainaꞌan. Inaꞌan paosol budjakna ma tanaꞌ min kōkanna, maka inaꞌan isab si Abner maka saga sundalu kaseheꞌ atuli ma katilibutna. 8 Mainaꞌan paꞌin, pahigung-higung si Abisai ni si Daꞌud, yukna, “Tuwan, ya na itu waktu panukbal bantanu ni kaꞌa eꞌ Tuhan. Dūlin aku amudjak iya ni tanaꞌ. Pamintꞌddaku sadja.”
9 Saguwāꞌ yuk sambung si Daꞌud, “Oy! Daꞌa iya bonoꞌun! Sabab tantu tinungbasan eꞌ Tuhan sasuku angamula sultan ya tapeneꞌna. 10 Sapahanku ma ōn si Yawe, ya Tuhan kakkal salama-lama,” yuk si Daꞌud, “Tuhan sadja ya magkahandak ma gantaꞌan si Saꞌul. Bang nggaꞌi ka patay saki atawa patay toꞌa, amatay iya ma pagbonoꞌan. 11 Sagōꞌ sꞌlleꞌ-bale puhuꞌ pinatā eꞌ PANGHŪꞌ bang paꞌin mbal tamulaku aꞌa bay tapeneꞌna magsultan ilu. Na, ngāꞌun na budjak maka pangisihan boheꞌ ya ma atag kōkna ilu boꞌ kita sūng na!”
12 Jari ningāꞌ eꞌ si Daꞌud budjak maka pangisihan boheꞌ ya bay ma kōkan si Saꞌul ati alaꞌan na sigā. Halam aniyaꞌ minsan sai makataꞌu atawa makaꞌndaꞌ sigām maka halam minsan sai bay makabatiꞌ. Ahaluk sidda tuli sigām kamemon sabab PANGHŪꞌ ya bay amahaluk sigām. 13 Sakali itu, palintas na si Daꞌud ni dambilaꞌ kapantayan boꞌ anꞌngge mainaꞌan ma būd, atā-tā min disi Saꞌul. Asal aluha pagꞌllotan sigām. 14 Manjari, angolang si Daꞌud ni saga sundalu si Saꞌul maka ni si Abner, yukna, “Owaꞌ Abner! Mbal aku sambungannu?”
Anambung si Abner yukna, “Sai sa ka angolangan sultan ilu?”
15 Yuk si Daꞌud, “Lꞌlla ka bahāꞌ Abner? Bang pinaꞌamu, halam saliꞌnu ma Israꞌil! Na, angay halam jagahannu pahāp sultan ya pagpanghūꞌannu ilu? Sabab aniyaꞌ aꞌa bay pasōd piꞌilu arak angamula iya. 16 Mbal ahāp hinangnu ilu! Sapahanku ma ōn si Yawe ya kakkal salama-lama, in kaꞌa maka saga seheꞌnu ilu patut subay pinapatay sabab halam bay jagahannu nakuraꞌnu, ya bay tapeneꞌ eꞌ PANGHŪꞌ. Angꞌndaꞌ ka ni katilibutnu. Maingga na budjak sultan maka pangisihanna boheꞌ ya bay ma kōkanna ilu?”
17 Takilā magtūy eꞌ si Saꞌul suwala si Daꞌud angkan iya ahꞌlling, yukna, “Daꞌud, otoꞌ! Kaꞌa ka amissala ilu?”
Anambung si Daꞌud, yukna, “Ahoꞌ tuwan sultan, aku koꞌ itu.” 18 Ahꞌlling lagiꞌ si Daꞌud, “Tuwan,” yukna, “kasāꞌan ai bay tahinang eꞌ sosohoꞌannu itu angkan aku subay papataynu? Abontol sadja itikadku angkan mbal aku katōngan dusa. 19 Daꞌa busung, tuwan sultan, kalehun lagiꞌ pahꞌllingku itu. Bang hati PANGHŪꞌ ya bay anohoꞌ kaꞌa amantahan aku, na, tukbalun lalabotan ni iya. Kalu tinaimaꞌ eꞌna. Saguwāꞌ bang manusiyaꞌ ya amitnahan kaꞌa, bang paꞌin sigām taluwaꞌ suknaꞌ PANGHŪꞌ. Sabab itiyaꞌ aku tinꞌggal paluwas min lahat bay pamusakaꞌ aku eꞌ PANGHŪꞌ, lāgi sinohoꞌ isab aku magsumba ni saga katuhan-tuhanan bangsa liyu. 20 Ndūꞌ tuwan,” yuk si Daꞌud, “daꞌa aku pasagarin amatay ma lahat bangsa liyu, alawak min matahan si Yawe. Angay aku subay piniha eꞌ sultan bangsa Israꞌil? Aku itu sapantun kutu eroꞌ ya pihanu ma kabūd-būran, buwat aꞌa amiha manuk-manuk.”
21 Jari anambung si Saꞌul, yukna, “Bay aku makarusa. Ndūꞌ Daꞌud, otoꞌ, bang paꞌin ka pabalik ni aku. Pagka ahalgaꞌ ma kaꞌa kallumku itu, mbal na balikanku niyatku amapatay kaꞌa. Saliꞌ aku dupang, aheya kasāꞌan bay tahinangku ma kaꞌa.”
22 “Ā, itiyaꞌ budjaknu tuwan sultan,” yuk sambung si Daꞌud ma si Saꞌul. “Sohoꞌun piꞌitu dakayuꞌ tendognu ilu angāꞌ. 23 Bayaꞌ-bayaꞌ PANGHŪꞌ na anungbas ni kahāpan ma saga aꞌa sasuku abontol maka kapangandolan.” Ahꞌlling giꞌ si Daꞌud yukna, “Kaꞌa tuwan, bay tinukbalan eꞌ PANGHŪꞌ ni komkomanku insiniꞌ, sagōꞌ halam aku makatawakkal angamula kaꞌa sabab in kaꞌa sultan bay tapeneꞌ eꞌ Tuhan. 24 Mura-murahan bang paꞌin aku pinagkaꞌinagonan eꞌ PANGHŪꞌ maka niliyusan eꞌna min kamemon katiksaꞌanku, buwat bay pagkaꞌinagonku ma kaꞌa insiniꞌ.”
25 Sakali ahꞌlling na si Saꞌul ni si Daꞌud, yukna, “Otoꞌ, bang paꞌin ka nilidjikiꞌan eꞌ PANGHŪꞌ. Tantu ajatu ai-ai kamemon ya tagnaꞌannu, maka angandaꞌug sadja ka ma pagbonoꞌan.”
Pagubus, palanjal na si Daꞌud ni palꞌngngananna, maka amoleꞌ na si Saꞌul ni lahatna.