24
Si Daꞌud Mbal Angamula si Saꞌul
1 Na, makabalik paꞌin si Saꞌul min kapanurulna ma saga Pilistin, kahakaꞌan iya in si Daꞌud waꞌi ma Paslangan En Gedi. 2 Angkan amowa si Saꞌul tꞌllungibu aꞌa Israꞌil magbobonoꞌ, aꞌa bay peneꞌna, boꞌ magsakap amiha si Daꞌud maka saga aꞌana pehēꞌ ni atag Pampang Kambing-talun.
3 Sakali makaꞌabut disi Saꞌul ni pagkukuralan saga bili-bili ya inaꞌan ma bihing lān. Aniyaꞌ isab songab batu mainaꞌan, ati pasōd si Saꞌul pehēꞌ boꞌ ajamban. Inaꞌan asal si Daꞌud maka saga aꞌana ma deyomna toꞌongan. 4 Yuk aꞌa inān ni si Daꞌud, “Tuwan, ya na itu waktu bay pagkallam si Yawe, ya yuk-i, ‘Tukbalanku bantanu ni komkomannu boꞌ supaya tahinangnu bang ai ya kabilahiannu.’ ” Jari itu, kamayaꞌ-mayaꞌ si Daꞌud palele ma halam aniyaꞌ makasayuhan iya ati kinꞌttob eꞌna tōng juba si Saꞌul.
5 Tataliꞌ-taliꞌ paꞌin eꞌ si Daꞌud kapangꞌttobna itu, magsusun iya. 6 Yukna ni saga aꞌana, “He! Sꞌlleꞌ bale puhuꞌ! Bang paꞌin aku sinaggaꞌ eꞌ PANGHŪꞌ boꞌ mbal makamula aꞌa bay peneꞌna nihinang sultan. Halam aniyaꞌ kapatutku angahinang kamulahan ma sultanku sabab PANGHŪꞌ ya bay amatꞌnnaꞌ iya.” 7 Minnēꞌ pinabukagan eꞌ si Daꞌud saga aꞌana maka sinōꞌ sigām daꞌa angamula si Saꞌul. Jari alaꞌan na si Saꞌul min songab batu heꞌ.
8 Pagubus, paluwas si Daꞌud boꞌ angalingan ni si Saꞌul, yukna, “Owaꞌ, tuwan Sultan!” Paglingiꞌ si Saꞌul, magtūy pasujud si Daꞌud tandaꞌ sin pagaddatna ma iya. 9 Ahꞌlling si Daꞌud yuk-i, “Angay ka akale ma pamitna saga aꞌa ya ahꞌlling in aku itu magniyat angamula kaꞌa? 10 Kasaksiꞌannu na in kaꞌa bay pamarūl ma aku eꞌ PANGHŪꞌ hinabunu lagiꞌ bay ma deyom songab batu. Aniyaꞌ seheꞌku bay anohoꞌ aku amapatay kaꞌa, sagōꞌ halam ka bay inayku. Ya yukku ma sigām, ‘Mbal aku anawakkal angamula nakuraꞌku sabab PANGHŪꞌ ya bay ameneꞌ iya.’ 11 Ndaꞌun ba, bapaꞌ, itiyaꞌ ma tanganku ya pīs-pīs kakanaꞌ bay min jubanu! Bay kꞌttobku sagōꞌ halam ka bay papatayku. Na, dongdongin pahāp, in aku itu alipuwas na min dusa niyat amantahan kaꞌa. Halam aku bay angalaꞌat kaꞌa sagōꞌ kaꞌa na paꞌin ya angapas aku supaya aku papataynu. 12 Na bayaꞌ-bayaꞌ PANGHŪꞌ na angahukum kita karuwangan. PANGHŪꞌ na isab anungbasan saga kalaꞌatan bay tahinangnu ma aku sagōꞌ in aku baranku mbal anawakkal angamula kaꞌa. 13 Buwat na yuk papata, ‘Min aꞌa alaꞌat paluwas kalaꞌatan,’ angkan mbal ka inayku. 14 In kaꞌa sultan bangsa Israꞌil, ati turulnu aꞌa halam aniyaꞌ pūsna? Aku itu hal sadja koꞌ kahantang patay eroꞌ atawa kammut. 15 Na bayaꞌ-bayaꞌ PANGHŪꞌ angahukum bang sai ma kita taga-kasāꞌan. Bang paꞌin aku binogbogan eꞌna maka pinuwasan min komkomannu.”
16 Pagubus si Daꞌud ahꞌlling itu, atilaw si Saꞌul. Yukna, “Otoꞌ? Daꞌud? Kaꞌa ka amissala ilu?” Jari anangis toꞌongan si Saꞌul. 17 “Abontol lagiꞌ ka min aku,” yukna. “Ahāp ka ma aku saguwāꞌ aku ya bay angalaꞌat kaꞌa. 18 Na, aheya landuꞌ kahāpan ya tahinangnu ma aku sabab minsan aku bay tinukbalan eꞌ PANGHŪꞌ ni komkomannu, halam ka anawakkal angamula aku. 19 Aniyaꞌ bahāꞌ amasagad bantana alahi ma halam bay minula eꞌna dahū? Tantu halam. Na, mura-murahan bang paꞌin ka tinungbasan eꞌ PANGHŪꞌ ni kahāpan ma sabab kapangahāpnu aku ma llaw itu. 20 Manantuhi aku in kaꞌa ilu magsultan maka ahogot in kapagsultannu ma bangsa Israꞌil. 21 Buwattinaꞌan, sapahin aku ma matahan PANGHŪꞌ in aku sampay saga panubuꞌku mbal papataynu. Mbal isab lungaynu ōnku min salsila kapanubuꞌan kami.”
22 Sakali anapa si Daꞌud ma si Saꞌul buwat bay amuꞌna. Pagubus, amoleꞌ na si Saꞌul ni lumaꞌna. Malaingkan si Daꞌud maka saga aꞌana bay patukad pabalik ni bay patapukan sigām eꞌ.