1 Samwel 25

¹ Manjari amatay na si Samwel ati magtipun kamemon saga aꞌa Israꞌil magdukkahan iya boꞌ yampa iya kinubul ma atag lumaꞌna ma Rama. Pagubus, in si Daꞌud bay palūd ni paslangan Maꞌon.

Si Daꞌud, si Nabal maka si Abigail

² Na, aniyaꞌ aꞌa Maꞌon landuꞌ dayahan, taga-tanaꞌ isab ma kauman Karmel. Aniyaꞌ kambingna dangibu hekana maka tꞌllungibu bili-bilina, jari inaꞌan iya ma Karmel sabab waktu na panganggunting bulbul saga hayop. ³ Si Nabal ōn aꞌa itu, maka si Abigail ya ōn hꞌndana. Ahāp dꞌnda si Abigail itu maka atahaꞌ akkalna, saguwāꞌ abꞌngngis sidda hꞌllana maka alaꞌat kaul-piꞌilna. Ya si Nabal itu dakayuꞌ panubuꞌ si Kaleb.

⁴ Hinabu lagiꞌ si Daꞌud bay ma paslangan, aniyaꞌ makahakaꞌan iya in si Nabal konoꞌ waꞌi magguntingan bulbul saga bili-bilina. ⁵ Sakali magpanohoꞌan si Daꞌud ma saga ondeꞌ bahaꞌu sangpūꞌ hekana. Yukna ma sigām, “Pehēꞌ kam ni si Nabal waꞌi ma Karmel boꞌ iya saginahunbi ma ōnku. ⁶ Buwattitu pamissalahunbi ma iya, ‘Tuwan, mura-murahan bang paꞌin atahaꞌ umulnu. Bang paꞌin isab ahāp kuwat-anggawtaꞌnu lapay sampay anak-hꞌndanu maka kamemon sasuku ma okomannu. ⁷ Kahakaꞌan nakuraꞌ kami si Daꞌud waktu na konoꞌ pagpagunting saga bili-bili. Ya pamissalana ma kaꞌa, tuwan, satꞌggol bay kamahēꞌ saga magiꞌipat bili-bilinu ma atag pahantiꞌan kami, halam sigām bay laꞌat kami. Maka ma waktu kamahēꞌ sigām ma Karmel, halam sigām kalungayan minsan ai na. ⁸ Tilawun paꞌin saga tendognu ilu, tantu du ka nihakaꞌan eꞌ sigām. Angkan amuꞌku ma kaꞌa, tuwan, paꞌndaꞌin kahāpan saga sosohoꞌanku itu, pagka kami pasabu ma waktu pagjamu itu. Ndūꞌ tuwan, buwanin lagiꞌ saga sosohoꞌannu itu maka lahasiyaꞌnu si Daꞌud ai-ai na tapamuwannu.’ ”

⁹ Pagtꞌkka saga sosohoꞌan itu ni si Nabal, magtūy iya pinasampayan lapal bay min si Daꞌud. Pagubus, angagad sadja sigām bang ai panambung. ¹⁰ Jari anambung si Nabal buwattitu yukna, “Sai sa si Daꞌud itu? Sai sa anak si Jesse itu? Ma waktu itu-i aheka na landuꞌ saga banyagaꞌ alahi min pagnakuraꞌan sigām. ¹¹ Angay subay pamuwanku tinapayku maka boheꞌku ni saga aꞌa mbal minsan takilāku bang minningga? Maka isi susumbaliꞌan bay tagamahanku saga aꞌa magguguntingan bulbul bili-biliku, pamuwanku bahāꞌ ma daka sai?”

¹² Pagka buwattēꞌ panambung si Nabal, amoleꞌ ni si Daꞌud saga aꞌana inān boꞌ angahakaꞌan iya kamemon ya bay binissala heꞌ si Nabal. ¹³ Pagkale si Daꞌud magtūy iya magpanohoꞌan ma saga tendogna, “Takosunbi kalisbi!” Magtūy isab sigām magtinakos. Magtakos kalis isab si Daꞌud boꞌ patukad minnēꞌ maka saga magbobonoꞌ mpat hatus hekana. Malaingkan aniyaꞌ duwa hatus bay magpaꞌbba anganjagahan saga balanjaꞌ maka kapanyapan sigām.

¹⁴ Na, aniyaꞌ sosohoꞌan disi Nabal bay amowa lapal ma si Abigail ya hꞌndana, yuk-i, “Babuꞌ, si Daꞌud bay magpanohoꞌan ma saga tendogna min paslangan deya lagiꞌ. Sinōꞌ sigām pehēꞌ ni nakuraꞌ kami amowa pagaddat si Daꞌud ma iya, sagōꞌ bay tumpalakna si Daꞌud. ¹⁵ Parahāl ahāp sidda addat saga aꞌa inān ma kami. Halam sigām bay anganjahulakaꞌ kami, maka tꞌggol kami ma atag sigām, halam kalungayan minsan dansolag ai-ai kami. ¹⁶ Satꞌggol kami magipat saga kahayopan kami ma atag sigām, sigām ya jaga kami llaw-sangom, kahantang ād apagon angalikusan kami. ¹⁷ Angkan na, babuꞌ, subay ka amikil pahāp bang ai ya tahinangnu ma pasalan palkalaꞌ itu, sabab tantu aniyaꞌ balaꞌ tumꞌkka ni nakuraꞌ kami sampay ni anak-kampungna. Abigsiꞌ landuꞌ iya angkan halam sai-na makabissalahan iya.”

¹⁸ Pagkale si Abigail ma lapal itu, magtūy iya magdaiꞌ-daiꞌ magsakap. Angāꞌ iya duwa hatus solag tinapay, duwa kuwit kambing pangisihan binu-anggul, lima bili-bili bay niadjal, lima karut pai-tirigu bay sinanglag, dahatus tundun anggul bay pinaꞌllawan, maka duwa hatus kompolan buwaꞌ pigi, ati pinaruwaꞌ kamemon ni saga kuraꞌ. ¹⁹ Pagubus, ahꞌlling iya ni saga sosohoꞌanna, yukna, “Parahū na kam min aku ati paturul paꞌin aku.” Saguwāꞌ halam pinataꞌu eꞌna hꞌllana.

²⁰ Hinabu si Abigail pakuraꞌ labay min tꞌngngaꞌ kapampangan, inaꞌan isab si Daꞌud maka saga aꞌana tudju ni iya. Jari bināk sigām heꞌna. ²¹ Bahaꞌu du bay makapahꞌlling si Daꞌud, yuk-i, “Kaliman hulas-sangsāꞌku anganjagahan palsukuꞌan aꞌa inān mahēꞌ ma paslangan. Halam aniyaꞌ bay alungay ma saga ai-aina, sagōꞌ kalaꞌatan ya panungbasna ma kahāpan bay tahinangku. ²² Bang paꞌin aku pinagmulkaꞌan eꞌ Tuhan bang aniyaꞌ dakayuꞌ lꞌlla min okoman si Nabal kakapinanku allum pagabut subu!”

²³ Pagꞌndaꞌ si Abigail ma si Daꞌud, magtūy iya paruwaꞌi min kuraꞌna boꞌ pasujud ma dahuwan si Daꞌud. ²⁴ Pasekot-sekot giꞌ iya boꞌ magmalulus ma atag tapeꞌna. Yukna ma si Daꞌud, “Tuwan, amuꞌku ma kaꞌa, aku ya bīngin. Parūlun lagiꞌ sosohoꞌannu itu amissala ni kaꞌa. Kalehun bissalaku itu, tuwan. ²⁵ Ya pangamuꞌku ma kaꞌa, daꞌa asipun aꞌa patilaꞌatun inān, ya si Nabal. Magtaluwaꞌ iya maka ōnna, hatina Dupang, pagka karupangan sadja ya kaluwasan saga hinangna. Boꞌ arapun, ma tongod sin sosohoꞌannu itu, tuwan, tuꞌud halam taꞌndaꞌku saga aꞌa ya bay papehēꞌnu ni hꞌllaku.

²⁶ “Na, tuwanku, kahandak PANGHŪꞌ asal angkan halam kalanjalannu amalos magbaran maka amapatay. Angkan sapahanku min ōn si Yawe ya kakkal salama-lama, maka min ōnnu, bang paꞌin pasaliꞌ ni si Nabal saga palbantahannu maka sasuku anganiyat angamula kaꞌa. ²⁷ Taimaꞌun isab, tuwan, saga huhulmatan bay bowaku itu boꞌ pamuwanun ma saga bebeyaꞌannu ilu. ²⁸ Amuꞌku junjung isab ni kaꞌa bang paꞌin ampunnu kasāꞌan ummatnu itu. Tantu pinatatas eꞌ PANGHŪꞌ in kapagsultannu sampay ni saga panubuꞌnu magsuring-magsaingsing, sabab palbantahan PANGHŪꞌ asal saga aꞌa ya bowanu magbonoꞌ. Mura-murahan, tuwan, bang paꞌin ka mbal makahinang dusa satꞌggolnu allum. ²⁹ Malaingkan minsan ka pinagturul boꞌ pinapatay, mbal ka magmula sabab asalamat nyawanu, tinauꞌ pahogot eꞌ PANGHŪꞌ ma deyom tatauꞌanna. Sagōꞌ in kallum saga bantanu sapantun batu pinitikan, mbal na tapiha. ³⁰ Bistahun, tuwan, bang taꞌabut waktu kapanuman eꞌ PANGHŪꞌ kamemon saga kahāpan bay panganjanjiꞌna ma kaꞌa, ati tahinang ka pagmakōkan ma bangsa Israꞌil, ³¹ wajib subay halam aniyaꞌ dusanu pagsusunannu. Angkan subay mbal nilanjalan niyatnu amalos atawa amapatay aꞌa ma halam aniyaꞌ poꞌon-sababna tantu. Jari bang ka nianughalaꞌan na eꞌ Tuhan, ndūꞌ, daꞌa aku kalipatun.”

³² Jari ahꞌlling si Daꞌud ni si Abigail yukna, “Pudji ni si Yawe, ya pagtuhanan bangsa Israꞌil, sabab in iya bay anohoꞌ kaꞌa amāk aku. ³³ Bang paꞌin iya amuwanan kaꞌa kahāpan ma sabab kahāp akkalnu llaw itu. Kaꞌa ya sababan angkan halam kalanjalanku niyatku amapatay aꞌa llaw itu. Arak aku bay amalos magbaran. ³⁴ Malaingkan, sapahanku min ōn si Yawe, ya Tuhan bangsa Israꞌil, in iya bay anaggaꞌ aku angamula kaꞌa. Sabab, bang ka bay halam makasaꞌut piꞌitu, arak mbal kakapinan minsan dakayuꞌ lꞌlla min panubuꞌ si Nabal pagkꞌllat llaw.”

³⁵ Sakali tinaimaꞌ na eꞌ si Daꞌud saga bobowahan si Abigail maka eꞌna ahꞌlling, yuk-i, “Amoleꞌ na ka ma halam aniyaꞌ kahanggawannu. Beyaꞌku kamemon ya bay junjungnu ilu ma aku.”

³⁶ Manjari amoleꞌ na si Abigail. Magsaltaꞌ, si Nabal bay amaniyaꞌ paglami-lami ma lumaꞌna, buwat sapantun kahinangan pagjamu sultan. Nilango toꞌongan si Nabal maka magkakoyagan, angkan halam iya binissalahan ai-ai eꞌ si Abigail sampay ni kasubuhan. ³⁷ Pagsubu paꞌin boꞌ palabay na lango si Nabal, binissalahan iya eꞌ hꞌndana pasal kamemon bay paniyaꞌ ma pagsampangna maka si Daꞌud. Pagkale si Nabal, magtūy apꞌddiꞌ kōk atayna ati anuwas baranna. ³⁸ Palabay paꞌin saga sangpūꞌ llaw, amatay iya min kawasa PANGHŪꞌ.

³⁹ Pagtaꞌu si Daꞌud ma pasal kamatay si Nabal, ahꞌlling iya, yukna, “Pudji ni PANGHŪꞌ ya bay amalosan aku ma si Nabal ma sabab kapangahinaꞌna ma aku. Tuhan ya bay angaliyusan aku min hinang kalaꞌatan ati papelleng ni aꞌa inān saga kahinanganna alaꞌat.”

Pagubus magpanohoꞌan si Daꞌud amahꞌnda si Abigail ati ⁴⁰ pehēꞌ saga sosohoꞌanna ni Karmel amowa lapal ni si Abigail, yuk-i, “Bay kami pinapiꞌitu eꞌ nakuraꞌ kami si Daꞌud supaya amahꞌnda kaꞌa.”

⁴¹ Pasujud magtūy si Abigail maka heꞌna anambung, yukna, “Aku itu atabi, sakap aku amahilalaꞌ kaꞌam sampay angoseꞌan tapeꞌbi.” ⁴² Ati magdaiꞌ-daiꞌ ya pakuraꞌ ni kuraꞌna boꞌ pabunyug ma saga sosohoꞌan si Daꞌud. Sineheꞌan isab iya eꞌ lima ipatanna dꞌnda. Minnēꞌ iya taꞌāꞌ hꞌnda eꞌ si Daꞌud. ⁴³ Tahꞌnda isab eꞌ si Daꞌud si Ahinowam dꞌnda min Jesdeꞌel, jari magkaluꞌa sigām karuwangan. ⁴⁴ Saguwāꞌ si Mikal, ya bay hꞌnda si Daꞌud poꞌon, waꞌi pamahꞌnda eꞌ si Saꞌul ma si Paltiyel ya anak si Lais, aꞌa min Galim.